Isaia

17 TE TUATUA ia Damaseko ra. I na, ka apai keia Damaseko ra e kare atura e oire, ka riro ra ei ututua puapinga kore.

2 Ka akaruke roaia te au oire o Aroera: ka vaooia na te au anana, e moe ratou ki raro, e kare ua e tangata e akamataku atu.

3 E kore oki te punanga i Epheraima, e te au i Damaseko ra, e te toenga o Arama ra: e riro oki ratou mei te kakā o te au tamariki a Iseraela, te tuatua mairā Iehova Sabaota ra.

4 E kia tae ki taua rā ra, e iti ei te kakā o Iakoba, e riro oki te poria o tona kopapa ei ikoke.

5 E riro oki mei te tangata kia akaputuputu i te sitona ra, e kua kokoti maira tona rima i te au kaui sitona; ka riro ïa mei te koi aere anga i te au kaui sitona i te o ra i Rephaima.

6 E manga toenga te ka vaooia, mei tei te ruru anga olive ra, taki rua ake e taki toru ake mea ua ki runga i te tamoko o te rara teitei roa ra; taki a oki e taki rima ki runga i te au rara uua ra; te tuatua maira te Atua o Iseraela ko Iehova.

7 I te reira rā e akono ei te tangata i Tei anga iaia ra, e akaraʼi oki ona mata ki Tei Tapu i Iseraela ra.

8 Kare aia e akono i te au atarau i te angaanga a tona rima, kare oki e akara i ta tona uaorai maikao-rima i anga ra, e te au Asetoreta ra, e te au tiki rā ra.

9 I te reira rā e riro ei te au oire i akaketaketaia ra mei tei akarukeia i te ngangaere, e i te vaorakau teitei, ko tei akarukeia e ratou ki mua i te aroaro o te tamariki a Iseraela ra: e ka tanea rava akera ïa.

10 No te mea kua akangaropoina koe i te Atua e oraʼi koe ra, e kare koe i akamaara i te papa e maroiroi ei koe ra: kia tanu koe i te rakau manea ra, e kia tanu oki i te kopura no tetai one ke ra:

11 Akapini ua rai koe i te reira ki te koro i te rā i tanu ei koe ra; e pua ua rai taau i tanu ra i te popongi; ka riro ke ra te mou i te rā e raukaʼi, e e riro ïa ei aue anga kore.

12 Aue te aruru o te urupu tangata e manganui ua atu, me te aruru tai ra to ratou aruru anga; te aruru o te pa enua e, mei te aruru o te tai maata ra to ratou aruru.

13 E aruru ua rai te pa enua mei te aruru o te tai maata ra: e kauvae maira aia ia ratou, e e oro ke atu ratou; e akapueuia ratou mei te ota i runga i te tuaivi ki mua i te matangi ra, e mei te teita ra ki mua i te puaioio ra.

14 I te aiai ra, i na, e tumatetenga! kare oki e ao ra, e kare ua ratou! Ko te tuanga teia a te aronga i takingakino ia tatou; ko te tuanga teia a te aronga i āru ia tatou nei.