Salamo

68 KIA tu mai te Atua, kia akapueurikiriki keia tona au enemi! e te aronga i makitakita iaia ra, kia rere ke atu ïa i mua i tona mata!

2 Mei te auai e peke ra, kia peke katoa ratou: mei te tapou e taʼe i te ai ra, kia pera to te aronga kino mate i mua i te aroaro o te Atua.

3 Kia rekareka ra te aronga tuatua-tika; kia pereperekavana ki mua i te aroaro o te Atua; e kia maata to ratou rekareka.

4 E imene i te Atua, e imene akameitaki i tona ingoa; e akateitei iaia i tei akaoro na roto i te au medebara; ko IA tona ingoa: e rekareka kotou ki mua i tona aroaro.

5 Ko te Metua o te au matiroeroe, e te Akava o te au vaine takaua, ko te Atua ïa i tona nooanga tapu.

6 E tuku oki te Atua i te taki tai i te ngutuare tangata; e tei tapekaia ki te auri pirianganaoa ra, nana ïa e tatara; kareka tei māro ra, ka noo ïa i te enua marō.

7 E te Atua e, ia koe i aere na mua i toou ra au tangata: ia koe i aere na roto i te medebara ra: Sela:

8 Kua ngaueue te enua, kua taravai oki te au rangi, i te aroaro o te Atua, ko Sinai katoa ra, i te aroaro o te Atua, te Atua o Iseraela.

9 Kua maringi maira ia koe te ua maata, e te Atua e, e te tuanga roiroi naau ra, kua turuia e koe:

10 Kua noo oki toou ra pupu tangata i rotopu i te reira; no toou ra meitaki, e te Atua, i akonokono ei koe i ta te aronga ao.

11 Kua tuku maira te Atu ra i te tuatua, e na tetai nuku tamaine maata i akakite.

12 Te au ariki o te au nuku ra, kua ati, kua ati; e tei noo i te ngutuare ra, kua tua i te apinga noni.

13 Moe uaorai kotou ki raro i te pae pakiumu ra, ka riro kotou mei te peau kukupa i tapokiia i te ario, e tei tikotikoti aereia tona uruuru i te auro rengarenga ra.

14 Kia pueurikiriki ke atura taua au ariki ra i roto iaia i te Mana katoatoa ra, kua teateaia te reira mei te kiona i Zalemona ra.

15 E maunga Atua te maunga ra ko Basana; e maunga teitei te maunga ra ko Basana.

16 Eaa kotou i vareae ei, e te au maunga teitei ra, i te maunga ta te Atua i anoano ei nooanga nona? Ka noo tikai a Iehova i reira e tuatau ua atu.

17 Te au kariota a te Atua ra, e rua ïa ngauru i te tausani; manganui oki te tausani anga; tei rotopu te Atu ia ratou i roto i te ngai-tapu ra mei tei Sinai.

18 Kua riro koe ki runga, kua arataki koe i te tuikaa e manganui ra; e kua rauka ia koe te apinga no te tangata ra; e no te aronga māro katoa ra, kia noo te Atua ra ko IEHOVA, i rotopu ia ratou.

19 Kia akameitakiia te Atu i tera rā i tera rā, ko tei akateiaa ia matou i te meitaki, ko te Atua ïa to matou nei ora. Sela.

20 Ko to matou nei Atua, ko te Atua ïa e oraʼi; no te Atu oki no Iehova, i oraʼi tatou i te au mate nei.

21 Kua ta ra te Atua i te upoko o tona au enemi, te katu rauru o te aronga i aere ua atu rai i ta ratou ara.

22 Kua tuatua oki te Atu, Ka akaoki mai au ia ratou mei Basana maira; e akaoki mai au ia ratou mei taatai maira mei te moana;

23 Kia takū koe i to vaevae ki roto i te toto o te au enemi, e kia mitimiti katoaia te reira e te arero o to au puaka-aoa ra.

24 Toou ra au aerenga, e te Atua, te akaraia nei e ratou; te aerenga o taku Atua, o toku ariki, i te ngai-tapu ra.

25 Kua na mua te aronga imene, muringao te aronga i akatangi i te au peu, i rotopu i te au paretenia i te akatangi anga i te tophe ra:

26 E uipa kotou i te akameitaki i te Atua, e te anau a Iseraela, e akameitaki i te Atu.

27 Teia oki Beniamina, tangata ou ra, ko to ratou ïa arataki, te au ariki o Iuda to ratou ïa pupu; te au ariki o Zebuluna; te au ariki o Naphatali.

28 Kua akaue ana to Atua i toou ra maroiroi; e akamaroiroi ana, e te Atua, i taau i rave no matou nei.

29 No toou ra nao i Ierusalema ka apai mai ei te ui ariki i te apinga naau.

30 E akamura atu koe i te taae o te rarokakao ra, te uipa anga o te au puakatoro toa ra, e te au puakatoro ou ra, ko te au tangata ra; kia tatomo ratou ravarai ma te manga ario i te rima: e akapueurikiriki ke koe i te aronga i anoano i te tamaki.

31 E tae mai te aronga nunui mei Aiphiti mai; ka rapurapu mai oki Etiopia i te oronga i tona rima ki te Atua.

32 E te au basileia o te ao nei, e imene kotou i te Atua, e imene akameitaki i te Atu; Sela:

33 Iaia i tei oro na runga i te rangi o te au rangi taito ra; i na, te tuku maira aia i tona reo, e reo mangungu!

34 E tuku atu i te ririnui ki te Atua; tei runga ia Iseraela tona mana, e tei te au tumurangi ra tona ririnui.

35 E mataku maataia te Atua, i tona ngai-tapu ra; ko te Atua o Iseraela; ko tei oronga mai i te maroiroi, e te ririnui, ki tona ra tangata: kia akameitakiia te Atua.