Salamo

17 E AKARONGO mai i te tika, e Iehova, e akono mai koe i taku e kapiki nei; e akarongo mai i taku pure no roto i te vaa pikikaa kore.

2 Ko koe uaorai te tuku mai i te tuatua-tau iaku nei; na to mata e akara i tei tiratiratu.

3 Kua timata koe i toku ngakau; kua atoro mai koe iaku i te po; kua timata koe iaku, e kare ua i kitea e koe ra; kua akakoro au e, auraka toku vaa e tatipake.

4 Kareka i ta te tangata nei ravenga, no te tuatua a to vaa, i matakite ei au i te au aerenga o te ta tangata ra.

5 E turu mai koe i toku aerenga i toou na au arataa, kia kore e paeke oku puke vaevae.

6 Te kapiki nei au ia koe, ka akarongo mairai koe iaku, e te Atua; e ariu mai to taringa iaku nei, e akarongo mai i taku tuatua.

7 E akakite i to aroa takinga-meitaki i vavaria ra, e tei akaora i to rima katau te aronga i irinaki ia koe, i tei tu mai ki runga e māro mai ia ratou.

8 Tiaki mai koe iaku mei te koringo-mata ra; e uuna iaku i raro ake i to maru peau ra.

9 I te aronga kino ko tei takinga-kino mai iaku nei, i toku au enemi e akapini mai iaku nei e ta.

10 Kua pini ratou i to ratou uaorai tongaua: te tuatua nengonengo maira to ratou vaa.

11 To matou arataa kua akapiniia e ratou i teianei; te tiroi matariki maira kia akatiraa ia matou ki raro i te one:

12 Mei te liona i rapurapu i tana kai; e mei te liona ou e pipini i te ngai ngaro ra.

13 Ka tu, e Iehova, e akangere atu aia, e taakaaka atu, kia ora toku vaerua i te tangata kino, i te koke naau ra:

14 I te rima noou, e Iehova, i te reira papaki tangata, te tangata o teianei ao, tei te ora anga nei ta ratou tuanga; tei akakiia to ratou kopu e koe ki to apinga ngaro: kua mareka ta ratou au tamariki; e te vaooia nei te toenga o ta ratou apinga na ta ratou tamariki mea riki ra.

15 Kareka au nei, ka kite au i to mata ma te tuatua-tika; kia ara au ra, ka mareka rai au i toku tau anga atu kia koe.