Ioela

3 I NA oki, ei te reira ra au rā, e i taua tuatau ra, kia akaoki mai au i te au tuikaa anga o Iuda e Ierusalema,

2 E akaputuputu katoaʼi au i to te pa enua katoa, e e arataki mai au ia ratou ki raro i te o o Iehosaphata; ei reira au e akautunga atu ei ia ratou i toku ra iti-tangata, e taku ra tuanga ia Iseraela, ta ratou i akapueurikiriki ke ki te pa enua ra, e kua tua iora i toku ra enua.

3 Kua tua iora oki ratou i te kelero i toku ra iti-tangata; e kua oko atura ratou i te tamaiti okotai i te vaine akaturi, e kua ou atura i te tamaine okotai i te wina, kia inu ratou.

4 Eaa oki ta kotou iaku nei, e Turia e Sidona, e to te au kotinga katoa i Philisetia e? e akaoko mai ainei kotou iaku nei? e kia akaoko mai kotou iaku nei; e akaoki atu au i ta kotou oko ki runga i to kotou uaorai mimiti, kare e roaia ia;

5 No te mea kua rave kotou i taku ario e taku auro, e kua apai kotou i taku au apinga memeitaki e te inangaroia ki roto i to kotou au marae;

6 E te au tamariki a Iuda ma te au tamariki a Ierusalema tei okoia e kotou ki te au tamariki a te Eleni, kia taka ke atu ratou ia kotou i to ratou ra ngai.

7 I na, e akatu au ia ratou i tenana ngai, e tei okoia ratou e kotou na, e e akaoki atu au ta kotou akaoko ki runga i to kotou na upoko:

8 E naku e oko atu i ta kotou au tamaroa e ta kotou au tamaine ki roto i te rima o te au tamariki a Iuda, e na ratou e oko atu ia ratou ki to Seba, ki to te au tangata mamao ra, kua pera mai oki a Iehova.

9 E tutu aere kotou i teia i roto i te au enua; Akateateamamao i te tamaki, akaara ana i te au tangata ririnui; kia akavaitata mai te au tangata tamaki ravarai; kia aere mai ratou ki runga:

10 Ka tupaki ana i ta kotou au auri arote ei koke, e ta kotou au matipi tope rakau ra ei korare: ka tuatuaʼi tei apikepike ra, Kua maroiroi au.

11 E akaputuputu kotou, e ka aere mai, e te au etene ravarai, e akaputuputu kotou e pini ua ake: ka tuku maira koe, e Iehova, i toou aronga ririnui ki raro i reira.

12 Kia akaaraia mai te au etene, kia aere mai oki ki runga i te o o Iehosaphata: ei reira au e noo ei e akava i te au etene katoa e pini ua ake.

13 Ka tuku ana kotou i te matipi sitona ki roto, kua para oki te mou: taki aere kotou, ka aere ki raro; kua ki oki te taomianga, kua maringi na runga i te au āriki; kua maata oki ta ratou ara.

14 E manganui, e manganui i te o e akatakaiaʼi ra: kua vaitata oki te rā o Iehova i te o e akatakaiaʼi ra.

15 E akapoiriia te rā e te marama, kare oki te au etu e kakā mai.

16 E ngunguru mai a Iehova i Ziona, e e akapuroro mai i tona reo i Ierusalema; e ngaueue oki te au rangi e te enua: e riro rā Iehova ei akapuanga no tona ra iti-tangata, e ei punanga no te au tamariki a Iseraela.

17 E kite oki kotou e, ko to kotou Atua ra au, ko Iehova, e tei Ziona te noo anga, toku maunga tapu ra; e tapu oki Ierusalema, e kare te tangata ke ke e aere akaou na roto.

18 E riro oki i taua rā ra, e akatopata mai ei te au maunga i te wina ou, e taʼe a vai oki te au tuaivi i te u, e taʼe oki te vai i te au kauvai katoa i Iuda ra, e pupui mai oki tetai punavai i te are o Iehova, e ka tamauu iora i te o ra o Sitima.

19 Kua tanea Aiphiti, ka riro oki Edoma ei medebara motutaa ua, i to ratou takinga-kino anga i te tamariki a Iuda, no te mea kua maringi ia ratou te toto ara kore i to ratou ra enua.

20 E tika ra Iuda i te noo anga e tuatau ua atu, e Ierusalema i tera uki, i tera uki.

21 E tamā atu oki au i to ratou toto kare i tamāia ra: e noo oki a Iehova i Ziona.