E Peʼe na Solomona

4 I na! te manea ra koe, e taku akaperepere e; i na! te manea ra koe, e nga mata oou, i raro ake i to makave rauru ra, e tau ïa ki to te kukupa ra: to rauru, e tau ïa ki te anana puaka-nio, e moe aere i te maunga ra i Gileada.

2 E aite to nio ra ki te anana mamoe pakoti ouia, i te aere anga mai mei raro mai i te orei anga ra; ko tei tataki rua anake te punua ra, e kare rava tetai o ratou i ngere ra.

3 E tau to ngutu ki te ao kutekute ra, e to reo ra tei navenave. Mei te vaanga remuna ra toou ïa puke paparinga i raro ake i to makave rauru ra.

4 E tau to kaki ki te punanga o Davida, i patuia ei vairanga taoonga tamaki; okotai tausani i te paruru i akautaia ki reira, e taoonga anake no te aronga ririnui ra.

5 E aite toou puke u ra ki nga aili ou e rua, e maanga ra, tei roto i te lili te kaikai anga.

6 Kia ao ra kia peke ke atu te maruao, ei runga au i te maunga mura nei, e te tuaivi kakara nei.

7 Manea toou e pini ua ake, e taku akaperepere e; kare rava oou e titoutou.

8 E aere mai kiaku nei, e taku vaine, e akaruke ia Lebanona, e aere mai kiaku nei, o akaruke ia Lebanona. Na te take o Amana i te akara mai, na te take o Senira, e Heremona; na te au nooanga o te au liona, na te au maunga o te nemera.

9 Kua riro taku ngakau ia koe, e taku tuaine, e taku vaine; kua riro taku ngakau ia koe i to mata na, okotai rava ra i te pirianganaoa okotai o to kaki na.

10 E manea maata tei to inangaro, e taku tuaine, taku vaine e! e meitaki maata tei to inangaro i to te wina! e te aunga o to manongi i te au takakara katoa ra!

11 To vaa na, e taku vaine e, mei te melikerio i te topata anga mai: e meli e te u tei raro ake i to arero; e te aunga o to kakau na, e tau ïa ki te aunga o Lebanona.

12 E kainga koropiniia taku tuaine, taku vaine; e vai puipui popaniia, e punavai topiriia.

13 E kainga remuna tei tanumia e koe ra, e te ua memeitaki ra, te kophera, e te narido;

14 Te narido, e te karakema, te kane, e te kinamo, e te au rakau aunga meitaki katoa ra; te mura e te aloe, e te au rakau kakara katoa ra:

15 Te punavai o taua kainga nei, e tumu ïa no te vai ora, mei Lebanona te taʼe anga mai.

16 Ka ara, e te matangi ra e te akarua e! e arara katoa mai koe, e te tonga ra! ei angiangi mai ki runga i taku kainga nei, kia kitea tona kakara i te maringi anga mai. Kia tomo mai taku akaperepere ki roto i tona nei kainga, e kia kai aia i te kai memeitaki no reira.