Iosua

17 E TUANGA katoa oki ta te kopu o Manase ra; ko ta Iosepha ïa tama mua aia; na Makira, na te tama mua a Manase ra, te metua o Gileada ra: no te mea e tangata toa aia i raukaʼi iaia Gileada e Basana.

2 Te vai ra ra tetai tuanga na tetai pae tamariki a Manase, i to ratou au kopu-tangata; i ta te tamariki a Abiezera, e ta te tamariki a Heleka, e ta te tamariki a Aseriela, e ta te tamariki a Sekema, e ta te tamariki a Hephera, e ta te tamariki a Semida; ko nga tamariki tamaroa ïa na Manase te tamaiti a Iosepha ra, i to ratou au kopu-tangata.

3 Karekā Zelophehada te tamaiti a Hephera, te tamaiti a Gileada, te tamaiti a Makira, te tamaiti a Manase ra, kare ana e tamaroa, e tamaine ra: e teia oki te ingoa o taua au tamaine nana ra, ko Mahala, e ko Noa, e ko Hogela, e ko Mileka, e ko Tireza.

4 Kua aere maira ratou ki mua ia Eleazara taunga ra, e ia Iosua te tamaiti a Nuna ra, e te au mataiapo ra, tuatua maira, Kua akaue mai a Iehova ia Mose e oronga mai i tetai tuanga na matou i roto i to matou ai taeake. Kua orongaia atura tetai tuanga na ratou i rotopu katoa i ta te au taeake o to ratou metua, ta Iehova i akaue maira.

5 Okotai ngauru ta Manase ra tuanga i rauka, e tuanga ke rai te enua ra ko Gileada e Basana, i tetai pae Ioridana ra;

6 No te mea e tuanga ta te uanga tamaine a Manase i roto katoa i te tuanga a tana au uanga tamaroa ra, kareka tetai pae tamariki a Manase ra, ko te enua ra ko Gileada ta ratou.

7 E to Manase ra kotinga, ko Asera ïa e ki Mikemeta i vaitata i Sekema; aere ua atura taua kotinga ra ki o to Eni-Tapua ra na te pae katau ra.

8 No Manase oki te enua i Tapua; kareka Tapua i te kotinga o Manase ra, no te tamariki a Epheraima ïa.

9 E mei reira oki eke atura taua kotinga ki raro ki te kauvai ra ko Kana, tei tetai pae i apatonga i taua kauvai ra, te iropu ua ra te au oire o Epheraima e te au oire o Manase ra; tei te pae i apatokerau i taua kauvai ra taua kotinga o Manase ra, e mama atura ïa te kotinga ki te tai maata ra.

10 Te pae i apatonga ra, no Epheraima ïa, no Manase te pae i apatokerau, ko te tai maata ra to raua kotinga: e kua ue roa atura raua kia Asera i te pae i apatokerau, e kia Isakara ra i te pae i te itinga o te rā ra.

11 E ta Manase i roto i ta Isakara ra, e i roto i ta Asera ra, ko Bete-seana ïa e ona puke vila, e ko Ibeleama e ona puke vila, e to Dora e to reira puke vila, e to Eni-dora e to reira puke vila, e to Taanaka e to reira puke vila, e to Megido e to reira puke vila, e toru tapere.

12 Kare ra i eke to te reira au oire i te tamariki a Manase; kua noo ra te ngati Kanaana i taua enua ra.

13 Kia maroiroi ra te tamariki a Iseraela ra, kua akariro ratou i te ngati Kanaana ei tavini; kare ra i tuaru ke atu ia ratou.

14 Kua tuatua maira te tamariki a Iosepha kia Iosua, na ko maira, Eaa koe i tataki tai mai ei i ta matou tuanga e okotai o matou ngai kia noo, e e aronga maata oki matou, no te mea kua akameitaki a Iehova ia matou e teia noaʼi?

15 Kua karanga aturā Iosua kia ratou, E aronga maata kotou ra, e te iti ra te maunga ra ko Epheraima ia kotou; ka aere ki te ngai akaruke ua ra, ka vaere ei ei ngai no kotou uaorai; tera ake te tapere o te Perizi, e to te roangarere.

16 Kua tuatua maira te tamariki a Iosepha ra, Kare e rava taua maunga ra ia matou; e te au ngati Kanaana ravarai e noo i te tapere i raro ake, e kariota auri to ratou; ko tei noo i Bete-seana e ona puke vila, e tei noo i te o ra ko Iezereela.

17 Kua karanga aturā Iosua ki te ngutuare o Iosepha, kia Epheraima, e kia Manase ra, na ko atura, E aronga maata kotou, e te ririnui oki to kotou, auraka ta kotou ei tuanga okotai ua ra:

18 No kotou ra te maunga ra; e rakau uaorai te rakau, ka marae rai ia kotou; e to te pae katoa o taua maunga ra, no kotou ïa; e kariota auri uaorai ta ratou, e maroiroi uaorai ratou, ka eke rai te ngati Kanaana ia kotou.