Genese

29 AERE ua aturā Iakoba i tona tere, e tae atura ki te enua o to te itinga o te rā ra.

2 E kua akara iora aia, e i na, e ruavai tei taua ngai ra, e i na, e puke anana mamoe e toru i te moe ua anga i reira, i te pae; no roto i taua ruavai i akainumiaʼi te au anana ra: e toka maata tei rungao i te vaa o taua ruavai ra.

3 Kia tae katoa maira te au anana i reira ra, e uri ke ei ratou i taua toka i rungao i te vaa o taua ruavai ra, ka akainu ei i taua au mamoe ra, ka tuku akaou ei i te toka ki rungao i te vaa o taua ruavai i tona vairanga ra.

4 Kua karanga aturā Iakoba kia ratou, E taku au taeake e, noea kotou na? Kua tuatua maira ratou, No Harana matou.

5 Kua karanga atura aia kia ratou, Kua kite aina kotou i te mokopuna a Nahora ra ia Labana? Kua tuatua maira ratou, Kua kite matou.

6 Kua karanga atura aia kia ratou, Te ora ra? Kua tuatua maira ratou, Te ora ra; e i na, tera ake te tamaine ko Rahela te aere maira ma te mamoe.

7 Kua karanga atu rai aia, I na, e rā roa, kare oki i tae ki te atianga e akaputuputuiaʼi te mamoe; ka akainu ei i te puaka, ka tuku atu ei kia kaikai ratou.

8 Kua tuatua maira ratou, Kare e tika, kia tae katoa maira te au anana, e kia uri ke i te toka i rungao i te vaa o te ruavai nei; ei reira e akainumiaʼi te mamoe.

9 Te karangaranga ua ra aia kia ratou, ko Rahela maira ma te mamoe a tona metua tane; koia rai te tiaki.

10 E tei te kite anga atu a Iakoba ia Rahela, i te tamaine a Labana, i te tungane o tona metua vaine ra, e te mamoe a te tungane o tona metua vaine, a Labana ra, kua aere aturā Iakoba i vaitata, e uri ke atura i te toka i te vaa o te ruavai ra, kua akainu iora i te mamoe a Labana, a te tungane o tona metua vaine ra.

11 E kua ongi aturā Iakoba ia Rahela, kapiki atura te reo i te aue.

12 E kua akakite atu a Iakoba kia Rahela e, no te kopu-tangata aia o tona metua tane ra, e ko te tamaiti aia na Rebeka; e kua oro atura aia, akakite atura ki tona metua tane ra.

13 E kite akerā Labana i te tuatua ia Iakoba, i te tamaiti a tona tuaine ra, kua oro maira aia e aravei iaia ra, e takave maira, e ongi iora, e kua arataki atura ki roto i tona are. Kua akakite atura aia kia Labana i te au tuatua katoa ra.

14 E kua tuatua mairā Labana kiaia, E ivi tikai koe noku, e kiko oki noku. E okotai akera ona marama tikai i te noo anga iaia ra.

15 Kua tuatua mairā Labana kia Iakoba, Kia rave ua mai ainei oki koe i taku angaanga nei, no te mea e taeake koe noku? E akakite mai koe i taau tutaki. 16 Toko rua a Labana tamaine: ko Lea te ingoa o te tama mua ra, e ko Rahela te ingoa o te teina.

17 E mata maki to Lea; karekā Rahela, e purotu ïa i te mata, e te tu katoa.

18 E te inangaro rā Iakoba ia Rahela; kua karanga atura aia, E tavini au i ko nei ia koe nei e kia itu ake mataiti, teia taku, ko taau tamaine openga nei ko Rahela.

19 Kua tuatua mairā Labana, E mea meitaki kia oronga atu au iaia naau, auraka au e oronga na tetai tangata ke atu: e noo taua i ko nei.

20 Kua tavini aturā Iakoba e itu atura mataiti no Rahela; e no tona inangaro iaia, riro atura taua au mataiti ra, mei nga rā poto ua nei iaia.

21 Kua karanga aturā Iakoba kia Labana, O mai taku vaine, kua ope toki toku au rā, kia akaipoipo au iaia.

22 E kua akaputuputu mairā Labana i te au tangata katoa no taua ngai ra, e kua akatupu iora i tetai kaingakai.

23 E po iora kua rave akera aia i tana tamaine ia Lea, kua arataki maira kiaia; moe atura aia iaia.

24 E kua oronga mairā Labana i tona tavini vaine ra ia Zilipa, ei tavini vaine no tana tamaine ra no Lea.

25 Kia ao ra, e i na, ko Lea: e kua karanga atura aia kia Labana, Eaa koe i pera mai ei kiaku? kare aina ko Rahela taku i tavini atu ei kia koe na? eaa koe i pikikaa mai ei iaku?

26 E kua tuatua mairā Labana, Kare e tika i to matou enua, kia na mua i te oronga i te teina, aua te tama mua ra.

27 Ka akaope ana i ta teia ebedoma, e ka oronga katoa atu matou i tetai naau katoa, ei tutaki naau, e tavini mairai koe iaku nei, e kia itu mairai mataiti.

28 E kua akapera aturā Iakoba, e ope akera iaia tona ebedoma ra: kua oronga katoa maira aia i tana tamaine ia Rahela ei vaine nana.

29 E kua oronga mairā Labana i tona tavini vaine ra ia Bila, ki tana tamaine kia Rahela, ei tavini vaine nona.

30 E moe katoa atura aia ia Rahela, e e maata tona inangaro ia Rahela ia Lea: e kua tavini atura aia ia Labana e itu rai mataiti.

31 E kia akara mairā Iehova e, kare a Lea i inangaroia, kua oronga maira aia i te tamariki nana; karekā Rahela te vai pa ua ra ïa.

32 E kua to iorā Lea, e anau maira tana, e tamaroa, e tapa iora aia i tona ingoa ko Reubena: kua na ko akera oki aia, Kua akara mairai a Iehova i toku nei mate; e teianei ka inangaro mai taku tane iaku.

33 E kua to akaou iora aia, e anau maira, e tamaroa; kua na ko akera, No te mea e, kua akarongo mairā Iehova, kare au i inangaroia mai, i oronga katoa mai ei aia i teianei tamaiti: tapa iora aia i tona ingoa ko Simeona.

34 Kua to akaou iora oki aia, e anau maira, e tamaroa; kua na ko akera, E tau roa mai taku tane kiaku i teianei, no te mea, toko toru akenei aku tamaroa i anau nana; i tapaiaʼi tona ingoa ia Levi.

35 Kua to akaou iora oki aia, e anau maira, e tamaroa; kua na ko akera, E akameitaki au ia Iehova i teianei; i tapaʼi aia i tona ingoa ko Iuda; pa atura aia.