Roma

2 E TEIANEI kare aau e kotoeanga, e tera ra tangata, e te tangata katoa e akaapa atu: i taua mea oki taau e akaapa i tetai ke ra, te akaapa katoa ra ia koe uaorai; ko koe oki e akaapa na, te rave katoa na koe i taua au mea ra.

2 Kua kite ra tatou e, e tau ta te Atua akaapa, i te aronga i rave i taua au mea ra, i te tuatua-mou.

3 E te manako ra koe, e tera ra tangata, e akaapa i te aronga i rave i taua au mea ra e, e ora koe i te akaapa a te Atua, tei rave katoa oki koe i taua au mea ra?

4 E te akavaavaa nei ainei koe i tona takinga-meitaki maata e te akamouriri kore, e te akakoromaki roa, kare rai i kite e, ei akatupu taua meitaki a te Atua ra i toou tataraara?

5 No te māro ra, e te tataraara kore o toou ngakau, te akaputu ra koe i te riri ia koe uaorai, i taua rā riri ra, e te akakite anga mai i te akaapa tika a te Atua ra;

6 Ko te akautunga mai i te tangata katoa, i tei tau i tana au angaanga:

7 I te aronga i kimi i te kakā, e te meitaki, e te mate kore, i te tamou marie anga i te tuatua meitaki, ko te ora mutu kore ïa:

8 I te aronga ra i taumāro, e kare i akono i te tuatua-mou, i akono ra i te tuatua-tika kore, ko te makitakita ïa, e te otooto anga riri;

9 Te mate oki, e te tumatetenga, i te au vaerua tangata katoa i rave i te kino ra, to te ngati Iuda ana, e to te Eleni katoa;

10 Ko te kakā ra, e te ngateitei, e te au, i te tangata katoa i rave i te meitaki ra, to te ngati Iuda ana, e to te Eleni katoa:

11 I te akono oki i te tu o te tangata nei, kare ïa i te Atua.

12 Ko te aronga katoa i rave i te ara ma te ture kore, ka mate ïa ma te ture kore: e te aronga katoa i rave i te ara ma te ture, ka akavaia ïa i te ture;

13 (Kare oki tei akarongo ua i te ture ra te aronga tuatua-tika i te aroaro o te Atua, ko tei akono ra i te ture ra, te ka akatikaia ïa.

14 Te etene oki kare a ratou ture ra, kia rave ua ratou i ta te ture ra, kore ua atu rai ta ratou ture, ko ratou uaorai ta ratou ture:

15 Kua akakite ua oki ratou i ta te ture i tataia i roto i to ratou ngakau, te akakite ra oki to ratou akava-ngakau, e to ratou manako, te akaapa ra, e te akatika ra, ratou ratou uaorai;)

16 Kia tae ki te rā e akavaʼi te Atua i te au mea ngaro a te tangata nei ia Iesu Mesia ra, i te evangelia naku nei.

17 I na, e ingoa ngati Iuda toou, e te irinaki na koe i te ture, te akatietie ra oki koe i te Atua,

18 Kua kite oki koe i tona anoano, e te kite na koe i te mea meitaki, kua apiiia oki koe e te ture;

19 Te karanga na koe ia koe rai e, e arataki na te matapo, e turama no te aronga e noo i te poiri ra,

20 E apii i te kite kore, e orometua na te tamariki, tei ia koe oki te tu o te kite, e te tuatua-mou i roto i te ture ra.

21 Ko koe oki ko tei apii atu i tetai ke ra, kare koe e apii ia koe uaorai? ko koe oki tei ako ua e, auraka e keia, te keia na oki koe?

22 Ko koe oki ko tei karanga e, auraka e akaturi, te akaturi na oki koe? ko koe oki ko tei akaviivii i te idolo ra, te keia na oki koe i ta te iero?

23 Ko koe oki ko tei nengonengo i te ture ra, te akakino ra koe i te Atua i te akaapa anga i taua ture ra?

24 Kua akakinoia oki te ingoa o te Atua ki o te etene ia kotou; mei tei tataia ra.

25 E puapinga oki to te peritome, kia akono koe i te ture: e akaapa ture koe ra, kua riro ïa toou peritome ei peritome kore.

26 E kia akono te peritome kore i te tuatua-tika a te ture ra, kare ainei tona peritome kore e karangaia e, e peritome?

27 Ko te peritome kore anau nei, kia akono aia i te ture, e akaapa aia ia koe i te akaapa ture na, tei ia koe te tuatua tataia e te peritome.

28 Ko te ngati Iuda vao ra, kare ïa aia te ngati Iuda; e te peritome vao i te kopapa ra, kare ïa i te peritome:

29 Ko te ngati Iuda roto ra, te ngati Iuda; e te peritome ngakau ra, te peritome, eiaa to vao ra, ko to te vaerua ra; ko tei kore i akameitakiia e te tangata, e te Atua ra.