2 Ariki

21 TEI te mataiti okotai ngauru ma rua i ariki ei a Manase, e rima ngauru ma rima ona mataiti i te ariki anga i Ierusalema. Ko Hepheziba te ingoa o tona metua vaine.

2 Kua rave ra aia i te kino i mua i te aroaro o Iehova, mei te au mea viivii a te pa enua, ta Iehova i tuaru ke ki mua i te tamariki a Iseraela ra.

3 Kua akatu akaou oki aia i te au ngai teitei i vavaʼiia e tona metua ra e Hezekia; e kua akatu aia i te atarau na Baala, e kua anga i te Asetoreta, mei ta te ariki o Iseraela, mei ta Ahaba; e kua akamori i te nuku katoa o te rangi ra, e kua akono atura ia ratou.

4 E kua akatu aia i te au atarau i roto i te are o Iehova, tei tuatuaia maira e Iehova e, Ei Ierusalema toku nei ingoa vai ei.

5 Kua akatu oki aia i te au atarau no te nuku katoa o te rangi, i roto i nga paepae e rua i te are o Iehova.

6 E kua tuku aia i tana uaorai tamaiti na te ai; e kua akara oki i te tumurangi, e te akarakara, e te taura vaerua kino, e te purepure; e ravenga kino maata tana i mua i te aroaro o Iehova, ei akakoko iaia kia riri.

7 E kua akatu aia i te idolo kotikotiia no Asetoreta, nana i anga, ki roto i te are, ta Iehova oki i tuatua mai kia Davida, e ki tana tamaiti kia Solomona, Ei roto i teianei are, e i Ierusalema, i ikiia e au no roto i te au kopu katoa o Iseraela, ka vaoo ei au i toku nei ingoa e tuatau ua atu:

8 Kare oki au e apai ke akaou i te vaevae o Iseraela i te enua i orongaia e au ki to ratou ai metua; kia akamako ra ratou e kia rave i te au mea katoa taku i akaue atu kia ratou ra, e te au mea katoa a te ture ta toku tavini ta Mose i ikuiku ia ratou ra.

9 Kare ra ratou i akarongo, e maata ra ta ratou kino i rave i te pikikaa a Manase ra, i ta te pa enua ravarai i pou ia Iehova i mua i te aroaro o te tamariki a Iseraela ra.

10 Kua tuatua mairā Iehova i tona au tavini i te au peroveta ra, na ko maira,

11 No te mea, na te ariki o Iuda na Manase i rave i teianei au mea viivii, e kua maata rava te kino tana i rave i ta te ngati Amori i mua iaia ra, e kua ara katoa Iuda iaia i tona au idolo:

12 E teianei, te na ko maira te Atua o Iseraela ko Iehova, I na, kua vaitata au i te apai mai i te kino ki runga ia Ierusalema e ia Iuda, ka poturi nga taringa ravarai e rua o te aronga katoa e akarongo ra.

13 E tataki au i te ao o Samaria ki runga katoa ia Ierusalema, e te aite o te ngutuare o Ahaba; ka tamā au ia Ierusalema mei te tangata e tamā i te kapu ra; i te orei anga, e te tatipoki anga i to runga pae ki raro.

14 E akaruke oki au i te toenga o taku ra tuanga, e ka tuku atu ia ratou ki te rima o to ratou ra au enemi; ka riro ratou ei noninga, ei auinaanga na to ratou au enemi:

15 No te mea kua rave ratou i te kino ki mua iaku nei, e kua akakoko mai ratou iaku kia riri, mei te rā mairai i tae mai ei to ratou ai metua mei Aiphiti mai, e tae rava akenei ki teianei rā.

16 Maata roa atu oki te toto i maringi ara kore ua ia Manase, e ki rava akera Ierusalema, mei tetai pae mai e tae akera ki tetai pae; te taka ra te ara i ara ai Iuda iaia, i te rave anga i te kino i mua i te aroaro o Iehova ra.

17 E te toenga o te tuatua ia Manase, e tana katoa i rave ra, e te ara i raveia e ia ra, kare ainei kua tataia ki roto i te buka, te tuatua no te au rā o te au ariki o Iuda ra?

18 Moe iorā Manase ki o tona ra ai metua, e tanumia iora ki roto i te kainga i tona uaorai are, i te kainga o Uza ra: tupauia akera aia i te au e tana tamaiti ra e Amona.

19 Tei te mataiti tai takau ma rua o Amona i ariki ei aia, e rua oki ona mataiti i te ariki anga i Ierusalema. Ko Mesulemeta te ingoa o tona metua vaine, e tamaine na Haruza no Iotaba.

20 Kua rave ra aia i te kino i mua i te aroaro o Iehova, mei ta tona metua ra mei ta Manase i rave ra.

21 Aere atura aia na te arataa i aereia e tona ra metua, e te au idolo i akamoriia e tona ra metua kua akamori katoa aia, e kua tavini atu ia ratou:

22 Akaruke iora aia i te Atua o tona ra ai tupuna ko Iehova, e kare i aere na to Iehova arataa.

23 Kua kotikoti kupenga akera te au tavini o Amona iaia ra, e kua ta iora i te ariki i roto i tona uaorai are.

24 Kua ta atura ra te au tangata o te enua ra i te aronga katoa i kotikoti kupenga i te ariki ra ia Amona; e kua rave akera te au tangata o te enua ra, kua akaariki akera i tana tamaiti ia Iosia ei tupau iaia.

25 E te toenga o te tuatua ia Amona tana i rave ra, kare ainei kua tataia ki roto i te buka, te tuatua no te au rā o te au ariki o Iuda?

26 Tanumia iora aia ki roto i tona uaorai tanumanga ki roto i te kainga o Uza ra: tupauia akera aia i te au e tana tamaiti ra e Iosia.