2 Ariki

24 TEI tona au rā to te ariki o Babulonia to Nebukaneza aerenga mai ki runga, riro aturā Iehoiakima ei tavini nona e toru akera mataiti: kua akaruke iora aia iaia i reira ra, e kua kaitamaki iora.

2 Kua unga mairā Iehova i nga takanava Kaledea, e nga takanava Arama, e nga takanava Moabi, e nga takanava ngati Amona: kua tono mai oki aia ia ratou e tamaki ia Iuda kia pou, i te tuatua ta Iehova i tuatua mai i tona au tavini i te au peroveta ra.

3 E mea akaueia mairai e Iehova i rokoia mai ei Iuda i teia, ei apai ke atu ia ratou i mua i tona mata, no te au ara ravarai ta Manase i rave ra;

4 E no te toto ara kore i maringi iaia: kua ki oki Ierusalema ki te toto ara kore, kare ïa te reira i akakoreia e Iehova.

5 E te toenga o te tuatua ia Iehoiakima, e tana katoa i rave ra, kare ainei kua tataia i roto i te buka, te tuatua no te au rā o te au ariki o Iuda ra?

6 Moe iorā Iehoiakima ki o tona ra ai metua; tupauia akera aia i te au e tana tamaiti ra e Iehoiakina.

7 Kare akerai te ariki o Aiphiti i akaruke akaou i tona enua: kua rauka oki ta te ariki o Aiphiti apinga i te ariki o Babulonia, mei te kauvai o Aiphiti maira e tae rava akera ki te vai ra ko Eupharati.

8 Tei te mataiti okotai ngauru ma varu o Iehoiakina i ariki ei aia, e toru akera ona marama i te ariki anga i Ierusalema. Ko Nehuseta te ingoa o tona metua vaine, e tamaine na Elenatana i Ierusalema ra.

9 Kua rave aia i te kino i mua i te aroaro o Iehova, mei ta tona ra ai metua katoa i rave.

10 I reira te tae anga mai o te au tavini o te ariki o Babulonia o Nebukaneza ki Ierusalema, e kua tamaki iora i taua oire ra.

11 Kua aere maira te ariki o Babulonia ko Nebukaneza e rave i taua oire ra, e na tona au tavini i tamaki atu.

12 Kua aere iora te ariki o Iuda ko Iehoiakina ki vao ki te ariki o Babulonia, koia ma tona metua vaine, e tona au tavini, e te au rangatira nona ra, e te aronga akataongaia ra: riro atura aia ki te ariki o Babulonia i te varu o te mataiti o tona ra au.

13 E kua apai ke atura aia i te apinga ravarai o te are o Iehova, e te apinga o te are o te ariki,e kua tipupuia te au āriki auro katoa i angaia e te ariki o Iseraela e Solomona i roto i te nao o Iehova, ta Iehova oki i akakite maira.

14 E kua apai keia e ia to Ierusalema katoatoa, e te aronga mamaata katoa, e te au tangata toa katoa, okotai ngauru i te tausani, i te tuikaa, e te au taunga tarai rakau, e te au tupaki auri katoa; kare akerai e toe, mari ra ko te aronga ao ra o te enua ra.

15 E kua apai aia i a Iehoiakina ki Babulonia, e te metua vaine katoa o te ariki, e nga vaine a te ariki ra, e te au tavini ariki, e te aronga mamaata o te enua ra, ko tei apaiia e ia ei tukikaa, mei Ierusalema mai e tae rava akera ki Babulonia.

16 E te aronga taoiua katoa, e itu tausani, okotai oki tausani taunga tarai rakau e te tupaki aruri, te aronga toa katoa no te tamaki ra, tei kaveia ïa e te ariki o Babulonia ei tuikaa ki Babulonia.

17 Kua akariro atura te ariki o Babulonia ia Matania, e taeake no tona metua, ei ariki, ei tupau mai iaia, e kua ruri ke akera i tona ingoa ia Zedekia.

18 Tei te mataiti tai takau ma tai o Zedekia i ariki ei aia, okotai ngauru ma tai ona mataiti i te ariki anga i Ierusalema. Ko Hamutala te ingoa o tona metua vaine, e tamaine na Ieremia i Libena ra.

19 Kua rave aia i te kino i mua i te aroaro o Iehova, mei ta Iehoiakima katoa i rave.

20 Te vai ra oki te riri o Iehova ia Ierusalema e ia Iuda, e peke ke atura ratou i mua i tona aroaro: kua kaitamaki rā Zedekia i te ariki o Babulonia.