Isaia

36 TAE akera i mataiti okotai ngauru ma a o te ariki ra o Hezekia, kua aere maira te ariki no Asura ra, ko Senakeriba, e tamaki i te au oire ravarai i Iuda i akaketaketaia ra, e rauka iora.

2 Kua tono akera te ariki o Asura ra ia Rabasake, mei Lakisa mai, ki te ariki ra kia Hezekia, ma te nuku maata, ki Ierusalema. E kua tu iora i te pae o te vai ko ra o te roto ki runga ra, tei te ara metua i te kainga o te tamā kakau ra.

3 Kua aere mairā Eliakima te tamaiti a Hilikia ki vao kiaia ra, no runga ïa i te ngutuare, e ko Sebena tata tuatua ra, e ko Ioa te tamaiti a Asapha akamou tuatua ra.

4 Kua tuatua mairā Rabasake kia ratou, Ka tuatua ana kotou kia Hezekia, Te na ko maira te ariki maata, te ariki no Asura ra,

5 Eaa tena irinaki anga i irinaki ei koe na? Te tuatua ra koe e, Teia taku tuatua, (e tuatua vaa ua ra,) E kite toku e te ririnui kia tamaki. E tenana, koai toou irinaki anga, i kaitamaki mai ei koe iaku nei?

6 I na, te irinaki ra koe i tenana tokotoko kakao aati ia Aiphiti ra; ko te puta te rima o te tangata kia irinaki ra, e mama atu: koia te ariki o Aiphiti ra, ko Pharao, i te aronga katoa i irinaki iaia.

7 Kia tuatua maira koe kiaku e, Te irinaki nei matou ki to matou Atua kia Iehova: kare ainei aia, nona te au ngai teitei, e te au atarau, i apai keia e Hezekia ra, tei tuatua oki kia Iuda e Ierusalema, Ei mua i teianei atarau kotou akamori ei?

8 E tenana, teia taku tuatua kia koe, ka tuku ana i te tutaki ki toku pu, ki te ariki o Asura ra, e naku e oronga atu i te au oroenua naau e rua tausani, peneiake ko te tika ia koe kia tuku i te akaoro ki rungao.

9 E akapeea oki koe e tikaʼi kia akaanga ke atu i te rangatira okotai, tei iti roa i roto i te au tavini o topu pu akera, irinaki uaʼi koe ia Aiphiti i te kariota e te aronga akaoro oroenua ra?

10 I aere ua mai ainei oki au, kare nei a Iehova, e rave i teianei enua kia pou? Na Iehova rai i tuatua mai kiaku e, Ka aere, ka rave i taua enua nei, e kia pou atu.

11 Kua tuatua mairā Eliakima, e ko Sebena, e ko Ioa, kia Rabasake, Ei reo Arama taau e tuatua mai kia matou, ki to au tavini nei, ta matou ïa tuatua kia koe; kua kite oki matou; auraka ra e tuatua mai kia matou i te reo ngati Iuda nei, ko te rongo aea te taringa o te au tangata i runga i te patu nei.

12 Kua karanga aturā Rabasake kia ratou, I tono mai ainei toku pu iaku e karanga atu ki toou pu anake ra, e kia koe oki, i teianei au tuatua? e auraka ki te au tangata e noo ki runga i te patu ra, kia kai ratou i to ratou uaorai repo, e kia inu i to ratou uaorai mimi, ma kotou katoa ra?

13 Kua tu ua mairā Rabasake i reira, e kua kapiki nui maira i te reo ngati Iuda, na ko maira, E akarongo mai ana i te tuatua a te ariki maata, te ariki no Asura:

14 Te na ko maira te ariki, Auraka kotou e vavare ia Hezekia: kare oki e tika iaia kia akaora ia kotou.

15 Auraka oki kotou e vavare ia Hezekia e e irinaki ia Iehova, ka na ko mai ei, Na Iehova tatou e akaora, kare teianei oire e orongaia ki te rima o te ariki o Asura ra.

16 Auraka e akarongo ia Hezekia: te na ko maira oki te ariki no Asura ra, O mai kotou i te apinga naku, ka uri mai ei kotou kiaku nei; e kai ua ïa te tangata katoa i tana uaorai vine, e tana uaorai suke, e inu oki te tangata katoa i te vai no roto i tona uaorai puna:

17 E kia tae mai au ra, e arataki ia kotou ki te enua mei to kotou katoa ra enua; e enua sitona e te wina, e enua manga e te kainga vine:

18 Ko te akanauru aeā Hezekia ia kotou, kia no ko mai e, Na Iehova tatou e akaora. Kua akaora ainei te au atua o te pa enua ra i to ratou enua i te rima o te ariki o Asura ra?

19 Teiea te au atua no Hamata, e no Araphada? teiea te au atua no Sepharavaima? kua akaora ainei ratou ia Samaria i toku nei rima?

20 Koai to te au atua katoa o te pa enua nei i akaora i to ratou enua i toku nei rima, ka oraʼi Ierusalema ia Iehova i toku nei rima?

21 Kua muteki ua ra ratou, e kare rava i ki atu kiaia; kua akaue mai oki te ariki, na ko maira e, Auraka rava e ki atu.

22 Kua aere mairā Eliakima te tamaiti a Hilikia, no runga ïa i taua ngutuare ra, ko Sebena tata tuatua ra, e ko Ioa te tamaiti a Asapha akamou tuatua ra, kia Hezekia ra, ma te kakau aeaia ra, e kua akakite maira kiaia i te au tuatua a Rabasake.