Ieremia

4 KIA tika ia koe, e Iseraela e, i te oki mai, ka oki mai koe kiaku nei, te tuatua mairā Iehova: e kia tika ia koe i te tuku ke atu i taau au mea viivii, i mua i toku aroaro nei, kare koe e uoa aere i reira.

2 E kia taputou ra koe, Te ora rā Iehova, ma te tuatua-mou, te tuatua-tau, e te tuatua-tika; e akameitaki mai ei te pa enua ia ratou uaorai iaia i reira, e iaia rai e akatietie ei ratou.

3 Te na ko maira oki a Iehova, ki te au tangata no Iuda, e to Ierusalema, E kenu kotou i to kotou one ou ra, e auraka e ruru i te ua ki roto i te rakau taratara.

4 Ka peritome ana ia kotou uaorai no Iehova, e ka rave ke atu i te kiri mua o to kotou ngakau, e te au tangata no Iuda, e to Ierusalema: ko te otooto ua atu aea toku riri mei te ai ra, e ka iora, kare e rauka kia pi mai, no te kino o ta kotou au ravenga.

5 E akakite kotou i Iuda, e tutu aere i Ierusalema; e na ko atu, Ka akatangi ana kotou i te pu i te enua nei: e kapiki nui, ka na ko atu ei, Ka akaputuputu ia kotou uaorai, e taki aere tatou ki roto i te au oire i akaketaketaia ra.

6 Ka akatu ana i te reva kia Ziona; ka ati, auraka e akatutu mai; teia oki au ka apai mai i te kino mei apatokerau mai, e te mate maata.

7 Kua riro mai te liona no roto i tona ngai ngangaere ra; tei te ara maira te ta i te pa enua; kua akaruke aia i tona ngai, ei akatanea i toou enua; ka tamoanaia toou au oire, kare roa e tangataia.

8 Ka akakakau ana kotou ki te kakau paoa i te reira, ka kakaoa ei; ka aue ei, no te mea kare te riri maata o Iehova i akaanga keia ia tatou nei.

9 E te tuatua mairā Iehova, kia tae ki taua rā ra, e mate ei te ngakau o te ariki, e te ngakau o te ui ariki; e ka raungaraʼi te kau taunga, e ka va ua te au peroveta.

10 Kua karanga atura au, Aue! e te Atu e Iehova e! kua akatareva ke rava koe i teianei au tangata, e Ierusalema katoa, i te na ko anga e, Ei au to kotou: e kua taea ravaia te vaerua e te koke.

11 I te reira tuatau e tuatuaiaʼi ki teianei au tangata, e ki Ierusalema; E matangi veravera no ko i te au tuaivi i te medebara, i te ara o te tamaine a toku iti-tangata, kare oki te matangi tairiiri ota e te tamā;

12 E matangi maata rava ra i te reira te ka tae mai ïa iaku nei; ei teianei oki e akakite atu ei au i te akaapa kia ratou.

13 I na, mei te tumurangi aia kia aere mai, e mei te puaioio ra tona au kariota: e viviki roa tona au oroenua i to te au aeto ra, e ae oki ia tatou! kua pou oki tatou.

14 E tamā na i to ngakau i te kino, e Ierusalema e, kia ora koe. Mei te aa te roa o to manako kino i te vai ua anga ki roto ia koe ra?

15 E reo oki tei kapiki mai mei Dana maira, e te akakite ua maira i te mate mei te maunga maira i Epheraima.

16 E akakite kotou ki te pa enua; i na! e kapiki atu ia Ierusalema; te aere maira te au mata tamaki mei te enua mamao mai, e kapiki nui ratou i te au oire o Iuda.

17 E koropini ratou iaia mei te au tiaki kainga ra; no te mea kua meameaau maira aia iaku nei, te tuatua mairā Iehova.

18 No toou aerenga e taau i rave ra i rokoiaʼi koe i teia au mea nei; ko te tu ïa o toou kino; e mea maramara oki: no te mea kua tae rava atu ki to ngakau.

19 E taku ngakau, e taku ngakau e! kua mamae, kua tae rava ki te paruru o toku ngakau, kua ori ua toku ngakau ki roto iaku nei, kare e tika iaku kia muteki ua, no te mea, kua kite koe, e toku vaerua, i te tangi anga o te pu, e te aoa tamaki.

20 Ko te mate na rungao i te mate i te akakite angaia, kua pou takiri te enua katoatoa; kare e mamia, kua pou toku au are puakapa; e toku au paruru kakau, mei te kamo anga mata ïa.

21 Mei te aa ra te roa o toku akara anga atu i te reva? te akarongo anga oki i te tangi anga o te pu?

22 Kua nenevaia oki toku iti-tangata; kare ratou i kite mai iaku; e tamariki auouo ratou, kare oki o ratou kite: kua pakari ratou i te rave i te kino, kareka te rave i te meitaki, kare ua o ratou kite.

23 Akara iora au i te enua, e i na! e utonga kore, kare e marikonga! te au rangi oki, e kare ua o ratou mārama.

24 Akara iora au i te au maunga, e i na! te ngaueue ra, e te keukeu rava ra te au tuaivi katoa ra.

25 Akara iora au, e i na! kare ua e tangata; e kua rere ke te au manu katoa o te reva nei.

26 Akara iora au, e i na! te enua i ua meitaki ana ra, kua riro ïa ei medebara, e kua ope akea tona au oire i te ngaangaa, ki mua i te aroaro o Iehova, ki mua oki i te otooto anga o tona riri.

27 Te na ko maira oki a Iehova, Ka riro te enua katoatoa nei i te tanea, kare ra au e akaope takiri.

28 Ko te mea teia ka aue ei te enua nei, e kerekere ei oki te au rangi i runga ra; kua tuatua oki au, kua akakoro au, e kare au e tataraara, e kare au e oki.

29 I te mutamuta anga o te au akaoro oroenua ra, e te au toa ana ra, e ati ei te au oire ravarai; e oro ratou ki roto i te au vaorakau poiri ra; e kake ki runga i te au mato ra; e ope te au oire i te akarukeia, kare rava e tangata e noo ki roto.

30 E ko koe, e tei pou e! e akapeea ua akera koe? kakau ua rai koe ki te kakau kutekute ra, akamanea ua rai koe ki te manea auro, amo ua rai koe i to mata ki te mati; e mea puapinga kore toou akamanea anga ia koe uaorai; ka akaviivii mai taau au tane ia koe, ka kimi rai ratou ia koe e ta.

31 I akarongo ana au i te aue mei to te vaine i rokoia e te mamae anau ra, mei te aue o tei anau i tana tama mua ra; te aue o te tamaine a Ziona: te eva ua ra, te ikape ra i tona rima, i te na ko anga e, E ae oki au nei e? te taitaia ua nei toku vaerua i te aronga ta tangata nei.