Daniela

8 I TE toru o te mataiti i te au o te ariki ra ko Belesazara, kua mama maira tetai orama kiaku, kia Daniela nei, i muri ake i tei mama mai kiaku i tei muatangana o tona au.

2 Kite akera au i tetai orama; i roto au i te are ariki ra i Susana, i taua kite anga noku ra, i te matakeinanga ra i Elama; kite akera au i te orama, e tei te pae kauvai ra au i Ulai.

3 Kua nānā akera au i taku mata, e kite akera au, e i na, te tu ua maira ki mua mai i taua kauvai ra tetai mamoe toa e rua ona tara, e puke tara teitei; e teitei roa ra to tetai i tetai, e ko tei teitei ra, i muri ake ïa tona tupu anga.

4 Kite atura aui taua mamoe toa ra i te oparapara anga ki te pae ki te opunga o te rā ra, e te pae ki apatokerau, e te pae ki apatonga; e kare rava e puaka ke e mou ki mua iaia, kare rava oki e akaora i tona ririnui; kua rave ua ra aia i tona uaorai inangaro, e tupu atura aia ki te maata anga.

5 E te maaraara ua ra au, e i na, te aere maira tetai puaka-nio toa, mei te pae i te opunga o te rā ra, na runga ua i te enua, e kare akera i tukia ki te one ra: e tara tu ke to taua puakanio ra, tei rotopu i te va mata ra.

6 Kua aere maira aia ki taua mamoe toa tara rua ra, taku i kite i te tu anga ki mua mai i te kauvai ra, e kua oro atura aia ki runga iaia i te otooto anga o tona ririnui.

7 Kite atura au iaia i te tae anga ki vaitatao i taua mamoe toa ra, e kua tupu atura tona riri iaia, tui atura i taua mamoe toa ra, e aati atura nga tara ona e rua ra: e kare rava e ririnui o te mamoe toa e mou ei ki mua iaia, kua opara ra aia iaia ki raro i te one, e kua takatakai ki rungao iaia: e kare o te mamoe toa e akaora i tona riri.

8 Tupu atura taua puaka-nio toa ra i te maata rava anga; e kia ririnui aia ra, aatiia iora te tara maata ra; e i monokia mai i nga tara tu ke e a ra, i anga ki nga matangi e a o te rangai ra.

9 Kua tupu maira tetai tara mea ngiti no roto i tetai o raotu ra, ko tei tupu e maata ua atura i te pae ki apatonga, e te pae ki te itinga o te rā ra, e te pae ki te enua mataora ra.

10 Tupu atura oki e taea ravaia te nuku o te rangi ra; e kua titiri maira i tetai pae o taua nuku ra e te au etu ki raro i te one, e kua takatakai iora ki runga ia ratou.

11 Kua akamaata atura aia iaia uaorai i te ariki o taua nuku ra, akakoreia iora e ia te atinga no te au rā ra, e tona ngai-tapu ra kua kua uriia ïa ki raro.

12 E kua tukuia atura te nuku, e te atinga no te au rā ra, no te ara, e kua akaruke aia i te tuatua-mou ki raro i te one, e kua rave oki aia, e manuia atura.

13 Kua akaronga atura au i tetai tangata tapu i te tuatua anga mai, e kua karanga atura oki tetai tangata tapu kiaia i tuatua mai ra, Mei te aa ra te roa o te orama no te atinga o te au rā nei, e te ara akatanea ra, e orongaiaʼi te ngai-tapu, e te nuku, kia takatakaiia ki raro ake i te vaevae?

14 Kua tuatua maira aia kiaku, E rua tausani e toru anere i te rā; ei reira te ngai-tapu e tamāiaʼi.

15 E kite akera au, ko Daniela, i taua orama ra, e kia kimi oki au i te aiteanga, i na, te tu ua maira kia mua iaku mei te tangata te tu i reira.

16 E kua akarongo atura au i te reo tangata i rotopu i nga nia kauvai ra ia Ulai, i te kapiki anga, e te na ko anga e, E Gaberiela, e akataka ana koe kia kite teianei tangata i te orama nei.

17 Kua akavaitata maira aia ki te ngai i tuia e au ra; e tae maira aia, kua mataku iora au, e kua tipapa iora au ki raro i taku mata: kua tuatua maira ra aia kiaku, Kia kite mai oki koe e te tamaiti a te tangata; ei te tuatau openga e tupu ei taua orama nei.

18 E te tuatua ua maira aia kiaku ra, inga tumatetenga iora au ki raro taku mata i te one: kua akatukia maira ra aia iaku, e kua akatu iaku ki runga.

19 E kua tuatua maira aia, I na, e akakite atu au ia koe i te ka tupu i to openga tikai o taua riri akaoko ra; i te tuatau oki i akonoia ra, ko te openga iora ïa.

20 Ko te mamoe toa taau i akara ma nga tara e rua ra, ko nga ariki ïa no Madai e no Peresia.

21 E ko te puaka-nio toa uruuru ra, ko te ariki ïa no Eleni: e te tara maatai rotopu i te va mata ra, ko te ariki muatangana ïa.

22 E aatiia iora te reira, e monokia iora e a katoa ra, ko nga basileia ïa e a e tu mai no roto i taua enua ra, kare ra i tona mana.

23 E i te openga mai o to ratou basileia, kia rava te aronga ara ra, e tu mai ei tetai ariki ma te mata toa, e te kite oki i te au mea e vare ei ra.

24 E e ririnui maata tona, kare ra i te ririnui nona uaorai, e riro oki tana akapou anga ei mea umereia, e ka manuia, e ka rave atu rai; e pou oki iaia te aronga maroiroi, e te aronga tapu ra.

25 E no tona pakari e tupu ei te pikikaa i tona rima; e akamaata oki tona uaorai ngakau iaia uaorai, e e manganui te ka pou iaia i te au: e tu mai oki aia e māro ki te Ariki o te au ariki; e aatiia ra aia e kare e rima.

26 E te orama o te aiai ra e te popongi i akakiteia ra, e tuatua-mou ïa: e teianei e kokapi ana koe i taua orama nei, e roa oki tona au rā.

27 Rere a mate ua iora au ko Daniela, e makiia iora au i etai puke rā; e muri akera kua tu akera au, e kua rave i te angaanga a te ariki ra; e va ua iora au i taua orama ra, kare ra e tangata i kite.