Ioela

2 KA akatangi kotou i te pu i Ziona, e akateateamamao i te akatangi i toku maunga tapu nei: kia ruketekete te au tangata katoa o te enua nei: te aere maira oki te rā o Iehova, te vaitata maira;

2 E rā poiri, e te po āve, e rā tumurangi e te poiri tangotango, mei te kareureu popongi i ooraia ki runga i te au maunga: e aronga maata, e te ririnui; kare ïa e aiteanga mei taito mairai, kare oki e aiteanga i te reira a muri ake, e tae ua atu ki te au mataiti o tera uki tera uki.

3 E ai akapou tei na mua ia ratou: e e ai mura e ka nei ïa i muri ake ia ratou: mei te kainga ra ko Edene te enua ki mua ia ratou, e i muri ake ia ratou mei te tanea o te medebara ïa; e kare rava oki e apinga e toe ia ratou.

4 To ratou ra tu mei te tu ïa o te au oroenua ra; e mei te aronga akaoro ra to ratou oro.

5 Mei te aruru o te au kariota ki runga i te au take maunga ra kia rere ratou, mei te katakatatā o te ai mura e pou ei te ngangaere ra, mei te au tangata ririnui kia akamouia te tamaki ra.

6 E mamae maata to te tangata i mua ia ratou: e purautea te au mata katoa nei.

7 E oro ratou mei te tangata ririnui ra; e kake ratou i te patu mei te au tangata tamaki ra; e aere oki ratou katoa e pini ua ake na tona uaorai ara, kare oki e anga ke i to ratou tupati anga ra.

8 Kare oki tetai e tute ua atu ki tetai; e aere rai ïa i tona uaorai ara e pini ua ake, e kia inga ratou ki runga i te koke ra, kare ratou e puta.

9 E oro aere ua ratou i roto i te oire; e oro ratou na runga i te patu ra, e kake ratou ki runga i te au are; e tomo ratou na roto i te au māramārama mei te keia ra.

10 E ngaueue te enua ki mua ia ratou; e rurutakina te au rangi: ka poiri te rā e te marama, e kare akera te au etu e kakā mai:

11 E na Iehova e akakite i tona reo na mua i te nuku nana ra: kua maata ua atu oki tana puakapa: e ririnui oki tona i te akatupu anga i tana tuatua: kua maata oki te rā o Iehova, e te rikarika maata; ka tika iaai kia akakoromaki i te reira?

12 Ei teianei rai, te tuatua mairā Iehova e ariu mai kotou kiaku nei ma to kotou ngakau katoa, e ma te akakore i te kai, e ma te aue, e ma te mii:

13 To kotou ngakau te aae, e auraka to kotou kakau, ka ariu ei ki to kotou Atua, kia Iehova ra: e takinga-meitaki oki tona e te aroa, kare e rapurapu i te riri, e te tangi maata, e tataraara aia i te kino i akakiteia mai.

14 Peneiake aia ko te ariu mai, e ko te tataraara, e ko te vaoo mai i tetai meitaki i muri ake iaia ra; i tetai atinga kai, e tetai atinga inu, na to kotou Atua na Iehova.

15 Akatangi ana i te pu i Ziona, ka akatapu ana i te akakoreanga kai, ka akataka ana i tetai rā tapu.

16 Akaputuputu i te au tangata, akatapu i te aronga e uipa, akaputuputu i te aronga pakari ka akaope mai i te au tamariki, e tei ngoie i te u ra: kia aere te tane akaipoipo-ouia ki vao i tona pia, e te vaine akaipoipo-ouia ki vao mai i tona pia ngaro.

17 Kia aue te kau taunga, te au tavini o Iehova, i te va i te tomoanga e te atarau ra; kia tuatua oki ratou, E akaperepere i toou iti-tangata, e Iehova, e auraka koe e oronga i taau tuanga ei akakino anga, kia tutara te au etene ki runga ia ratou: eaa ra e tikaʼi kia tuatuaia i roto i te au tangata ra e, Teiea to ratou Atua?

18 Ei reirā Iehova e vareae ei i tona enua, e e tangi aia i tona iti-tangata.

19 E tuatua oki a Iehova, ka na ko ei ki tona iti-tangata, I na, e akaunga atu au i te sitona na kotou, te wina ou, e te manongi, e pangia oki to kotou kaki i te reira; kare oki au e akariro akaou ia kotou ei akakino anga i roto i te au etene:

20 E akataka mamao ke atu au i te nuku i apatokerau ra ia kotou, e e îîa atu au iaia ki te enua papa-marō e te tanea, e anga tona mata ki te tai i te itinga o te rā ra, e tona pae i muri ki te tai i te opunga o te rā ra, e peke oki tona aunga ki runga, e peke rai tona aunga kino ki runga, no te mea e au mea mamaata tana i rave.

21 Auraka e mataku, e te enua e, kia rekareka, e kia pereperekavana, e au mea mamaata oki ta Iehova e rave.

22 Auraka e mataku, e te au puaka o te enua e: te tupu nei oki te au one kai o te medebara, kua ua oki te rakau i tana kai, te suke e te vine te tae ua mai nei i to raua ririnui.

23 E ko kotou oki, e te au tamariki a Ziona, kia pereperekavana, e kia rekareka, i to kotou Atua ia Iehova; kua oronga mai oki aia i te ua muatangana ma te tika, e e akatopa mai aia i te ua no kotou, te ua muatangana, e te ua openga, mei tei muatangana ra;

24 E ki te ngai pāpā sitona i te sitona, e ki oki e maringi atu te au vairanga i te wina ou e te manongi.

25 E e akaoki mai au ia kotou i to te au mataiti i kaingaia e te tāpaki, te ee, e te anue, e te tāpaki akapou i taku nuku maata ra taku i tono atu ia kotou na.

26 E kai oki kotou i te manga ma te maata, e te merengo, ka akameitaki ei i te ingoa o to kotou Atua ko Iehova, ko tei tu ke tana ravenga ia kotou; kare rava oki toku ra iti-tangata e akama.

27 E kite oki kotou e tei roto au ia Iseraela, e ko to kotou Atua ra au ko Iehova, e kare atu: e kare rava toku ra iti-tangata e akama.

28 E riro oki i muri ake i te reira, e riringi atu au i toku Vaerua ki rungao i te tangata ravarai; e na ta kotou au tamariki tamaroa e ta kotou au tamaine e totou mai; e moemoeaia mai to kotou au tangata pakari: e kite oki to kotou au tangata ou ra i te orama.

29 E riringi atu au i taku Vaerua ki rungao i te au tavini tane e te au tavini vaine i te reira au rā ra.

30 E akakite oki au i te mea umere ki runga i te au rangi, e ki raro katoa i te enua; i te toto, e te ai, e te au pou auai oki.

31 E akariroia te rā ei poiri, e te marama ei toto, e tae ei i taua rā maata e te rikarika o Iehova ra.

32 E riro oki e, ko tei kapiki i te ingoa o Iehova, e ora ïa: ei te maunga ra oki ei Ziona e ei Ierusalema te ora, me ta Iehova i tuatua maira, e i roto oki i te toenga ta Iehova e kapiki ra.