Mataio

21 E VAITATA maira Ierusalema ia ratou, kia tae atura ki Betephage, i te maunga ra i Oliveta, kua tono akerā Iesu i e toko rua puke pipi ana ra,

2 Na ko atura, Ka aere ana korua ki tera ra vila, e kite korua i tetai asini i reira, kua erekia, ma tana punua i te pae, e tatara, e taki mai i ko nei kiaku nei.

3 E kia tuatua mai tetai tangata kia korua, e karanga atu korua, E tau teia i te Atu; e nana e tuku mai i reira ra.

4 Kia tupu te tuatua a te peroveta ra, i peraiaʼi, ko tei na ko maira e,

5 “E karanga atu kotou ki te tamaine a Ziona,” “I na, te aere maira to Ariki ia koe na, ma te akaaka, e ma te noo ki rungao i te asini, e te punua a te asini.”

6 Aere atura nga pipi, akono atura i ta Iesu i akaue mai kia raua ra,

7 Kua taki maira i te asini, e te punua katoa, tuku iora i to raua kakau ki rungao i nga asini ra, akanoo iora iaia ki rungao.

8 E aronga maata oki tei toatoa i to ratou kakau i te arataa; tipu atura oki tetai papaki i te rara rakau, ārikiriki atura i te ara.

9 Te kapiki ua maira te tangata tini tei aere ana na mua, e tei aru mai na muri, na ko maira, Hosana i te Tamaiti a Davida; Kia ora aia, ko tei aere mai ma te ingoa o Iehova; Hosana i te rangi teitei.

10 E tae atura aia ki roto i Ierusalema, keukeu iora to taua oire katoa ra, i te ui anga e, Koai teia?

11 Kua karanga atura taua aronga ra, Ko Iesu teia, te peroveta no Nazareta i Galilea ra.

12 Aere aturā Iesu ki roto i te iero o te Atua, kua tuaru atura ki vao te aronga i oko atu e i oko mai i roto i te iero ra, tatipoki atura oki i te au papa o te aronga oko moni ra, e te au nooanga o te aronga i oko i te kukupa,

13 Kua karanga atura kia ratou, Kua oti oki i te tataia, “E karangaia toku are, e are pure anga;” kua akariroia io nei ra e kotou ei “ana no te aronga keia.”

14 Kua aere maira te matapo, e te pirikoki, ki roto i te iero ra kiaia; kua akaora atura aia ia ratou.

15 E kia akara mai te kau taunga nunui e te au tata tuatua i te au ravenga tu ke tana i rave ra, e te tamariki i roto i te iero i te kapiki anga, e te na ko anga e, Hosana i te tamaiti a Davida; makitakita rava akera ratou,

16 E kua tuatua maira kiaia, Te kite na koe i ta ratou e tuatua nei? Kua karanga aturā Iesu, A: kare kotou i tatau ra, “I rauka ia koe te akameitaki no roto i te vaa o te tamariki meangiti e te kai u?”

17 Vaio atura aia ia ratou, aere atura aia ki vao i taua oire ra ki Betania; moe atura ki reira.

18 E popongi akera, i tona oki anga mai ki te oire, kua pongi aia.

19 Akara akera aia i tetai suke tei te pae arataa, aere atura aia ki taua suke ra, kare e kai i kitea o runga, ko te rau anake ra, kua karanga atura aia, Auraka rava e kai i runga ia koe na e tuatau ua atu. Mae takiri akera taua suke ra i reira ra.

20 E kia akara akera te au pipi ra, va ua atura, na ko atura, Peretaia akenei kia mae vave teianei suke!

21 Kua karanga aturā Iesu, na ko atura kia ratou, Koia mou taku e karanga atu kia kotou nei, Ei akarongo ekoko kore to kotou, kare tei raveia i teianei suke anake ra ta kotou e rave, kia karanga atura kotou ki teianei maunga, Kia kiritiia koe, e kia titiriia koe ki raro i te tai, e tika ïa:

22 E te au mea katoa, ta kotou e pati atu i te pure, ma te akarongo, ka rauka ïa ia kotou.

23 E tae maira aia ki roto i te iero, kua aere maira te kau taunga nunui, e te aronga pakari, i vaitata iaia i tana apii anga, na ko maira, Koai te tumu i rave ei koe i teianei au mea? e naai i oronga mai i teianei mana ia koe nei?

24 Kua karanga aturā Iesu, na ko atura, E ui katoa anga taku ia kotou e, kia akakite mai kotou kiaku, e akakite katoa atu au kia kotou i te tumu i rave ei au i taua au mea nei.

