Ezekiela

32 E TAE akera ki te mataiti okotai ngauru ma rua, i te ngauru ma rua o te marama, e te rā tai o taua marama ra, i tae mai ei te tuatua a Iehova kiaku nei, na ko maira,

2 E te tamaiti a te tangata na, ka atu ana koe i tetai peʼe tangi no te ariki o Aiphiti ia Pharao, e na ko atu kiaia, Kua arite koe ki te liona ou o te au enua nei, e mei te taae koe i raro i te tai ra; kua rere ua mai koe mei roto i to au kauvai ra, e kua taveu koe i te vai ki to vaevae, e kua tarepoia to ratou au kauvai.

3 Te na ko maira te Atu ra ko Iehova, E teianei, e oora au i taku kupenga ki runga ia koe ra ma te urupu tangata e manganui; e na ratou koe e totō mai ki runga i roto i taku kupenga.

4 E vaoo ei au ia koe ki runga i te enua, e akaruke au ia koe ki te ngai atea ra, e naku e akato i te au manu katoa o te reva ki runga ia koe, e ka akaki au i te au puaka o te enua katoa nei ia koe.

5 E e tuku au i to kiko ki runga i te au maunga, e akaki oki i te au o ki toou ra teitei.

6 E akamauu oki au i te enua i kau ei koe ra ki toou ra toto, e tae roa atu ki te au maunga, e ki oki te au kauvai ra ia koe.

7 E ka tapoki au i te rangi, kia tamate au ia koe ra, e akapoiri oki i tona ra au etu; e tapoki au i te rā ki te tumurangi, e kare te marama e pa mai i tona mārama.

8 Te au mea mārama kakā ravarai o te rangi ra, ka akapoiriia e au i runga ia koe; e tuku oki au i te poiri ki runga i to enua, te tuatua maira te Atu ra ko Iehova.

9 E e akaanatā atu au i te ngakau o te tangata e manganui, kia tae toou mate iaku i rotopu i te pa enua ra, i roto i te au enua kare i kitea e koe ra.

10 E naku e akapoitirere i te au tangata, e manganui ia koe ra, e mataku rikarika to ratou au ariki ia koe ra, kia akakoraparapa au i taku koke ki mua ia ratou; e ruketekete oki ratou kare e tivata, te tangata katoa oki i te ora nona uaorai, i te rā e ingaʼi koe ra.

11 Te na ko maira oki te Atu ra ko Iehova; E tae mai te koke a te ariki o Babulonia ki runga ia koe.

12 I te au koke a te aronga ririnui ra e ingaʼi to tini ra iaku, te aronga i rikarikaia e te pa enua nei, ratou ravarai: e takino oki ratou i te nengonengo o Aiphiti, e tona tini katoatoa ra, e pou anake ïa.

13 E pou rava oki tana au puaka i te pae o te au vai maata ra iaku; kare oki te reira e taveu akaouia e te vaevae tangata, kare oki e taveu akaouia e te maikuku puaka.

14 E areare to ratou au vai iaku i reira, e ka taʼe to ratou au kauvai iaku mei te mori ra, te tuatua maira te Atu ra ko Iehova.

15 Kia akatanea atu au i te enua ra ia Aiphiti, e kia kore rava akera te au mea katoa ra i roto; kia ope rava tei noo i reira i te taia e au, ei reira ratou e kite ei e ko Iehova au.

16 Ko te peʼe aue teia kia aue ratou iaia: te au tamaine o te pa enua te ka aue iaia: ka aue ratou iaia, koia oki Aiphiti, e tona tini ravarai, te tuatua maira te Atu ra ko Iehova.

