Amosa

9 KITE atura au i te Atu i te tu ua anga ki te pae atarau, e kua tuatua maira aia, Ka tupaki ana i te uri, kia ngaueue nga kopa ngutupa: e vavaʼi kia pueurikiriki ki runga i to ratou mimiti ravarai; e to ratou uanga, e taia ïa e au ki te koke; ko tei oro i o ratou ra, kare ïa e ora, e tei topa ke i te oro anga, kare e akaoraia.

2 E ko ua rai ratou ki raro e tae rava atu ki te po, ei reira taku rima e totō mai ei ia ratou; kake ua rai ratou ki runga i te rangi, naku rai e tuku ia ratou mei reira ki raro.

3 Pipini ua rai ratou ki runga i te take o Karamela, naku rai e kimi e ka rave mai ia ratou i reira; e kia pipini ua rai ratou i toku mata nei ki raro rava i te takere o te moana ra, ei reira au e akaue ei i te ovi, e nana e ooni ia ratou.

4 Riro tuikaa ua rai ratou ki mua i te aroaro o to ratou au enemi e akaue atu au i te koke i reira, e na te reira ratou e ta: e e tuku au i taku mata ki runga ia ratou kia kino, auraka kia meitaki.

5 Ko te Atu ra oki ko Iehova Sabaota ra, ko tei akatukia i te enua nei, e kua taravai iora; e te aronga katoa e noo ki rungao ra, kua aue anake ïa; kua maranga katoatoa oki ki runga mei te kauvai ra, e kua roroma oki ki raro mei te kauvai i Aiphiti ra.

6 Koia ko tei patu i tona ra au pia ki runga i te rangi, e kua akamou i tona ra au are ki runga i te enua nei; ko tei kapiki ki te au ngaru o te moana, e kua riringi i te reira ki runga i te enua nei; ko Iehova tona ingoa.

7 Kare ainei kotou mei te au tamariki Kusa iaku nei, e te au tamariki a Iseraela e? te tuatua mairā Iehova. Kare ainei au i arataki mai ia Iseraela mei te enua maira mei Aiphiti? e te Philiseti mei Kaphatori mai? e to Arama mei Kira mai?

8 I na, tei runga te mata o te Atu ra o Iehova i taua basileia ara nei; e akapou atu au i te reira i runga i te enua nei: kare ra au e akapou takiri rava i te ngutuare o Iakoba, te tuatua mairā Iehova.

9 I na oki, naku e akaue, e naku e ruru i te ngutuare o Iseraela ki roto i te pa enua katoa, mei te tangata e ruru i te sitona ki roto i te ruru anga ra; kare rava ra tetai ua e topa ki raro i te one.

10 E ope rava ra te aronga ara i toku ra au tangata i te mate i te koke, ko tei karanga e, Kare taua kino nei e tae mai kia tatou, kare oki tatou e rokoia.

11 I taua rā ra e akatu ei au i te puakapa o Davida i topa ra, e naku e pananaki i te au ngai ngaangaa: e naku e akatu i te au ngai i pou, e naku e patu akaou i te reira mei tei te au rā taito ra.

12 Kia rauka ia ratou te toenga o Edoma, e te au enua katoa te ka tapaia i toku nei ingoa te tuatua mairā Iehova, ko tei rave i te reira.

13 I na, e tae maira te au rā, te tuatua mairā Iehova, e rokoiaʼi te kokoti e te arote, e te takatakai vine e tei ruru i te ua; e na te au maunga e akatopa mai i te wina ou, e e akataravaiia te au tuaivi katoa.

14 E naku e ruri ke i te tuikaa anga o toku ra au tangata ia Iseraela, e na ratou e patu i te au oire i pou ra, e na ratou e noo; e na ratou e tanu te kainga vine, e e inu i te wina o te reira; e na ratou e tanu i te kainga, e ka kai oki i te ua o te reira.

15 Naku oki ratou e tanu ki to ratou uaorai enua: e kare ratou e kiriti akaouia i to ratou uaorai enua, taku i oronga atu no ratou, te tuatua maira to Atua ra ko Iehova.