E Peʼe na Solomona

7 Te manea o to vaevae, i roto i te tamaka ra, e teianei tamaine ariki e! Mei te poe ra te paupauanga o nga ūā noou ra, i angaia e te rima karape meitaki ra.

2 To pito ra, mei te kapu taviri meitakiia ra, i ki i te wina irokia ra: to kopu ra, e tau ïa ki te putunga sitona ra, i akapiniia ki te lili ra.

3 Nga u noou, e tau ïa ki nga aili ou e rua, o maanga ra.

4 To kaki ra, e tau ïa ki te punanga nio elephana; to mata ra, mei nga vai vairanga ika i Hesebona ra, i te pae ngutupa ki Bete-rabimi; to putaiu ra, mei te punanga i Lebanona, i anga tika mai ki Damaseko ra.

5 To upoko i runga ia koe ra, e tau ïa kia Karamela; e to au putiki ra, mei te purapura ïa; e kua mou te ariki ki roto i te au makave ra.

6 Toou oki tu i te manea, e te meitaki e, e taku akaperepere e, kia meitaki!

7 Toou ra teitei, e tau ïa ki te rakau ra e nu tamara, e nga u noou ra, e tau ïa ki te kaui vine ra.

8 Kua na ko akera au, E kake au ki taua nu tamara nei, e mou au ki tona kikau: koia rai ïa, e riro to u mei te au kaui vine ra, e te aunga o to aʼo ra, mei te lemoni ïa;

9 E to vaa ra, mei te wina meitaki ra ïa, na taku akaperepere, tei topa meitaki ua ki raro ra, tei tere ua na roto i te vaa o tei moe ua ra.

10 No taku akaperepere au nei, e tei iaku nei tona inangaro.

11 E aere mai, e taku akaperepere e, ka aere taua ki roto i te kainga ra: ei roto i te au vila taua noo ei.

12 Ei te popongi roa taua ka aere ei ki te au kainga vine ra; e akara taua i te vine i te ruperupe anga, te vine ou i te ua anga, e te remuna i te pua angaia: ei reira au e akakite atu ei ia koe i toku nei inangaro.

13 Te aunga maira te au ua poroiti, e tei to tatou au ngutupa te au kai memeitaki katoa ra: te mea ou e te mea taito, kua vaooia e au naau, e taku akaperepere e.