Iobu

40 KUA tuatua mairai a Iehova kia Iobu, na ko maira,

2 E tika ainei i tei māro mai ki te Mana katoatoa kia apii mai iaia? na tei ako mai i te Atua ra, e tuatua mai.

3 Kua karanga aturā Iobu kia Iehova, na ko atura,

4 I na, e viivii toku! e akapeea atu au ia koe? E tapoki ana au i toku vaa ki toku rima.

5 Okotai akenei aku tuatua anga; kare ra au e tuatua akaou: ka rua akenei; kare ra au e māro.

6 Kua tuatua mairā Iehova kia Iobu na roto i te puaioio, na ko maira,

7 Ka tatua na i to taukupu e akatangata tikai: ka ui ana au ia koe; e naau e tuatua mai iaku.

8 E akakore katoa ainei koe i taku ra tuatua-tau? E akaapa mai ainei koe iaku, kia akatikaia koe?

9 Kua aite ainei toou rima ki to te Atua? e kua aite ainei toou reo mangungu ki tona?

10 Ka akamanea ia koe uaorai i tenana ki te mekameka, e te ngateitei; ka akakakau ia koe uaorai ki te kakā, e te meitaki.

11 Ka tuku ana i te otooto anga o to riri: ka akara i tei nengonengo, ka taakaaka atu ei.

12 Ka akara i tei nengonengo, ka tuku ei ki raro: e ka takatakai i te aronga kino ki raro i to ratou ngai.

13 E uuna katoatoa atu ia ratou i raro i te one-pueu; e tapoki i to ratou mata i te ngai ngaro.

14 Ei reira au e aaki atu ei kia koe e, e ora koe i toou uaorai rima katau.

15 I na oki te Behemota, taku i anga ma koe katoa na; e ngangaere tana i kai mei ta te puakatoro ra.

16 I na tei tona taukupu tona maroiroi, e tona ririnui tei nga uaua ïa o tona kopu.

17 Kua akatika aia i tona iku mei te arezi; e te au uaua o tona ūā, kua taviriviri katoaia ïa.

18 E tau tona au ivi ki nga potonga veo pakari: e tau tona au ivi ki te auri katoatoa.

19 Ko tei maata ïa i te au angaanga a te Atua: e tika i Tei anga iaia i te akatae atu i tana koke kiaia.

20 Kua riro oki na te au maunga i akatupu mai i tana kai, e tei reira te au puaka katoa o te enua i te kanga aere anga.

21 Ei raro ake i te rakau marumaru tona moe anga, i roto i te rarokakao, e te ngai vai.

22 Na te rakau marumaru i tapoki iaia ki to ratou marumaru; e kua akapiniia aia i te rakau akaevaeva o te kauvai ra.

23 I na, kia puke ua mai te vai ra, kare aia e rapurapu; kare aia e taitaia, kia viviki ua maira Ioridana ki tona vaa.

24 Naai aia e rave ki mua i ona mata, ka tuikau ei i tona putaiu ki te matau?