Ieremia

23 AUE te au tiaki, e tei akapou, e kua akapueurikiriki i te au mamoe taku e angai ra, te tuatua mairā Iehova!

2 Te na ko maira oki te Atua no Iseraela, ko Iehova, i te aronga tiaki, tei angai i toku ra au tangata; Kua akapueurikiriki kotou i taku anana, e kua arumaki keia, e kare kotou i atoro ua atu ia ratou: i na! ka tutaki atu au ia kotou i te kino ta kotou i rave, te tuatua mairā Iehova.

3 E akaputuputu maira au i te totoenga o taku anana, i te au enua katoa i iaia atu ei ratou e au ra, e akaoki mai au ia ratou ki ta ratou uaorai koro; e ka riro oki ratou i te tupu e maata ua atura.

4 E tuku oki au i te tiaki ki rungao ia ratou, te ka angai ia ratou ra: kare atura ratou e mataku akaou, kare oki e tumatetenga, e kare oki tetai e ngaro, te tuatua mairā Iehova.

5 I na, e tae maira te au rā, te tuatua mairā Iehova, e akatupu ei au i tetai Rara tuatua-tika no Davida, e e tutara oki tetai ariki, e e manuia, e ka rave i te tuatua-tau, e te tuatua-tika, i te enua nei.

6 I tona ra au rā e ora ai Iuda, e e noo mataku kore ei Iseraela: e teia oki te ingoa e tapaia nona, Ko Iehovah ta tatou tuatua-tika ra.

7 E teianei, i na, te tuatua mairā Iehova, e tae maira te rā, e kore ei ratou e tuatua akaou e, Te ora rā Iehova, ko tei arataki mai i te tamariki a Iseraela, mei te enua ra i Aiphiti:

8 Kareka, te ora rā Iehova, ko tei apai mai, e kua arataki, i te uanga o te ngutuare o Iseraela, mei te enua i te pae i apatokerau ra, e mei te au enua katoa i tuaruia atu ei ratou e au ra, ka noo oki ratou ki runga i to ratou uaorai enua.

9 No te au peroveta i paruparu ravaʼi toku ngakau i roto iaku nei, e kua ruketekete toku au ivi katoa nei; kua riro au mei te tangata i kona ra, e mei te tangata i vi rava i te wina ra, no Iehova, e te au tuatua tapu nana ra.

10 Kua ki oki te enua nei i te aronga akaturi; e no te taumaa i aue ei te enua; kua marō te au ngai ngangaere o te medebara; kua kino to ratou aerenga, e kare oki to ratou ririnui i tika.

11 Te peroveta katoa, e te taunga, kua kanga anake ïa; te kite nei au i to ratou kino i roto i toku are nei, te tuatua mairā Iehova.

12 E teianei, e riro to ratou arataa mei te ngai pateka i roto i te poiri, e arumakiia ratou, e e inga i reira: e apai mai oki au i te kino ki runga ia ratou, te mataiti oki e tutakiiaʼi ratou, te tuatua maira Iehova.

13 Kua kite oki au i te mea neneva i te au peroveta i Samaria ra; kua totou oki ratou ia Baala, e kua akatareva ke ratou i toku ra iti-tangata ia Iseraela.

14 Kua kite oki au i te mea rikarika i te au peroveta i Ierusalema: i te rave anga i te akaturi, te aere anga ma te pikikaa, kua akamaroiroi ratou i te rima o te aronga rave kino, e kare atura te tangata e ariu mai i tona ra kino; kua riro anake ratou mei ia Sodoma iaku, e tei noo i reira mei ia Gomora.

15 E teianei, te na ko mairā Iehova Sabaota, i te au peroveta ra; I na, e angai au ia ratou ki te kai maamaa e o atu i te vai kavangu no ratou, ei inuanga: no te mea, na te au peroveta i Ierusalema te riro anga atu te tuatua kanga, e pini ua akenei te enua katoa nei.

16 Te na ko mairā Iehova Sabaota, Auraka e akarongo atu i te tuatua a te au peroveta, ko tei totou ia kotou: tei akapikikaa ia kotou ki te mea puapinga kore: kua tuatua i te orama no to ratou uaorai ngakau, e kare i to roto i te vaa o Iehova.

17 I te tuatua ua anga atu ki te aronga i akavaavaa mai iaku ra, Kua tuatua mai a Iehova e, Ei au to kotou; te aaere ua ra te tangata katoa i te inangaro o tona uaorai ngakau, ka na ko uaʼi ratou e, Kare kotou e rokoia e te kino.

18 Koai oki tei o i te uruoaanga a Iehova, e kua akara atu, e kua akarongo atu, i tana tuatua? koai tei akono tikai i tana tuatua, e kua akarongo atu?

