Deuteronomi

20 KIA aere koe e tamaki i to au enemi, e kite atura koe i te oro-enua e te kariota, te tangata maata rava, e iti koe ra, auraka e mataku ia ratou; tei ia koe oki toou ra Atua ko Iehova, ko tei arataki mai ia koe mei te enua maira mei Aiphiti.

2 E kia vaitata kotou ki te tamaki ra, ei reira te taunga e aere mai ei i vaitata ki te au tangata,

3 Ka tuatua mai ei kia ratou, E akarongo mai, e Iseraela e! Kua vaitata kotou ki te tamaki i to kotou au enemi i teianei rā: auraka rava e taitaia to kotou ngakau, auraka e mataku, e auraka e rutetetete, auraka e tumatetenga ua atu ia ratou;

4 Te aere katoa nei oki to kotou Atua ko Iehova e tamaki i to kotou au enemi, e ei akaora ia kotou.

5 E na te ui rangatira ra e karanga atu ki te au tangata ra, ka na ko atu ei, Koai te tangata i akatu ana i te are ou e kare i ai i taua are ra? e oki aia e aere ki tona ngutuare ra, ko te mate aea aia i te tamaki, e na tetai tangata ke atu e āi.

6 Koai te tangata i tanu ana i te kainga vine, e kare i kai i to taua kainga vine ra? ka oki aia e aere ki tona ngutuare, ko te mate aea aia i te tamaki, e na tetai tangata ke atu e kai.

7 Koai te tangata i momoko ana i te vaine, e kare rai i akaipoipo iaia ra? ka oki aia e aere ki tona ngutuare, ko te mate aea aia i te tamaki, e na tetai tangata ke atu e akaipoipo iaia.

8 Ka tuatua akaou rai oki te aronga rangatira ki te au tangata, e na ko rai ratou, Koai te tangata i mataku, e kua akataeau te ngakau? e oki aia e aere ki tona ngutuare, ko te akataeau katoa aea te ngakau o tona ai taeake mei iaia katoa ra.

9 E kia akaoti akera ta te aronga rangatira ra tuatua anga ki te au tangata, ei reira ka akatakaiaʼi te au rangatira no te au nuku ra, ei na mua i te au tangata.

10 Kia aere vaitata koe ki tetai oire e tamaki ra, ei au taau e apai atu.

11 E kia apai mai taua oire ra i te tuatua akamoeau ra, e kia eeu mai i te au pa ra ia koe, ka riro te au tangata katoa ki roto i taua oire ra ei tavini noou, e ei tautaūnga naau, i reira.

12 Kia kore ra e akatika mai i te au naau ra, e tamaki mairai kia koe, e rave koe i te reira e tamaki:

13 E kia tukuia mai e to Atua ra e Iehova taua oire ra ki to rima, e ta koe i te au tane ravarai i roto ra ki te mata koke;

14 Kareka te au vaine, e te tamariki, e te au puaka, e te au mea katoa i roto i taua oire ra, e te apinga tini ravarai, ka rave koe naau uaorai; ka kai oki koe i tei aōia i to au enemi ra, ta to Atua ta Iehova i oronga mai kia koe ra.

15 Kia akapera koe ki te au oire katoa i te mamao ke ra, kare i te au oire no teianei au iti-tangata.

16 Kareka to teianei aronga oire ta to Atua ta Iehova e oronga mai noou ei nooanga, auraka rava tetai mea e uti i te aʼo e vaoo oraia e koe;

17 Ka akapou takiri rava koe ia ratou, koia te ngati Heta ra, e te ngati Amori, te ngati Kanaana, e te Perizi, te ngati Hevi, e te ngati Iebusi; ta to Atua ra ta Iehova i akaue mai ia koe ra;

18 Ko te akakite mai aea ratou ia kotou kia rave i ta ratou au mea viivii katoa i raveia e ratou i to ratou ra au atua; e ara atura kotou i to kotou Atua ia Iehova ra.

19 Kia roa koe i te akapini anga atu i tetai oire i te tamaki anga atu kia rauka, auraka koe e tipu i te au rakau kai ki te tarapa; e riro oki koe i te kai i to reira, auraka koe e tipu i te reira: e tangata ainei taua rakau o te kainga ra, kia aravei ia koe i te tamaki anga?

20 Ko te au rakau ra taau i kite ra, kare te rakau kai, ko te reira anake ra taau e tipu, e akapou; e ka akatu koe i te au punanga tamaki i te oire e tamaki mai ia koe ra, e kia pou atu.