Iosua

16 E TE kelero a te tamariki a Iosepha ra kua taka ïa; ta ratou tuanga ko Ioridana ïa i vaitata i Ieriko ra, e tae ua atu ki te vai i Ieriko, i te pae i te itinga o te rā ra, ki te medebara, tei mei Ieriko maira aere ua atura na runga i te maunga ra ko Betela;

2 E mei Betela oki, aere tika atura ki Luza, e tae rava atura i vaitata ki Areki-atarota,

3 E kanokano atura oki ki te pae i te opunga o te rā e vaitata ki Iapheleti e tae ua atura ki te kotinga o Bete-horona i raro, e ki Gezera; e mama atura ki taatai.

4 Tei reira ta te tamariki a Iosepha ra tuanga, ta Manase e ta Epheraima.

5 Teia ta te tamariki a Epheraima ra kotinga, i to ratou au kopu-tangata: Aere katoa atura te kotinga o ta ratou tuanga na Atarota-adara, ki te pae i te itinga o te rā ra, e tae ua atura ki Bete-horona i runga;

6 E kanokano atura taua kotinga ra ki te tai maata ra na Mikameta i te pae i apatokerau, e mei reira oki, takanimo ua iora taua kotinga ra i te pae i te itinga o te rā, e tae ua atura ki Taanata-silo, e aere ua atura ki te pae i te itinga o te rā ra e tae atura ki Ianoa.

7 E mei Ianoa oki aere ua atura ki raro ki Atarota, e ki Naarata, e aere roa maira ki Ieriko, e tae tika atura ki Ioridana.

8 E mei Tapua mai aere tika atura taua kotinga ra ki te pae i te opunga o te rā ra e tae atura ki te kauvai rai ko Kana; e mama tika atura ki te tai maata ra. Ko te tuanga ïa a te kopu a te tamariki a Epheraima i to ratou kopu-tangata.

9 E te au oire katoa ta te tamariki a Epheraima i rauka i roto katoa i te tuanga a te tamariki a Manase ra, te au oire e to reira au vila.

10 Kare rava ra te ngati Kanaana i noo i Gezera i eke ia ratou: i noo ei te ngati Kanaana i rotopu katoa i te ngati Epheraima i teianei rai rā, e noo tavini ra ma te tautaūnga.