Ezekiela

3 KUA tuatua maira oki aia kiaku, E te tamaiti a te tangata na, ka kai i tei kitea e koe ra, ka kai i teianei pokaikai, ka aere ei ka tuatuaʼi ki te ngutuare o Iseraela.

2 Kua akaamama atura au i toku vaa, e kua akaangai maira aia iaku i taua pokaikai ra.

3 Kua tuatua maira oki aia kiaku, E te tamaiti a te tangata na, kia keingaia e to kopu, e ka akaki i to ngakau ki teianei pokaikai, taku e o atu kia koe ra. Kua kai iora au; e mei te meli te tu i toku nei vaa i te venereka.

4 E kua tuatua maira aia kiaku, E te tamaiti a te tangata na, ka tu koe ka aere ki te ngutuare o Iseraela, ka karanga atu ei i taku nei au tuatua kia ratou.

5 Kare oki koe i tonokia atu ki te aronga tuatua ke ke, e te reo mārokiakia, ki te ngutuare ra o Iseraela:

6 Kare oki ki te au tangata e manganui ma te tuatua ke ke, e te reo mārokiakia, tei kore i kitea e koe ta ratou au tuatua. Angairi au i tono atu ia koe kia ratou ra, kua akarongo mai ana ïa ia koe.

7 Kare ra te ngutuare o Iseraela e akarongo mai ia koe; kare oki ratou e akarongo mai iaku ra: kua uouomatoa anake ra oki te ngutuare o Iseraela, e te ngakau mārokiakia.

8 I na, kua akamaroiroi au i toou na mata i to ratou au mata, e toou rae kia maroiroi i to ratou au rae.

9 Mei te daimani ra, ketaketa maata tona i to te toka tama ra, toou ïa rae i te akapakari angaia e au ra: auraka e mataku, auraka oki e kakaravi i to ratou mata, e ngutuare meameaau oki ratou.

10 E kua tuatua maira aia kiaku, E te tamaiti a te tangata na, ko te au tuatua katoa naku, taku e karanga atu kia koe ra; ka āriki mai i roto i to ngakau na, e akarongo mai oki to taringa.

11 Ka tu koe ka aere ki te aronga tuikaa ra, ki te au tamariki o to au tangata na, ka karanga atu ei kia ratou, ka akakite atu ei kia ratou, Te na ko maira te Atu ra ko Iehova, to ratou akarongo anga e te kore anga.

12 Kua apai akera te Vaerua iaku, ki runga, e kua akarongo atura au i te reo ngaueue maata i muri ake iaku, i te na ko anga, Kia akameitakiia te kakā o Iehova mei tona ngai atu.

13 Akarongo katoa atura au i te aruru peau o nga mea ora ra, tei tukia ki tetai ki tetai, e te aruru o nga porotata i vaitata iora, e te aruru o te mea ngaueue maataia ra.

14 Kua apai akera te Vaerua iaku ki runga, e kua apai ke atura iaku, aere atura au ma te mamae e te kinokino o toku ngakau; te ririnui maira te rima o Iehova ki runga iaku nei.

15 Tae atura au ki taua aronga tuikaa ra i Tela-abiba, ko tei noo ki te pae vai ra ko Kebara, noo atura au i te ngai ta ratou i noo ra; noo atura au i rotopu ia ratou ma te rere te mauri, e po itu akera.

16 E ope akera aua nga po e itu ra, i tae mai ei te tuatua a Iehova iaku nei, na ko maira,

17 E te tamaiti a te tangata na, kua akariro au ia koe ei tiaki ki te ngutuare o Iseraela nei: e teianei e akarongo mai koe i te tuatua i toku nei vaa, e na ko nei atu koe iaku nei i te ako ia ratou.

18 Kia tuatua oki au ki te tangata kino ra, E mate tikai koe, e kare koe e ako atu, e kare e karanga atu ei ako anga atu, i te tangata kino i tona ra aerenga kino, e kia ora aia ra; e mate atura taua tangata kino ra i tana ra ara; e umuumu maira au i tona toto ia koe ra.

19 Kia ako ra koe i te tangata kino ra, e kare aia i ariu mai i tona ra kino, e i te aerenga kino nona ra, ka mate aia i tana ra ara, kua akaora ra koe ia koe uaorai.

20 E te tangata tuatua-tika ra, kia ariu maira i tana ra tuatua-tika, e kua rave iora i te ara, e kua tuku au i te turorianga ki mua iaia ra, e mate iora aia, no te mea kare koe i ako atu iaia; ka mate ïa aia i tana ra ara, e kare e manakoia te tuatua-tika i raveia e ia ra; e umuumu maira au i tona toto ia koe ra.

21 Kia ako ra koe i te tangata tuatua-tika, kia kore te tangata tuatua-tika e rave i te ara ra, e kare akera aia e rave i te ara ra, ka ora ïa aia, no te mea kua akoia aia: kua ora katoa oki koe ia koe uaorai.

22 Tei runga maira te rima o Iehova iaku i reira; e kua tuatua maira kiaku, Ka tu, ka aere ki te ngai mataataa, ei reira au e karangaranga atu ei kia koe.

23 Kua tu akera au, e kua aere ki te ngai mataataa ra: e i na; te tu ua maira te kakā o Iehova i reira mei te kakā taku i kite i te vai ra i Kebara: e kua inga iora au ki raro te mata.

24 Kua tomo maira te Vaerua ki roto iaku i reira, e kua akatu maira iaku i toku vaevae, e kua tuatua maira aia iaku, na ko maira, Ka aere, ka popani ia koe uaorai ki roto i to are na.

25 E ko koe oki, e te tamaiti a te tangata na, i na, ka tuku ratou i te ruru ki runga ia koe, e ka ruruia koe i te reira, e auraka koe e tae ki vao i rotopu ia ratou ra:

26 E naku e topiri i to arero i to tanga i runga ra, e ka riro koe ei murare, kia kore koe e ako atu ia ratou ra; e ngutuare meameaau oki ratou.

27 Kia tuatua atura au kia koe ra, naku e kiriti i to vaa, e naau e karanga atu kia ratou, Te na ko maira te Atu ra ko Iehova; Ko tei akarongo ra, vaoo kia akarongo ua maira: ko tei kore ra, vaoo ïa kia kore ua ra: e ngutuare meameaau oki ratou.