Salamo
109 E TE Atua, e tei akameitakiia e au nei, auraka koe e muteki ua mai; 2 No te mea, te amama ua maira te vaa o te tangata kino, e te vaa o te pikikaa, iaku; kua tuatua kino mai iaku nei ma te arero pikikaa. 3 Kua takako mai ratou iaku i te tuatua makitakita, e kua tamaki tumu kore ua mai iaku nei. 4 No toku nei aroa i enemi mai ei ratou iaku; kareka au nei, ei te pure au. 5 Kua pera ratou i te tutaki mai i te kino iaku no toku nei takinga-meitaki e te makitakita no toku nei aroa. 6 E akanoo koe i tetai tangata kino ki runga iaia, e kia tu mai a Satani i tona rima katau. 7 Me akavaia aia, kia akapaaia aia, e kia riro tana pure ei ara. 8 Kia akaitiia tona au rā, e tana taoonga, kia riro ïa ki tetai ke. 9 Kia riro tana au tamariki ei matiroeroe, e tana vaine ei takaua. 10 Kia riro tana au tamariki i te uoa aere ua e te oriori kai, kia ngaki onge ratou i to ratou au ngai tanea ra. 11 Kia ope roa tana apinga i te aōia e te aronga aru, e kia pou oki tana angaanga i te noniia e te tangata ke. 12 Auraka roa tetai kia takinga-meitaki mai iaia, e tana katoa ra au matiroeroe, auraka rava kia aroaia mai. 13 Kia tipu keia atu tona katoa ra au uanga; kia taparaparaia to ratou ingoa i te uki a muri nei. 14 Te au ara a tona ra ai metua kia manakoia e Iehova, e auraka te ara a tona metua vaine kia taparaparaia. 15 Kia vai marie rai ki mua i te aroaro o Iehova, kia tangaro takiriia te manako iaia i te enua nei; 16 No te mea kare aia i manako e takinga-meitaki, kua takinga-kino ra aia i te tangata ao e te putaua, e kia mate roa iaia tei paruparu te ngakau. 17 Koia ra i inangaro i te taumaa, kia iri mairai te reira ki runga iaia: koia oki kare i inangaro i te meitaki ra, kia taka ke atu ïa iaia. 18 E mei iaia i vaî iaia uaorai ki te taumaa mei te kakau ra, kia o tikai ïa te reira mei te vai ki roto i tona ngakau, e mei te inu ki roto i tona au ivi. 19 Kia vai tikai ïa ki runga iaia mei te kakau i vaîiaʼi aia ra, e mei te tatua i tatuaiaʼi aia kare i tivata ra. 20 Ei tutaki teia na Iehova i toku ra au enemi; na te aronga i tuatua kino mai i toku nei vaerua. 21 Ko koe ra, e taku Atu, e Iehova, e akatika mai koe iaku i toou ra ingoa: e akaora koe iaku i te takinga-meitaki maata noou ra. 22 E akaaka oki toku e te putaua, e kua paruparu toku ngakau i roto iaku nei. 23 Kua riro au mei te ata e peke ra: te taa aere ua nei au mei te tāpaki nei. 24 Kua paruparu oki nei puke turi i te akakore kai, e kua kore te matu o toku kopapa. 25 Kua riro au ei akakino anga na ratou; te tiroi matariki maira ratou iaku; te takirikiri ra te mimiti! 26 E tauturu mai koe iaku, e taku Atua, e Iehova e: e akaora koe iaku i toou ra aroa: 27 Kia kite oki ratou e, ko to rima teia, e naau, e Iehova, i rave i teia. 28 Kia taumaa mai ratou, ei akaora taau; kia tu mai ratou ki runga, kia taakamaia atu ratou; ko to tavini nei ra, kia akarekarekaia mai ïa. 29 Kia vaîia toku ra au enemi ki te akama, e kia tapokiia ratou i te aringaringa mei te kakau ra. 30 E akameitaki maata roa au ia Iehova i toku nei vaa; e akapaapaa au iaia i rotopu i te tangata tini ra: 31 No te mea e tu aia i te rima katau o tei akaaka ra, e akaora iaia i te aronga e akaapa mai i tona vaerua.