25 Noea te bapetizo a Ioane nei? no te rangi mai aina? e na te tangata aina? Kua eumiumi iora ratou ratou uaorai, na ko akera, Kia karanga atu tatou, No te rangi mai; e riro aia i te tuatua mai, Eaa iora kotou i kore ei i akarongo iaia?

26 E kia tuatua oki tatou, Na te tangata; te mataku nei tatou i te tangata; te manako ra te tangata katoa e, e perovetā Ioane.

27 Kua tuatua maira ratou kia Iesu, na ko maira, Kare matou i kite. Kua karanga atura aia kia ratou, Kare katoa au e akakite atu kia kotou i te tumu i rave ei au i taua au mea nei.

28 Eaa ra to kotou manako? Ko tetai tangata toko rua ana puke tamariki tamaroa, kua aere atura aia ki te tama mua, e kua karanga atura, E tama, ka aere koe akonei e angaanga ki roto i taku kainga vine.

29 Kua tuatua maira aia, na ko maira, Kare au e ano: e muri ake, tataraara iora, aere atura.

30 Aere katoa atura aia ki te teina, e kua akapera katoa atura. Kua tuatua maira aia, na ko maira, E aere au, e taku pu; e kare i tae.

31 Koai ia raua i akono i te inangaro o to raua metua ra? Kua na ko maira ratou, Ko te tama mua. Kua karanga aturā Iesu kia ratou, Koia mou taku e karanga atu kia kotou, Ko te au telona, e te au vaine akaturi, te ka o ana ki roto i te basileia o te Atua ra ia kotou.

32 I aere mai oki a Ioane ia kotou nei ma te tuatua-tika, e kare akenei kotou i akarongo atu iaia; te aronga telona ra, e te au vaine akaturi, kua akarongo ratou iaia: kotou ra, kite ua rai i te reira, kare kotou i tataraara, ka akarongo atu ei iaia.

33 Ka akarongo mairai i tetai parabole; Kua tanu tetai tangata kainga i te kainga vine, kua akapini ki te koro, ko iora i te taomianga vine i roto, akatu iora i te are tapapa anga, tuku atura ki te aronga unga, aere atura ki te enua mamao:

34 E vaitata akera te tuatau vine ra, kua tono maira aia i tona au tavini ki te aronga unga ra, kia o mai ratou i te kai o te reira ra.

35 Kua opu iora te aronga unga i te au tavini nona ra, kua pāpā iora i tetai, kua tamate rava i tetai, kua peî oki tetai ki te toka.

36 Kua tono akaou maira oki aia i tetai aronga tavini ke, e rai ïa i tei muatangana; e kua akapera katoaia ratou.

37 E i te openga iora, kua tono atura aia i tana uaorai tamaiti, na ko akera, Ka riro ratou i te oo mai i taku tamaiti.

38 Kia akara maira te aronga unga i te tamaiti, kua tuatua iora ratou ratou uaorai, Ko te tangata kainga teia: e aere mai, ka ta tatou iaia, ka tāpu ei i tona kainga.

39 Kua opu maira ratou iaia, kika atura ki vao i taua kainga vine ra, tamate rava atura iaia.

40 E kia aere maira te pu o taua kainga vine ra, ka akapeea maira aia i taua aronga unga ra?

41 Kua na ko maira ratou, E tamate rava aia i te reira aronga tangata kikino i te mate maata rava, ka tuku atu ei i te kainga vine ki tetai aronga unga ke, te ka apai mai iaia i te kai i te tuatau tikai.

42 Kua karanga aturā Iesu kia ratou, Kare kotou i tatau i tei tataia ra e, “Ko te toka i akarukeia e te aronga patu are ra, ko tei akariroia ei toka tiavā: na te Atu teia i rave, e te akara atu nei tatou ma te umere?”

43 E teianei, e karanga atu au kia kotou, E apai keia te basileia o te Atua nei ia kotou, e tukuia atu ki te aronga e akaua mai i te ua ra.

44 Ko te inga ki rungao i taua toka ra, e paruparu ïa; kareka te topaia e taua toka ra, e ungaungātiti rava ïa.

45 E kia akarongo te kau taunga nunui ra, e te au Pharisea, i tana au parabole, kua kite oki ratou e, ko ratou tana i tuatua ra.

46 Kua inangaro ratou i te opu atua iaia, mataku iora i te tangata tini, no te mea e peroveta aia i to ratou manako.