Ieremia

7 TE TUATUA i tae mai kia Ieremia, no ko mai ia Iehova ra, i te na ko anga mai e,

2 Ka tu ua ana koe i te ngutupa o te are o Iehova, e ei reira koe e akakite ei i teianei tuatua, ka na ko atu ei. Ka akarongo mai ana i te tuatua a Iehova, e to Iuda ravarai, ko tei tomo mai na roto i teianei au ngutupa e akamori ia Iehova.

3 Te na ko maira te Atua no Iseraela ra ko Iehova Sabaota, Ka akameitaki ana i to kotou aerenga e ta kotou ravenga, e ka akanooia kotou e au ki teianei ngai.

4 Auraka kotou e irinaki ki te tuatua pikikaa, i te na ko anga mai e, Te nao o Iehova, Te nao o Iehova, Te nao o Iehova teia.

5 Kia akameitaki tikai kotou i to kotou aerenga e ta kotou ravenga; kia rave tikai kotou i te tuatua-tau, i te tangata nei e tona tangata tupu;

6 Kare e takinga-kino i te tangata ke, te matiroeroe, ma te vaine takaua ra; e kare e akamaringi i te toto ara kore i teianei ngai; kare oki e aru aere i te au atua ke i kino ei kotou na:

7 E akanoo au ia kotou i teianei ngai i reira, i te enua taku i oronga atu ki to kotou au metua ra, e tuatau e tuatau ua atu.

8 I na, te irinaki nei kotou i te tuatua pikikaa, kare e puapinga.

9 E keia ainei kotou, e ta ua i te tangata, e e akaturi, e e taputou pikikaa, e e tutungi i te rakau kakara kia Baala, e e aru aere i te au atua ke, tei kore i kitea e kotou;

10 Ka aere mai ei, ka tu mai ei, ki mua i toku aroaro nei, ki roto i teianei are, i tapaia i toku nei ingoa, ka tuatua mai ei, Kua akaoraia matou nei, kia rave rai i taua au mea viivii katoa nei?

11 Kua riro ainei teianei are, tei tapaia i toku nei ingoa, ei ana no te aronga noni i to kotou na mata? I na, ko au uaorai tei kite, te tuatua mairā Iehova.

12 Ka aere ra kotou i teianei ki toku ra ngai, ki Silo, tei vaooia e au toku ingoa i muatangana, ka akaraʼi i taku i rave i te reira, no te ara a toku iti-tangata a Iseraela.

13 E teianei, no te mea kua rave kotou i taua au ravenga katoa nei, te tuatua mairā Iehova, e kua tuatua au ia kotou, i te tu popongi anga au ia kotou, kare ra kotou i îo mai;

14 Ka rave ei au ki te are, i tapaia i toku nei ingoa, ta kotou e irinaki na, e ki te ngai i orongaia e au no kotou, e no to kotou au metua ra, mei taku i rave ia Silo ra.

15 E ka tuaru atu au ia kotou i mua i toku aroaro nei, mei taku i tuaru i to kotou au taeake ravarai, te uanga katoatoa no Epheraima.

16 E teianei, auraka koe e pure i teianei iti tangata, auraka koe e apai atu i tetai kapiki e tetai pure no ratou, auraka rai e pati mai kiaku nei; kare oki au e akarongo atu ia koe.

17 Kare ainei koe i akara i ta ratou e rave ana i roto i te au oire o Iuda, e i te au arataa i Ierusalema?

18 Te koi aere ra te au tamariki i te vaie, te taʼu ra te au metua tane i te ai, e te oi ra te au vaine ra i te faraoa, ei tupe areto na te ariki vaine o te au rangi ra, e ei riringi atu oki i te atinga inu ki te au atua ke, ei akakoko mai iaku kia riri au.

19 Ko au ainei ta ratou i akakoko mai, te tuatua mairā Iehova? kare ainei ko ratou uaorai, kia akama to ratou uaorai mata?

