Maseli

7 E TAKU tamaiti, e akono mai i taku nei tuatua, e vaoo marie oki i taku nei au akauenga ki ko na kia koe na.

2 E akono i taku nei au akauenga, e ora ïa koe; e taku nei ture mei to koringa-mata ra.

3 E ri ki runga i o maikao-rima ra, e tata ki runga i te papa ra o to ngakau na.

4 E karanga atu koe ki te pakari ra, Ko taku tuaine koe; e karanga koe ki te kite ra e, no toou ra ïa kopu-tangata;

5 Kia tāpu raua ia koe i te vaine ke, i te vaine ke ra e taparu tana tuatua.

6 Iaku i tu ua i te māramārama i toku ra are, kua akara atura au na roto i te kopekapeka māramārama noku ra;

7 Kite atura au i rotopu i te aronga kite kore ra; akara atura au i rotopu i te au tangata ou ra, i tetai tangata ou manako kore;

8 Te aere ua ra aia na te arataa i vaitatao i tona ngai; e te aere marie ra aia na te ara e tae atu ei ki tona are;

9 I te mareureu anga, i te aiai ra, e te poiri rava anga oki o te po ra:

10 E i na, kua aravei maira taua vaine ra iaia, e te kakau o te akaturi ra te kakau, e te pakari oki o te ngakau.

11 (E vaine tuatua maata, e te ako ngata, kare tona vaevae e mou i te ngutuare;

12 Roa iti ake tei te ngai atea, roa iti ake tei te arataa, e ei te au poo are ra aia e tapapa mai ei.)

13 Kua opu maira aia iaia, e kua ongi maira, kua na ko maira kiaia, ma te mata akama kore,

14 E atinga au tei iaku; i apai ana au i te tia naku i teianei rā.

15 I aere mai ei au kia aravei atu ia koe ra, e kimi marie ia koe, e kua kitea atura koe e au.

16 Kua akamanea au i taku roi ki te mea manea, i te āriki roi, i te kakau meitaki no Aiphiti ra.

17 Kua takakara au i taku roi ki te mura, te aloe, e te kinamo.

18 E aere mai taua, e akaope rava i te inangaro e ao ua ake: taua e akanavenave marie ki runga ia taua uaorai.

19 Kare ra oki taku tane ki te ngutuare, kua aere ki te ara mamao.

20 Kua tao i ite pute ario i te rima: kia tae ki te marama ou aia e oki mai ei ki te ngutuare.

21 No te rai o tana ra tuatua koperepere ua, vare ua atura aia; no te akarekareka maata o tona vaa, riro atura aia.

22 Aru ua atura aia i reira ra, mei te puakatoro e aere ki te tainga ra, e mei te kanga i tapekaia ra ki te pāpā anga.

23 E puta ua atura tona ate ki te ko; mei te manu e rere ki te ereere ra, kare oki i kite e, kia mate aia i tukuiaʼi.

24 E tenana, e te au tamariki, e akarongo mai iaku i teianei, e akono mai i te tuatua i toku nei vaa.

25 Auraka rava to ngakau e tapae ua atu i tona ra arataa; auraka koe e aere ke na tona ra au mataara.

26 E manganui te inga iaia ma te paruparu: e aronga maroiroi rai e manganui tei mate takiri iaia.

27 Tei te arataa e tae ei ki te vaarua ra tona are, e tae rava atu ki raro ki te vairanga o te mate ra.