Iobu

19 KUA tuatua mairā Iobu, na ko maira,

2 Mei te aa ra te roa o tenana akaongoongo anga mai i toku vaerua, e e atiati ei kotou iaku i tenana au tuatua?

3 Kua ngauru akenei a kotou akakino anga mai iaku: e kare ua kotou i akama ko kotou i akapoturi ua mai iaku.

4 I tatipake ua rai au, tei iaku uaorai taku tatipake te vairanga.

5 Kia inangaro kotou i te akateitei ki runga iaku, e akakite iaku i toku kino:

6 Kia kite maira kotou, ko te Atua tei taakaaka mai iaku, e nana au nei i akapini i tana kupenga.

7 I na, te kapiki nei au i te takinga-kino, kare ra au i akarongoia mai: te kapiki nui nei au, kare ra e tuatua-tau.

8 Kua taii aia i toku arataa kare au e tika kia aere, e kua tuku aia i te poiri ki runga i toku ra au mataara.

9 Kua kiriti aia i toku kakā i runga iaku nei, e kua rave aia i te korona i runga i toku upoko.

10 Kua akapou aia iaku e pini ua ake, e kua kore au nei: e kua kiriti tumuia toku manakonako anga mei te rakau ra.

11 Kua tutungi aia i tona riri ki runga iaku, e kua akariroia au e ia mei te au enemi nona.

12 Kua takiruru maira te au toa nona, e kua akāū i te arataa no ratou kiaku nei, e kua moetapapa e pini ua ake toku nei puakapa.

13 Kua akataka ke aia i toku ra au taeake kia atea ke iaku, e kua riro toku au taunga ei au tangata ke iaku nei.

14 Kua kore toku ra au tangata tupu, e kua akangaropoina toku aronga oa mātau iaku.

15 Tei noo i toku ra ngutuare, e toku ra au tavini vaine, tei tuatua iaku e e tangata ke: kua riro au e tangata ke i to ratou akara anga.

16 Kua kapiki atu au ki toku tavini tane, kare ra aia i ki mai: kua tuatua akarekareka atura toku vaa iaia.

17 Kua riro toku aʼo ei mea ke i taku vaine, aue ua rai au i taku uaorai au tamariki.

18 Kua akavaavaa mai oki te au tamariki mea riki iaku; kia tu au ki runga ra, kua tuatua kino mai ratou iaku.

19 Kua akaviivii mai toku au oa tumanava ravarai iaku; e te aronga taku i anoano ra, kua akatangata ke ratou iaku.

20 Te piri nei toku ivi ki toku kiri, e ki toku kiko, e kua ora io nei au ma toku kiri nio anake ra.

21 E aroa mai iaku, e aroa mai iaku, e taku au oa e; no te mea, ko te rima o te Atua tei akatukia mai iaku.

22 Eaa kotou i peraʼi i te aruaru iaku mei ta te Atua ra, e kare ainei kotou i mareka i toku kopapa nei?

23 Angairi taku nei au tuatua i tataia e? angairi i kokotiia ki runga i te papa e!

24 Ki te toi auri, e te tapou, i te kokoti angaia ki runga i te mato e tuatau ua atu!

25 Kua kite oki au e, te ora ra toku ra Akaora, e kia tae ki te openga ra ka tu mai ei aia ki runga i te enua nei:

26 E oti akera taku kiri, kua pou teianei kopapa, e kore oti taku tino, e akara rai au i te Atua:

27 Ka akara au uaorai iaia, ko toku ra mata, auraka to tetai ke ra, te akara; pou ua rai to roto roa iaku nei.

28 Kia karanga ra kotou e, E naea tatou kia takinga-kino iaia? kua kitea ï reira tetai tapepeanga na kotou iaku nei.

29 Kia mataku oki kotou i te mate koke: ko te koke oki ta te riri ra tutuki, kia kite kotou e te vai ra te akavaanga.