20 I na ko mai ei te Atu ra ko Iehova, I na, toku nei riri, e toku nei riri akaoko, ka riringiia ki rungao i teianei ngai, ki runga i te tangata, e ki runga i te puaka, e ki runga i te au rakau kainga, e ki runga i te au kai i te enua ra; ka ka oki te reira, e kare rava e tamateia.

21 Te na ko mairā Iehova Sabaota, te Atua no Iseraela ra, E kapiti katoa atu i ta kotou atinga karakaratio i ta kotou au atinga ra, e ka kai i te kiko ra.

22 Kare oki au i karanga atu ki to kotou au metua, e kare i akaue kia ratou, i te rā i arataki mai ei au ia ratou mei te enua maira mei Aiphiti, i te tuatua no te au atinga karakaratio, e te au atinga ra;

23 Teia ra te tuatua taku i karanga atu kia ratou, i te na ko anga e, Ka akarongo mai kotou i toku nei reo, ka riro ei au ei Atua no kotou, e ka riro ïa kotou ei iti-tangata noku: ka aere kotou na te au aerenga katoa taku e akaue kia kotou, kia meitaki oki kotou na.

24 Kare ra ratou i akarongo mai, kare oki i anga mai i to ratou taringa, kua aere ra ratou i te tuatua, e te manako o to ratou uaorai ngakau kino, e kua kotoe atura ki muri, e kare i aere ki mua.

25 Mei te rā mairai i tae mai ei to kotou au metua, mei te enua maira mei Aiphiti, e tae rava akenei ki teianei rā, taku tono anga atu i toku katoa ra au tavini te au peroveta, i te tu popongi anga i tera rā, i tera rā, e te tono anga atu ia ratou:

26 Kare ra ratou i akarongo mai iaku, kare oki i anga mai i to ratou taringa, kua akaketaketa ra ratou i to ratou kaki: e kino maata ta ratou i rave i ta to ratou au metua ra.

27 Ka tuatua ua atu rai koe i teia katoa nei au tuatua kia ratou; kare ra ratou e akarongo mai ia koe ka kapiki ua atu rai oki koe ia ratou; kare ra ratou e ki mai.

28 E teianei, e karanga atu koe kia ratou, Ko te enua teia tei kore i akarongo i te reo o to ratou Atua ra ko Iehova; kare oki i āriki i te ako: kua kore te tuatua-mou, e kua akataka keia ïa i to ratou vaa.

29 Ka mangore ana i to rauru, e ka titiri ke atu, ka akatupu ana i te aue i te au ngai teitei; no te mea kua akarukeia e Iehova, e kua tuaruia te uki tangata o tona ra riri.

30 Kua rave oki te au tamariki a Iuda i te kino ki mua i toku mata nei, te tuatua mairā Iehova: kua tuku ratou i ta ratou au mea viivii ki roto i te are i tapaia i toku nei ingoa, ei akaviivii atu.

31 Kua akatu oki ratou i te au ngai teitei i Topheta, i te o o te tamaiti a Hinoma, ei taʼu anga i ta ratou au tamariki tamaroa e te au tamaine ki te ai; i tei kore i akaueia e au ra, kare oki te reira i o ki toku ngakau.

32 E teianei, I na, te vaitata maira te au rā, te tuatua mairā Iehova, e kore ei te reira e tuatuaia ia Topheta, e Te o o te tamaiti a Hinoma, ko Te o tainga ra: e ka tanu ratou i te tangata ki Topheta, e kapi roa akera kare e ngai toe.

33 E riro oki te au ivi o teianei iti-tangata ei kai na te au manu o te reva, e na te au puaka o te enua nei; e kare tetai e îîa atu.

34 E e akakoreia e au i te au oire o Iuda, ei te au arataa i Ierusalema ra, te reo rekareka, e te reo pereperekavana, te reo o te tane ou, e te reo o te vaine akaipoipo ou ra: ka riro oki te enua i te tanea.