Mareko

16 E OTI akera te sabati, kua oko aturā Maria i Magadala, e ko Maria te metua vaine no Iakobo, e ko Salome, i te rakau kakara, kia akamainu iaia.

2 Aere atura ratou ki taua tanumanga ra i te popongi metua, i te rā mua o te ebedoma, i te itinga o te rā ra.

3 Kua na ko akera ratou ratou uaorai, Koai to tatou e uri ke atu i te toka i te ngutupa o te tanumanga nei?

4 Kia akara atura ratou, kite atura e, kua oti i te uri keia taua toka ra; e toka maata ua atu oki.

5 Kua tomo atura ratou ki roto i taua tanumanga ra, kite atura ratou i tetai tangata ou, te noo ra ki te pae katau ma te kakau roa teatea; koiriria atura ratou.

6 Kua tuatua maira aia kia ratou, Auraka e ngarangara; te kimi nei kotou ia Iesu i Nazareta, ko tei akasatauroia ra: kua tu akenei aia ki runga; kare aia i ko nei: ka akara i te ngai ta ratou i vaio iaia.

7 E aere ra kotou, e akakite atu ki tana au pipi, e kia Petero e, te aere ra aia na mua ia kotou ki Galilea; ei reira kotou e kite atu ei iaia, tana oki i tuatua mai kia kotou ra.

8 Aere viviki ua atura ratou ki vao i taua tanumanga ra, oro atura; rokoia iora ratou e te mataku, e te umere: kare ua atu i tuatua ki te tangata i te mataku.

9 Kua tu oki a Iesu ki runga i te popongi rava i te rā mua o te ebedoma ra, e kua na mua i te akakite iaia uaorai kia Maria i Magadala, tana i tauru i nga demoni toko itu no roto iaia ra.

10 Aere atura aia, kua akakite atura ki te aronga i aru iaia ra, te mii ua ra ratou e te aue ra.

11 E kite akera ratou e kua ora aia, e kua kitea e ia, kare ratou i akarongo.

12 E muri akera, kua kitea iora aia e toko rua o ratou ma te tu ke, i to raua aere anga, ka aere ei raua ki uta.

13 Kua ooki maira raua e kua tuatua maira ki to ratou ra: kare rai i akarongo.

14 E muri akera, kua akakite maira aia i te tino ngauru ma tai i ta ratou kaingakai ra; e kua kauvae maira oki ia ratou i to ratou akarongo kore, e te paetaeta o to ratou ngakau, ko ratou kare i akarongo i te aronga i kite iaia i muri ake i tona tu anga maira.

15 Kua tuatua maira aia kia ratou, E aere kotou ki te pa enua ravarai, e tutu aere i te evangelia nei ki te tangata tini ravarai.

16 Ko te akarongo e kua bapetizoia ra, e ora ïa; ko te kore ra e akarongo, ka akaapaia ïa.

17 E te aronga e akarongo ra, ka riro ia ratou teianei au akairo; Ka peke te au demoni ia ratou i toku nei ingoa; e tuatua ratou i te reo ou;

18 E rave ua oki ratou i te au ovi ra; e kia inu ratou i te mea e kavangiaʼi ra, kare ratou e mate; kia tuku oki ratou i te rima ki rungao i te aronga maki ra, ka ora ïa.

19 E oti akera ta te Atu tuatua anga mai kia ratou ra, raveia maira aia ki runga i te rangi, noo atura i te rima katau o te Atua ra.

20 Aere atura oki ratou, tutu aere atura i te pa enua ravarai, ko te Atu katoa oki i te rave katoa anga i te angaanga, e te akatinamou anga i taua tuatua ra, i te au akairo i raveia ra. Amene.