Hosea
8 EI to vaa na te pu. E tae mai aia mei te aeto e rave i te are o Iehova, no te mea kua akaatikau ratou i te koreromotu naku nei, e kua ara ratou i taku nei ture.
2 E riro ratou i te kapiki mai iaku nei, E taku Atua, kua kite matou nei, ko Iseraela, ia koe.
3 Kua akaruke Iseraela i te meitaki: ka arumaki mai te enemi iaia.
4 Kua akaiki ratou i te au ariki, kare ra iaku nei, kua akataoonga i te au tutara, kare ra au i kite: kua anga ratou i ta ratou ario e ta ratou auro ei idolo, no ratou uaorai kia tipu keia ratou.
5 E mea rikarika taau punua puakatoro, e Samaria e; kua kā taku riri ia ratou: mei te aa te roa o to ratou rauka kore anga i te apa kore?
6 Na Iseraela anake oki taua mea ra; na te taunga i anga, kare oki te reira i te Atua: e riro tikai oki te punua puakatoro a Samaria ei mura ai.
7 Kua ruru oki ratou i te matangi, e ka kokoti ratou i te puaioio: kare ona e tumu, kare e faraoa e rauka no roto i te ua, e kia rauka ra, na te tangata ke ke ïa e apuku i te reira.
8 Kua apukuia Iseraela: e teianei e riro ratou i roto i te au enua nei mei te āriki kare rava e tauia atu.
9 Kua riro oki ratou ki Asura, mei te asini moamoavao koia anake uaorai: kua ou Epheraima i te aronga e inangaro mai.
10 Kua ou aere rai oki ratou i etai aronga i rotopu i te au etene, e akaputuputu rai au ia ratou i teianei, kare oki ratou e roaia kua mamae i te apinga uipa a te ariki o te au tutara.
11 No te mea kua akamaata Epheraima i te au atarau ei ara, e riro te au atarau ra ei ara nana.
12 Kua tata au kiaia i te au mea e manganui o taku nei ture, kua akariroia ra te reira ei mea tu ke.
13 I te apai anga i taku au atinga kua apai ratou i te kiko, e kai iora; kare a Iehova i kite mai ia ratou; e teianei, e akamaaraʼi aia i to ratou kino, e tutaki atu ei oki i ta ratou au ara: e oki ïa ratou ki Aiphiti.
14 Kua akangaropoina oki Iseraela i Tei Anga iaia ra, e kua patu i te au marae; kua akamaata oki Iuda i te oire akaketaketaia: e unga atura au i te ai ki runga i te au oire nona, e kā oki tona au are nunui i te reira.