19 I na, te puaioio a Iehova, te riro atura ma te viviki, e puaioio akapou maata rava: ei runga i te mimiti o te aronga kino ra e topa viviki atu ei.

20 Kare te riri o Iehova e oki, e kia raveia e ia, e kia akatupuia e ia, te au akakoro anga o tona ngakau; kia tae ki te au rā openga ra e kite pu tikai kotou i te reira.

21 Kare au i tono i taua au peroveta ra, na ratou uaorai i oro ua: kare au i karanga atu kia ratou, na ratou uaorai i totou ua:

22 Naringa ra ratou i o i toku ra uruoaanga ra, e i akakite i taku tuatua ki toku ra iti-tangata, kua akaariuia ratou i to ratou ra aerenga kino, e te kino ta ratou i rave ra, i reira.

23 E Atua vaitata ainei au, te tuatua mairā Iehova, e kare i te Atua no te atea ke ra?

24 E tika iaai kia uuna iaia uaorai i te au ngai ngaro ra, e kia kore e kitea atu e au ra? te tuatua mairā Iehova. Kare ainei tei kapi te au rangi e te enua katoa iaku nei? te tuatua mairā Iehova.

25 Kua kite au i ta te au peroveta i karanga ra, tei totou pikikaa ua ma toku ra ingoa, i te na ko anga e, E moe taku, e moe taku.

26 Mei te aa ra te roa o te reira i te vai ua anga ki roto i te ngakau o te au peroveta, tei totou mai i te pikikaa? e au peroveta oki no te pikikaa o to ratou uaorai ngakau ra.

27 Te manako ra kia akangaropoina toku iti-tangata i toku nei ingoa, i ta ratou au moe, ta ratou ravarai e akakite ra ki tona uaorai tangata tupu, mei to ratou ai metua i akangaropoina i toku ingoa ia Baala.

28 E moe ta te peroveta ra, e akakite mai aia i tana ei moe; e tei iaia taku ra tuatua, e tuatua aia i taua tuatua naku ra ma te tika. Eaa to te ota i te sitona ra? te tuatua mairā Iehova.

29 Kare ainei taku tuatua nei mei te ai? te tuatua mairā Iehova; e mei te amara, i pueurikiriki ei te mato ra?

30 E teianei, i na, kua riri au ki te au peroveta, te tuatua mairā Iehova, tei keia mai i taku tuatua, ko te tangata ko tona uaorai tangata tupu.

31 I na, kua riri au i te au peroveta, te tuatua mairā Iehova, tei akapateka i to ratou arero, ka na ko ei e, Te tuatua maira aia.

32 I na, kua riri au i te au peroveta moe pikikaa ra, te tuatua mairā Iehova, ko tei akakite i te reira ra, e kua akatareva ke i toku ra iti-tangata, i ta ratou pikikaa, e ta ratou akatietie anga; kare ra au i tono ia ratou, kare oki i akaue ua atu ia ratou: kare rava oki teianei iti-tangata e puapingaia ia ratou, te tuatua mairā Iehova.

33 E kia ui mai teianei iti-tangata ia koe, e tetai peroveta, e tetai taunga, kia na ko mai e, Eaa te apainga na Iehova? e na ko koe ia ratou i reira, Eaa ïa apainga? e akaruke atu au ia kotou, te tuatua mairā Iehova.

34 E te peroveta, e te taunga, e te au tangata ra, e tuatua mai, Te apainga na Iehova; e tutaki atu au i taua tangata ra, e tona katoa ra ngutuare.

35 E na ko anake kotou kia tuatua, ko te tangata ko tona uaorai tangata tupu, ko te tangata ko tona uaorai taeake; Kua akapeea mairā Iehova? e, Eaa ta Iehova tuatua?

36 Kareka te apainga na Iehova, auraka kotou e taiku akaou i te reira; ko ta te tangata ra tuatua, ko tana ïa apainga; kua ruri ke oki kotou i te tuatua a te Atua ora ra, i ta to tatou Atua ra, ta Iehova Sabaota ra.

37 E na ko atu koe ki te peroveta ra, I peea mairā Iehova ia koe ra? e, Eaa ta Iehova tuatua?

38 I māro ra kotou i te tuatua e, Te apainga na Iehova; te na ko mairā Iehova i te reira, No te mea te tuatua ra kotou i teianei tuatua, Te apainga na Iehova, tono ua rai au i te karere kia kotou, i te na ko anga atu e, Auraka kotou e tuatua e, Te apainga na Iehova;

39 E teianei, i na, ko au nei, ka akangaropoina takiri au ia kotou, ka akaruke atu ei au ia kotou, e te oire taku i oronga atu ia kotou, e to kotou ai metua ra, e taka ke atu ïa i toku mata nei.

40 E tuku mai oki au i te akakino mutu kore ki runga ia kotou, e te akama mutu kore, kare rava e ngaro ra.