Roma

9 E TUATUA-MOU oki taku i te Mesia ra, kare ua au i pikikaa, te akakite kapipiti mai nei te Vaerua Tapu e taku akavangakau iaku,

2 E e aue maata toku, e te mamae tukutuku kore i roto i toku ngakau.

3 E tika oki iaku kia taumaaia au i te Mesia ra, i taku au taeake i te akonoanga i te kopapa nei:

4 I te ngati Iseraela ra; no ratou oki te akatamarikianga, e te kakā, e te koreromotu ra, e te ture i orongaia ra, e te akamori anga, e tei karangaia maira;

5 No ratou oki te aronga tupuna, e no ratou oki te Mesia i te akonoanga i te kopapa, ko te Atua ïa i runga i te au mea katoatoa, nona te akameitaki mutu kore ra. Amene.

6 Kare rava oki e tika kia manako e kua kore te tuatua a te Atua. Kare oki te Iseraela katoatoa i ta Iseraela,

7 Kare oki ratou ravarai i te tamariki i te mea e uanga ratou no Aberahama; “Na roto i ta Isaaka te uanga i karangaia.”

8 Teia taua tuatua ra, Te tamariki a te kopapa nei, kare ratou i te tamariki na te Atua: ko te tamariki ra no te tuatua i karangaia maira, ko tei akonoia ei uanga.

9 Teia oki taua tuatua i karangaia maira, “Kia tae ki te tuatau tikai ra, e tae mai ei au, e e tamaitiia ta Sara.”

10 Kare oki e ko te reira anake ra, ka nui katoaʼi oki a Rebeka i tetai, i to tatou metua ra ia Isaaka;

11 Kare oki te tamariki i anau, kare oki i rave i te meitaki e te kino, kia tupu tei akonoia e te Atua i te iki anga ra, (eiaa e riro no te angaanga, nona ra no tei tuatua maira,)

12 I karangaia atu ei aia e “E tatomo te tuakana ki te teina:”

13 Mei tei tataia ra e, “I inangaro ra au ia Iakoba, kare ra au i inangaro ia Esau.”

14 E teianei, eaa ua ta tatou tuatua? E tuatua-tika kore aina ta te Atua? Auraka rava ïa.

15 Kua karanga oki aia kia Mose e, “Te aroa nei oki au i taku e anoano i te aroa, e te takinga-meitaki nei au i taku e anoano i te takinga-meitaki.”

16 E teianei, kare to te anoano, kare oki to te oro, no te Atua ra i aroa maira.

17 Te karanga ra oki te tuatua i tataia ra ia Pharao e, “No reira tika rai oki au i vaoo ei ia koe, ei akakite anga atu ia koe i toku nei mana, e kia akakiteia toku ingoa e pini ua ake te ao katoa nei.”

18 E te aroa nei aia ki tana i inangaro i te aroa, e tana i anoano i te akamāro ra, te akamāro nei ïa.

19 E tuatua mai aina koe kiaku e, Eaa oki aia i akakino mai ei? Koai oki tei akakore i tona inangaro?

20 Aua na ra, e tera ra tangata, koai koe e māro atu ki te Atua? E karanga atu aina te mea angaia ra ki tei anga mai iaia ra e, Eaa koe i peraʼi i te anga iaku nei?

21 Kare aina e tau i te potera kia anga i tetai āriki no te mea meitaki, e tetai no te mea kino, i te putunga karakaraea okotai nei?

22 Eaa oki te Atua, kia anoano i te akakite i tona riri, e kia kitea tona mana, i te akakoromaki anga roa i te au āriki no te riri i akatauia no te mate ra;

23 E kia anoano oki aia i te akakite i te maata anga o tona meitaki, i te au āriki o te aroa i akatau takereia e ia no te ao;

24 Koia oki tatou nei, ko tei tuatuaia mai e ia, auraka ko to te ngati Iuda anake ra, ko te etene katoa nei ra?

25 Ko tana katoa oki i karanga ia Hosea ra e, “Ko te aronga kare i te tangata noku ra, e karangaia ïa e au e, e tangata noku; e tei kore i akaperepereia ra, e karangaia ïa i te akaperepereia.”

26 “E riro oki ei te ngai i karangaia atu ei ratou ra e, Kare kotou i te tangata noku, ka riro ïa ratou i te karangaia i reira e, E tamariki na te Atua ora ra.”

27 Te kapiki ua ra oki a Isaia kia Iseraela e, “Arite ua rai te tamariki a Iseraela ki te one i taatai kia tatau ra, e toenga ua te ka ora:

28 Te akaoti nei oki aia e te kokoti poto ua nei i tana angaanga ma te tuatua-tika: e angaanga poto ua oki ta Iehova e rave i te enua nei.”

29 Mei ta Isaia oki i karanga i muatangana ra e, “Aurakā Iehova Sabaota ra i vaoo i te uanga no tatou, kua riro tatou mei ia Sodoma, e kua arite tatou ia Gomora ra.”

30 E teianei, eaa ta tatou tuatua? teia, Kua rauka te tuatua-tika i te etene, ko tei kore i umuumu atu i te tuatua-tika ra, ko te tuatua-tika i rauka i te akarongo ra.

31 Ko Iseraela ra, ko tei umuumu atu i te tuatua-tika a te ture ra, kare ïa i taea ia ratou te tuatua-tika a te ture ra.

32 No te aa ra? No te mea kare i na te akarongo i te kimi, na te angaanga ra a te ture. Kua turori oki ratou i taua toka turorianga ra;

33 Mei tei tataia ra e, “I na, e tuku au i te toka turorianga i Ziona, e te papa ei maituanga; e ko te akarongo katoa kiaia ra, e kore ïa e akama.”