Ieremia

43 E OPE akera ta Ieremia tuatua i te tangata katoa ra, i te au tuatua katoa a to ratou Atua, a Iehova; i tonokia mai ei aia e to ratou Atua ra e Iehova, kia ratou i teia katoa nei au tuatua;

2 Kua tuatua mairā Azaria, te tamaiti a Hosaia, e ko Ioanana, te tamaiti a Karea, e te au tangata ngakau parau katoa ra, i te na ko anga kia Ieremia ra, E pikikaa taau i tuatua mai: kare to matou Atua ra, ko Iehova, i tono mai ia koe kia tuatua mai e, Auraka kotou e aere ki Aiphiti ka noo ei i reira:

3 Ko Baruka ra, te tamaiti a Neria ra, te akakoko ïa ia koe ia matou nei, kia tukuia matou ki te rima o te Kaledea, kia mate matou ia ratou, e kia apai tuikaa ia matou ki Babulonia.

4 Kare akerā Ioanana, te tamaiti a Karea ra, e te au rangatira katoa o te au nuku ra, e te tangata katoa ra, i akarongo i te reo o Iehova, kia noo ua i te enua ra o Iuda.

5 Kua rave akerā Ioanana, te tamaiti a Karea ra, e te au rangatira katoa o te au nuku ra, i te toenga ravarai o Iuda, ko tei oki mai mei te au enua katoa i tuaruia atu ei ratou ra, kia noo ki te enua ra i Iuda;

6 I te au tane, e te au vaine, e te au tamariki, e te au tamaine a te ariki ra, e te au tangata katoa i vaooia e te rangatira o te au vaeau ra e Nebuzaradana, ia Gedalia, te tamaiti a Ahikama, te tamaiti a Saphana, e te peroveta ra ko Ieremia, e ko Baruka, te tamaiti a Neria ra.

7 Tomo iora ratou i te enua ra i Aiphiti: kare oki ratou i akarongo i te reo o Iehova: e tae atura ratou ki Tahapene.

8 Kua tae maira te tuatua a Iehova kia Ieremia i Tahapene, na ko maira

9 Ka rave koe i etai toka maata i to rima na, ka patu ei ki roto i te ngaika ra, i te ara karakaraea, i te tomoanga i te are o Pharao, i Tahapene, ki mua i te aroaro o te au tangata o Iuda ra,

10 Ka karanga atu ei koe kia ratou, te na ko mairā Iehova Sabaota ra, te Atua o Iseraela; I na, e tono au e arataki mai i toku tavini i te ariki o Babulonia ra ia Nebukanesa, e akamou au i tona terono ki runga i eianei puke toka i uunaia e au nei; e nana e totoa i tona āriki terono na rungao ra.

11 E kia aere mai aia ra, ka ta aia i te enua nei i Aiphiti; i to te mate ra, ei te mate ïa; e to te tuikaa ra, ei te tuikaa ïa; e to te koke ra, ei te koke ïa.

12 E tutungi oki au i te ai ki roto i te are o te au atua o Aiphiti; e nana ratou e taʼu ki te ai, e ka apai tuikaa aia ia ratou: e kakau oki aia iaia uaorai i taua enua ra ia Aiphiti, mei te tiaki mamoe e kakau i tona ra kakau; ka aere atu ei aia mei reira atu ma te au.

13 E nana e vavaʼi i te au tiki i roto i te are o te rā ra, i te enua ra i Aiphiti; e te au are o te au atua i Aiphiti ra, nana ïa e taʼu ki te ai.