17 E tae akera ki te mataiti okotai ngauru ma rua, e te rā okotai ngauru ma rima i taua marama ra, i tae mai ei te tuatua a Iehova kiaku nei, na ko maira,

18 E te tamaiti a te tangata na, e aue koe i te tini o Aiphiti, ka opara atu ei ia ratou ki raro koia ma te au tamaine o te au enua rongonui ra, ki te au ngai akaaka o te enua nei, e te aronga katoa e riro ki raro i te vaarua ra, ma te na ko e,

19 Kua tu ke roa atu koe iaai i te purotu? ka eke ana ki raro, e kia noo koe e te aronga peritome koreia.

20 E inga ratou i rotopu i te aronga i taia i te koke ra: kua tukuia atu aia no te koke: e kika ke atu iaia e tona tini katoatoa ra.

21 Ko tei maroiroi i roto i taua aronga ririnui ra, te ka karanga atu iaia, e tona au tauturu i rotopu i ade ra: kua eke ratou ki raro, te takoto peritome koreia ra ratou, i taia i te koke ra.

22 Tei reira Asura e tona tini ravarai: te akapini ra tona au tanumanga iaia, e aronga taia anakeia ïa, i inga i te koke ra.

23 Ko tei tukuia to ratou tanumanga ki te pae o te vaarua ra, e tona tini tei te pae ïa i tona tanumanga e pini ua ake: e aronga taia anakeia, i inga i te koke ra; ko tei akamatakutaku i te enua o te aronga e ora nei.

24 Tei reira Elama e tona tini ravarai ra, i te akapini anga i tona ra tanumanga, e aronga taia anakeia, i inga i te koke ra, ko tei riro ki raro ma te peritome koreia ki te ngai akaaka i te enua nei, ko tei akamatakutaku i te enua o te aronga e ora nei; kua apai ra ratou i to ratou akama, e te aronga katoa e riro ki raro i te vaarua ra.

25 Kua tuku ratou i tetai roi nona ma tona tini ravarai i rotopu i tei taia: kua akapiniia aia e tona au tanumanga: e aronga peritome kore anakeia, i taia i te koke: akamataku uaʼi ratou i te enua o te aronga e ora nei, kua apai ra ratou i to ratou akama, e te aronga katoa i riro ki raro i te vaarua ra: kua tukuia aia i rotopu i te aronga i taia ra.

26 Tei reira Meseka, Tubala, e tona tini ravarai ra: kua akapiniia aia e tona ra au tanumanga: e aronga peritome kore anakeia, i taia i te koke, akatupu uaʼi ratou i te mataku ia ratou i te enua o te aronga e ora nei.

27 Kare oki ratou e moe ki raro ma te aronga mana katoa ra, to te peritome kore i inga ra, ko tei riro ki raro ia ade ma ta ratou taoonga tamaki katoa ra: e kua pange ratou i to ratou au mimiti ki ta ratou au koke, ka vai ra ta ratou ara ki runga i to ratou au ivi, mataku uaiaʼi ratou e te aronga mana i te enua o te aronga e ora nei.

28 E atiatiia koe i rotopu i te aronga peritome koreia, ka moe katoa koe ki raro e te aronga i taia i te koke ra.

29 Tera oki Edoma, tona au ariki, e te ui mataiapo katoa nona, ko tei tuku katoaia ma to ratou ririnui ki raro, e te aronga i taia i te koke ra: ka moe ratou ki raro ma te aronga peritome koreia, e te aronga i riro ki raro i te vaarua ra.

30 Tei reira te ui ariki no te pae i apatokerau ra, ratou ravarai, e to Sidona katoatoa ra, ko tei riro ki raro ma te aronga i taia ra; ma to ratou mataku angaia, ma te akama i to ratou ririnui; e te vai peritome koreia ra ratou e te aronga i taia i te koke ra, e kua apai i to ratou akama ma te aronga katoa i riro ki raro i te vaarua ra.

31 E kite katoā Pharao ia ratou, e ka akapumaanaia aia i tona tini ravarai ra, ko Pharao e te nuku katoa nona i taia i te koke ra, te tuatua maira te Atu ra ko Iehova.

32 I akatupu ana au i te mataku iaia i te enua o te aronga e ora nei, e tukuia ra aia ki rotopu i te aronga peritome koreia, i tei taia i te koke ra, koia Pharao e te tini katoa nona, te tuatua maira te Atu ra ko Iehova.