Iobu

35 KUA karanga atura oki a Eliu, na ko atura,

2 E mea tika ainei teia i toou na manako, taau i karanga ra e, Kua maata te tuatua-tika naku ra i ta te Atua?

3 Kua tuatua oki koe e, Eaa toku meitaki, e eaa taku puapinga, naringa kare au i rave i te ara?

4 Tera oki taku ngai tuatua e tuku atu kia koe, e to au oa katoa ki ko na kia koe na.

5 Ka nānā na koe ki te rangi, e ka akara; ka akara oki ki te au tiao rangi, e teitei maata ïa i toou.

6 Kia rave koe i te ara ra, kua aa oki koe kiaia? e te maata ra taau au ara, eaa taau i rave atu iaia?

7 E te tika ra taau tuatua, eaa taau e o atu nana? e eaa tana e rauka mai i to rima na?

8 Ko te tangata mei ia koe ra te ka kino i taau ra ara, e te tamaiti a te tangata te ka meitaki i taau ra tuatua-tika.

9 I te rai takinga-kino te akatupuia nei te aue i te tangata nei: te aue nei ratou i te rima o te aronga ririnui.

10 Kare ra tetai e tuatua e, Teiea te Atua tei anga iaku ra, ko tei oronga mai i te imene i te po ra?

11 E maata tana i apii ia tatou i ta te au puaka o te enua nei, e e pakari maata tana i o mai no tatou i to te au manu o te reva nei.

12 Te aue ua ra ratou i reira, kare ra aia i tuatua mai, no te nengonengo o te aronga kino.

13 Kare rava oki te Atua e akarongo i te pure puapinga kore, kare oki te Mana katoatoa e akono mai i te reira.

14 Tuatua ua rai koe e, kare koe e kite atu iaia; tei mua iaia te tuatua-tau: e tenana, e irinaki koe iaia.

15 I teianei ra, no te mea, e puapinga kore ua te tuku anga mai i tona riri, e kare aia i akara matariki mai i te ara:

16 I amama puapinga kore ua mai ei a Iobu i tona vaa; e kua akamaata aia i tana tuatua ma te kite kore.