Ieremia

37 TUPAUIA akera te au o Konia, te tamaiti a Iehoiakima, e te ariki ra ia Zedekia, te tamaiti a Iosia ra, tei akaarikiia e te ariki o Babulonia e Nebukanesa, no te enua ra no Iuda.

2 Kare ra aia, e tona au tavini katoa, e te au tangata katoa o te enua, i akarongo i te au tuatua a Iehova, tana i tuatua i te peroveta ra ia Ieremia.

3 Kua tono akera te ariki ra ko Zedekia ia Ieukala, te tamaiti a Selemia, e ia Zephania, te tamaiti a Maaseia taunga ra, ki te peroveta ra, kia Ieremia, na ko atura, Ka pure koe i tenana i to tatou Atua ra ia Iehova ia tatou nei.

4 Te aere ua mairā Ieremia ki roto, e te tomo ua ara ki vao, i taua au tangata ra: kare oki aia i tapekaia e ratou ki roto i te are tapeka anga.

5 Kua aere mai oki te nuku o Pharao mai Aiphiti mai: akarongo akera te Kaledea e akapini ia Ierusalema, i te rongo ia ratou, akaruke maira ratou ia Ierusalema.

6 Kua tae maira te tuatua a Iehova ki te peroveta ra kia Ieremia i reira, na ko maira,

7 Te na ko maira te Atua o Iseraela ra, ko Iehova; E na ko atu kotou ki te ariki o Iuda, tei tono mai ia kotou kiaku nei, e ui iaku ra; I na, taua nuku no Pharao, tei aere mai e tauturu ia kotou ra, e oki ïa ki to ratou ra enua, ki Aiphiti.

8 E oki akaou mai oki te Kaledea e tamaki i teianei oire, e rave i te reira, e e tutungi ki te ai.

9 Te na ko mairā Iehova; Auraka kotou e vare, i te na ko anga e, Ka akaruke takiri te Kaledea ia tatou: kare oki ratou e aere ke.

10 Naringa rai i pou roa te nuku katoa o te Kaledea ia kotou, i te tamaki anga mai ia kotou ra, toe iora te aronga putaputa anake i roto ia ratou ra, e tu mairai te tangata katoa ra ki runga, i roto i tona puakapa, e tutungi i teianei oire ki te ai.

11 E kia riro atura te nuku o te Kaledea mei mua mai i Ierusalema i te mataku i te nuku o Pharao,

12 Aere aturā Ieremia mei Ierusalema atu, i aere atura ki te enua o Beniamina, kia rauka tana tuanga i reira i rotopu i te au tangata ra.

13 E tae atura aia ki te ngutupa ki o Beniamina ra, tei reira tetai rangatira no te aronga vaeau, ko Iriia te ingoa, te tamaiti na Selemia, te tamaiti a Hanania; kua opu iora aia ia Ieremia peroveta, e kua na ko atura, Te aere ra ko ki o te Kaledea.

14 Kua tuatua mairā Ieremia, E pikikaa tena; kare au e aere ki o te Kaledea. Kare akera ra aia i akarongo iaia: kua rave iorā Iriia ia Ieremia, e kua arataki atura ki te ui ariki ra.

15 Te riri ra te ui ariki ia Ieremia, e kua pāpā iora iaia, e kua tuku atura iaia ki roto i te are tapeka anga, i te are o Ionatana tata tuatua ra: ko tei akariroia ïa e ratou ei are tapeka anga ra.

16 E tae aturā Ieremia ki roto i te are tapeka anga ra, e ki roto i te au pia rikiriki ra, e manganui akera to Ieremia au rā i reira;

17 Kua tono atura te ariki ra ko Zedekia, e kua arataki maira iaia: kua ui poiri ua atura te ariki kiaia i roto i tona ra are, na ko atura. E tuatua ainei tena no ko mai ia Iehova ra? kua tuatua mairā Ieremia, E tuatua ïa: kua tuatua mai oki aia, E tukuia atu koe ki roto i te rima o te ariki no Babulonia.

18 Kua karanga aturā Ieremia ki te ariki ra kia Zedekia, Eaa taku nei ara ia koe ra, e toou au tavini ra, e teianei katoa au tangata, i uri uaʼi kotou iaku ki roto i te are tapeka anga?

19 Teiea iora ta kotou au peroveta tei totou ia kotou na, i te na ko anga atu e, Kare te ariki o Babulonia e tae mai e rave ia kotou, e teianei enua?

20 E tenana, e akarongo mai, ko taku teia tuatua kia koe, e taku pu, e te ariki: kia kiteia mai taku pati anga i tenana ki mua ia koe ra; auraka koe e akaoki iaku ki roto i to are o Ionatana tata tuatua ra, ka mate aea au i reira.

21 Kua akaue atura te ariki ra ko Zedekia, kia tuku ratou ia Ieremia ki roto i te paepae o te are tapeka anga, e kia oronga mai ratou i te faraoa okotai nana no te rā okotai, no roto i te arataa o te tunu-kai ra, e kia ope roa te au faraoa o te oire i te pou. Noo iorā Ieremia ki roto i te paepae o te are tapeka anga ra.