1 Korinetia

11 E ARU mai kotou iaku mei iaku katoa i aru i te Mesia nei.

2 E teianei, te akameitaki nei au ia kotou, e te au taeake, kotou i maara mai iaku i te au mea katoa nei, e te tāpu na kotou i te au tuatua porokiroki, taku i tuku atu ia kotou na.

3 Teia ra toku inangaro, kia kite kotou e, ko te Mesia te upoko o te tangata ravarai nei; e to te vaine ra upoko, ko te tane ïa; e to te Mesia upoko, ko te Atua ïa.

4 E te tangat ravarai e pure, e e ako oki, ma te upoko tapokiia ra, kua taakaaka aia i tona upoko.

5 Ko te vaine katoa ra e pure, e e ako oki, ma te upoko tapoki koreia ra, kua taakaaka ïa i tona upoko: okotai rai tu te reira e te upoko varuia ra.

6 Kia kore ra te vaine e tapokiia, kia pakoti uaia mari tona upoko: e e mea akama kia pakoti uaia te vaine, e kia varuia, kia tapokiia aia e tikaʼi.

7 Kare oki e tika i te tane kia tapoki i te upoko, ko te tu oki aia e te kakā o te Atua; kareka te vaine, ko te kakā ïa o te tane.

8 Kare oki te tane no te vaine; no te tane ra te vaine.

9 Kare oki te tane i angaia no te vaine, ko te vaine ra no te tane.

10 E teianei, ei tapoki to te upoko o te vaine e tikaʼi, no te au angela. 11 Kare ra te tane i taka ke i te vaine, kare katoa te vaine i taka ke i te tane, i te Atu nei.

12 Mei te vaine oki no roto i te tane ra, na te vaine katoa te tane; na te Atua ra te au mea ravarai nei.

13 E akamaara ana kotou uaorai, e mea tau aina kia pure te vaine ki te Atua ina te tapoki kore?

14 Kare aina e kitea uaia ia kotou uaorai e, e rauru roroa to te tane ra, e mea akama ïa iaia;

15 Ko te vaine ra, kia roroa te rauru, e mea manea ïa iaia? no te mea i orongaia mai tona rauru ei tapoki.

16 Kia inangaro ra tetai tangata i te taumāro, kare ïa peu ia matou nei, kare katoa i te au ekalesia a te Atua ra.

17 Kare ra au e akameitaki ia kotou i teia i taku e karanga atu nei, ko kotou kia akaputuputu ra, kare i tupu te meitaki, ko te kino ra.

18 Teia ra taku i kite akenei e, kia putuputu kotou i te ekalesia na, e pae ke tei roto ia kotou na, e te akarongo iti nei au i taua tuatua nei.

19 Mari rai kia tupu te pae ke i roto ia kotou, kia kitea te aronga i kiteia mai i roto ia kotou na.

20 Kia akaputuputu kotou i te ngai okotai, kare ïa kia kai i te kaingakai a te Atu ra.

21 Kia kai oki kotou ra, te na mua ra te tangata katoa i te rave i tana uaorai kai; e te pongi ra tetai, e kua kona tetai.

22 Eaa! kare o kotou ngutuare tikai kia kai e kia inu oki? e te akavaavaa na aina kotou i te ekalesia a te Atua, e kia akama te aronga kare a ratou ra? E peea atu au kia kotou? e akameitaki atu aina au ia kotou i te reira? Kare au e akameitaki.

23 I rauka oki iaku i te Atu taku i tuku katoa atu kia kotou na e, kua rave te Atu ra ko Iesu i te manga i te po i pikikaaia mai ei aia ra:

24 E oti akera iaia te akameitaki, vavaʼi iora, na ko atura, Ka rave mai, ka kai, ko taku kopapa teia, i atiatiia no kotou nei: e pera kotou ei manako anga iaku.

25 E kua pera katoa oki i te kapu, kia oti ake tana kai anga, na ko atura, Teianei kapu, ko te koreromotu ou ïa i toku nei toto, e pera katoa kotou kia inu ei manako anga iaku.

26 Kua kai anake kotou i teianei manga, e kua inu i teianei kapu, kua akakite ïa kotou i te matenga o te Atu, e tae ua mai aia ra.

27 E teianei, ko te kai i teianei manga, e ko te inu i te kapu a te Atu, ma te tau kore ra, e ara ïa i te kopapa e te toto o te Atu.

28 E kimi matatio ra te tangata iaia uaorai, ka kai ei aia i taua manga ra, ka inu ei oki i taua kapu ra.

29 Ko tei kai oki e ko tei inu oki ma te tau kore, kua kai ïa e kua inu i te akaapa nona uaorai, koia kare i akara i te kopapa o te Atu ra.

30 No reira i maataʼi te mate i te maki e te apikepike i roto ia kotou, e i moe ei oki tetai papaki e manganui.

31 Naringa oki tatou e akaapa ia tatou uaorai, kare tatou e akaapaia mai.

32 Kia akaapaia maira tatou, kua akoia mai tatou e te Atu, kia kore tatou e akava katoaia ma to te ao katoa nei.

33 E teianei, e aku au taeake, kia akaputuputu kotou e kai, e tatari marie tetai ki tetai.

34 E kia pongi tetai tangata ra, e kaikai ïa i te ngutuare tikai; kia kore to kotou akaputuputu anga ra kia riro ei mate no kotou. E ko te au mea toe ra, naku ïa e akatika kia tae atu au.