Salamo

64 ME pure au ra, e te Atua, e akarongo mai i toku reo: ei marumaru koe noku i te mataku i te enemi.

2 E akapipini koe iaku i te tuatua muna a te aronga kino ra, te oripu ua anga a te aronga rave i te mea tika kore ra;

3 Ko tei akakoi i to ratou arero mei te koke ra; e kua akatano i ta ratou au kakao, koia te tuatua mamae ra;

4 Kia akainana poiri ratou i te aronga apa kore ra: kare e mamia te akainana ra ratou, kare i mataku:

5 Te maroiroi ra ratou ia ratou uaorai i taua ravenga kino nei; te akaeatu marie ra ratou i te uuna anga i ta ratou au ereere; kua tuatua ratou, Kitea teia iaai?

6 Te kimi ra ratou i te tuatua kikino, te na ko ra, Kua rauka tikai ta matou i akakoro: e mea oonu te ngakau e te manako i roto ia ratou ravarai.

7 Na te Atua ra e akainana i te kakao ia ratou: puta iora ratou kare e roaia.

8 Ka iri ta ratou arero ki runga ia ratou uaorai; e te aronga katoa i akara mai ia ratou ra, ka rere ke ïa.

9 Ei reira te tangata katoa ra ka mataku ei, e ka akakite i te angaanga a te Atua, ka akono marie oki ratou i tana ravenga.

10 Ka rekareka te aronga tuatua-tika ra ia Iehova, e ka irinaki iaia; e te aronga katoa i tiratiratu te ngakau ra, ka akatietie ratou.