Iosua

24 KUA akaputuputu mairai o Iosua i te au kopu ravarai o Iseraela ki Sekema, e kua karanga atura ki te aronga pakari o Iseraela ra, e to ratou au mataiapo tutara, e to ratou au akava, e to ratou aronga rangatira ra: kua tu ua maira ratou ki mua i te aroaro o te Atua.

2 Kua karanga aturā Iosua ki taua aronga katoa ra, Te na ko maira te Atua o Iseraela nei ko Iehova, Tei tetai pae vai to kotou ai metua i te noo anga i muatangana ra, ko Tera, te metua no Aberahama, e te metua oki no Nahora, e kua araara ratou i te au atua ke.

3 E naku oki i rave mai i to kotou metua ia Aberahama, mei tetai pae vai maira, e kua arataki iaia na roto katoa i te enua katoa nei ko Kanaana, e kua akamaata au i tona uanga, e kua oronga oki au i tana ko Isaaka.

4 E kua oronga oki au i ta Isaaka ko Iakoba, e ko Esau; e kua oronga oki au i te maunga ra ko Seira no Esau ei nooanga nona; aere atura rā Iakoba e tana au tamariki ki raro ki Aiphiti;

5 E kua tono atura au ia Mose raua katoa ko Aarona, ta atura oki au ia Aiphiti i te au mate taku i akatupu i roto ia ratou ra: e i muri ake kua arataki mai au ia kotou ki vao.

6 E kua arataki mai au i to kotou ai metua mei Aiphiti mai; e tae maira kotou ki taatai; e kua aruaru mai to Aiphiti i to kotou ai metua, ma te kariota e te oroenua, e tae rava maira ki te Tai Muramura.

7 E ia ratou i kapiki kia Iehova ra, kua tuku iora aia i te poiri i rotopu ia kotou e to Aiphiti, e apai maira i te tai ki rungao ia ratou, tapoki atura ia ratou; kua kite oki to kotou mata i taku i rave i to Aiphiti ra. E roa akera to kotou noo anga i te medebara ra,

8 Kua arataki maira au ia kotou ki te enua o te ngati Amori, i tei noo i tetai pae Ioridana ra; e kua tamaki mai ratou ia kotou ra, e kua oronga atu au ia ratou ki to kotou rima, kia rauka to ratou enua ia kotou, e pou rava akera ratou iaku ki mua i to kotou aroaro.

9 Kua tu mairā Balaka te tamaiti a Zipora ariki no Moabi ra, e tamaki mai ia Iseraela, e kua tono atura i te karere e tiki ia Balaama te tamaiti a Beora, ei taumaa ia kotou:

10 Kare akera au i akarongo ia Balaama, akaora ua atu rai aia ia kotou; kua ora iora kotou iaku i tona rima.

11 E aere maira oki kotou ki tetai pae Ioridana, e tae maira ki Ieriko; e kua tamaki maira to Ieriko ia kotou, e te ngati Amori e te Perizi, e te ngati Kanaana, e te ngati Heta, e te Geregasi, e te ngati Hevi, e te ngati Iebusi; e kua tuku atura au ia ratou ki roto i to kotou rima.

12 E kua tono au i te rango taae kia na mua ia kotou, e eke iora nga ariki o te ngati Amori toko rua i te reira i mua ia kotou, kare i ta kotou ra koke e ta kotou ra ana.

13 E kua oronga au i te enua no kotou kare i angaangaia e kotou ra, e te noo na kotou i roto i te oire kare i patuia e kotou, e te kai na kotou i te kai o te kainga vine, e te kainga olive, kare i tanumia e kotou ra.

14 E tenana, e mataku kotou ia Iehova, e e akamori oki iaia ma te pikikaa kore, e ma te tuatua-mou; e akaruke atu i te au atua ta to kotou ai metua i araara i tetai pae vai ra, e i Aiphiti oki; e e akamori kotou ia Iehova anake ra.

15 E e mea kino ia kotou kia akamori ia Iehova, e akataka ana kotou i teianei rā i ta kotou e akamori; e ko te au atua ainei ta to kotou ai metua i akamori i tetai pae vai ra, e te au atua ainei o te ngati Amori nei, no ratou te enua ta kotou e noo nei? Kareka au e toku ra ngutuare, e akamori ïa matou ia Iehova.

