Deuteronomi

26 E KIA tae koe ki runga i te enua ta to Atua ra ta Iehova e oronga mai noou ei nooanga, e kua rauka ia koe, e te noo ra koe i reira ra;

2 Ei reira koe ka rave ei i te popo o te au ua ravarai o te enua, ko taau ïa e apai no toou ra enua ta to Atua ra ta Iehova e oronga mai noou ra, ka tuku ei ki roto i te kete, ka aere ei ki te ngai i akonoia e to Atua ra e Iehova ei vairanga no tona ra ingoa.

3 E aere tika atu oki ki te taunga i te reira tuatau, ka karanga atu ei kiaia e, Te akakite nei au ki to Atua ra kia Iehova i teianei rā, e tei te enua mai nei au ta Iehova i taputou mai ki to tatou ai metua ra e, e oronga mai aia no tatou nei.

4 E na te taunga e rave mai i te kete i to rima ra, ka tuku ei ki raro ki mua i te atarau a to Atua ra a Iehova.

5 E naau e karanga atu, e na ko atu koe ki mua i te aroaro o to Atua ra o Iehova, E ngati Arama koka aere ua toku metua tane, aere atura oki aia ki Aiphiti, tuitarere ua atura i reira kare ua i matutuanga ra; e riro atura aia ei enua tangata maata, e te maroiroi, e te tangata manganui i reira:

6 E kua takinga-kino mai to Aiphiti ia tatou, e kua akaao mai ia tatou, e kua tinai-mate mai ia tatou i te angaanga maata:

7 E kia kapiki tatou ki te Atua o to tatou ai metua ra kia Iehova, kua akarongo mai a Iehova i to tatou reo, e kua akara maira i to tatou mate, e ta tatou angaanga, e to tatou tinai-mate angaia ra:

8 E kua arataki mai oki a Iehova ia tatou mei Aiphiti mai i te ravenga marōrō, e ma te rima akatikaia ra, e te mea mataku maataia ra, e te akairo, e te ravenga i vavaria ra:

9 E kua arataki mai oki aia ia tatou ki ko nei, e kua oronga mai i teianei enua no tatou, i te enua taʼe a vai ua te u e te meli nei:

10 E teianei, i na, i apai mai nei au i te popo o taua enua nei, taau, e Iehova, i oronga mai noku nei. E ka tuku atu koe i te reira ki mua i te aroaro o to Atua ra o Iehova: ka akamori ei ki mua i te aroaro. o to Atua ra o Iehova:

11 E ka rekareka koe i te au meitaki ravarai ta to Atua ta Iehova i o mai noou, e no to ngutuare ra, ko koe, e te ngati Levi, e te tangata ke e noo i o ou ra.

12 Kua akangauruia e koe te au ngauru-anga ravarai o taau ra apinga no te mataiti toru ra, (ko te mataiti ngauruanga ïa,) e kua apaiia e koe na te ngati Levi, na te tangata ke, na te matiroeroe, e na te vaine takaua, i roto i to au oire, kia kai ratou e kia merengo;

13 Ei reira koe e tuatuaʼi ki mua i te aroaro o to Atua ra o Iehova, Kua akataka keia e au te au mea tapu i toku ra are, e kua orongaia e au tei te ngati Levi, e tei te tangata ke, e tei te matiroeroe, e tei te vaine takaua, mei te au akauenga ravarai taau i akaue mai kiaku ra; kare au i tatipake i taau au akauenga, kare oki i ngaropoina iaku:

14 Kare au i kai i te reira i te aue anga noku; kare oki au i apai ua atu i tetai ngai no tetai peu tapu kore ra, e kare rava oki i orongaia no te peu kia mate te tangata ra: kua akarongo ra au i te reo o toku Atua ra ko Iehova, e kua rave au i te au mea katoa taau i akaue mai iaku ra:

15 Ka akara mai koe ki raro i toou na nooanga tapu, i runga i te rangi ra, e akameitaki i toou nei tangata ia Iseraela nei, e te enua taau i oronga mai no matou, taau oki i taputou mai ki to matou ai metua ra; i te enua e taʼe a vai ua te u e te meli nei.

16 Te akaue nei to Atua ra ko Iehova ia koe i teianei rā e, ka rave i teianei rā e, ka rave i teianei au akonoanga e te au tuatua-tau: e teianei e akono koe, e e rave i te reira ma to ngakau katoa, e to vaerua katoa.

17 Kua akakite pu koe i nakonei e, ko Iehova toou Atua, e aere oki koe na tona arataa, e akono oki i tana au akonoanga, e tana ra au akauenga, e tana ra au tuatua-tau, e e akarongo i tona reo:

18 E kua akakite pu oki a Iehova i teianei rā e, ko koe tona tangata tikai, i tana oki i tuatua mai kia koe ra: e kia akono koe i tana ra au akauenga e ope rava ake;

19 E akateitei aia ia koe i reira ki runga i te pa enua ravarai tana i anga ra, i te akameitaki angaia, e te rongo, e te akangateitei; e kia riro koe ei iti-tangata tapu no to Atua ra no Iehova, tana oki i tuatua maira.