16 Kua tuatua maira taua aronga tangata ra, na ko maira, Auraka rava ïa tuatua ia matou nei i te akaruke ia Iehova, e te akamori i te au atua ke;

17 Ko Iehova oki to matou Atua; koia tei arataki mai ia matou, e to matou aronga metua, mei te enua maira mei Aiphiti, mei te ngutuare i tavini ei ra, ko tei rave oki i taua au akairo mamaata ra ki mua i to matou mata, ko tei tiaki mai oki ia matou i te au aerenga ravarai i aereia e matou ra, e i roto i te au tangata katoa i ta matou i aere na roto ra.

18 E kua tuaru a Iehova i te tangata ravarai na mua ia matou, e te ngati Amori katoa ra ko tei noo i te enua nei: ko Iehova katoa oki ta matou e akamori, koia oki to matou Atua.

19 Kua karanga aturā Iosua ki taua aronga tangata ra, Kare e tika ia kotou kia akamori ia Iehova; e Atua tapu rava oki aia, e Atua vareae; kare aia e akakoromaki i ta kotou au ara e to kotou au kino.

20 Kia akaruke kotou ia Iehova, e kia akamori i te au atua ke, ei reira aia e anga mai ei e tuku mai ei i te kino ki runga ia kotou kia pou kotou, takinga-meitaki uaorai aia ia kotou i muatangana ra.

21 Kua tuatua maira taua aronga tangata ra kia Iosua, Auraka, ko Iehova ta matou e akamori.

22 Kua karanga aturā Iosua ki taua aronga tangata ra, Ei kite kotou no kotou uaorai e, kua rave kotou ia Iehova ei Atua, e e akamori kotou iaia anake ra.

23 Kua karanga atura aia, Ka akaruke atu i te au atura ke i roto ia kotou i tenana, e akatae i to kotou ngakau ki te Atua o Iseraela kia Iehova.

24 Kua tuatua maira taua aronga tangata ra kia Iosua, E akamori matou i to matou Atua ia Iehova, e tona te reo ta matou e akarongo.

25 Kua papau iorā Iosua i te koreromotu ki taua aronga ra i te reira rā, akariro atura ei ture na ratou, e ei akonoanga i Sekema.

26 Kua tata iorā Iosua i teianei au tuatua ki roto i te buka ture a te Atua ra; e kua rave iora i tetai toka maata, e tanu iora i reira i raro ake i tetai rakau, i vaitata i te ngai-tapu o Iehova ra.

27 Kua karanga aturā Iosua ki te tangata ravarai ra, Ka akara mai ana, ei kite teianei toka no te Atua ia tatou, kua akarongo oki te reira i te au tuatua ravarai ta Iehova i karanga mai kia tatou, e ei kite teianei toka ia kotou; ko te pikikaa aea kotou i to kotou Atua.

28 Kua tuku aturā Iosua i taua aronga tangata ravarai kia aere ua ana ki to ratou au kainga ra.

29 E muri ake i taua au tuatua nei, mate iora taua tavini o Iehova ra, ko te tamaiti na Nuna ra, ko Iosua; okotai anere okotai ngauru ona mataiti.

30 Kua tanu iora ratou iaia i te pae o tona uaorai kainga i Timenata-sera, i te maunga ra ko Epheraima, i te pae i apatokerau o te tuaivi ra ko Gaasa.

31 Kua akamori Iseraela ia Iehova e ope rava akera to Iosua ra tuatau, e ope rava akera oki te tuatau o te aronga pakari i toe i te ao i muri ake ia Iosua ra, ko tei kite i te au angaanga ravarai ta Iehova i rave ia Iseraela ra.

32 E te au ivi o Iosepha, i apaiia mai e te tamariki a Iseraela mei Aiphiti maira, tanu iora ratou i Sekema, i te pae kainga i okoia e Iakoba i te au tamariki a Hamora, te metua no Sekema, i te au moni ario okotai anere ra: e riro atura ei kainga no te tamariki a Iosepha ra.

33 Mate iorā Eleazara te tamaiti a Aarona ra, e kua tanu iora ratou iaia i tetai tuaivi, i tei orongaia mai na tana tamaiti na Phinehaza, i te maunga ra ko Epheraima.