Ioela

1 TE tuatua a Iehova i tae mai kia Ioela te tamaiti a Petuela.

2 Akarongo mai i teia, e te au tangata metua ra, e e anga mai i te taringa, kotou katoa tei noo i te enua nei. Tei to kotou au rā ainei teia i te tupu anga, e kare ra, tei te au rā ainei o to kotou ai metua ra?

3 E akakite ki ta kotou au tamariki i te reira, e na ta kotou au tamariki e akakite atu ki ta ratou au tamariki, e na ta ratou au tamariki e akakite ki tetai uki atu.

4 Ko tei akatoeia e te anue ra, kua pou ïa i te tāpaki ra; e tei akatoeia e te tāpaki ra, kua pou ïa i te ee ra, e tei akatoeia i te ee ra, kua pou ia i te tāpaki akapou ra.

5 Ka ara, e kotou te aronga akakona, e e aue; ka evakaku, kotou katoa i inu i te wina ra, i te wina venevene ra; kua akangereia oki to kotou vaa i te reira.

6 Kua kake mai oki tetai urupu ki runga i toku enua ra, e aronga ririnui, e kare e ope kia tatau; e nio liona to ratou nio, e tei ia ratou te nio ponga o te liona ua ra.

7 Kua pou taku vine ia ratou, e kua aati taku suke: kua oore rava ïa ia ratou, e kua akaingaia; kua teatea te au rara ra.

8 Ka aue mei te paretenia i tatuaia ki te kakau akaevaeva, i te tane o tona ou anga ra.

9 Te atinga kai e te atinga inu, kua akakoreia ïa i te are o Iehova: kua aue te kau taunga, te au tavini o Iehova.

10 Kua tanea te kainga, kua aue te enua; no te mea kua pou te sitona: kua marō te wina ou, kua iti te manongi.

11 Kia akama kotou, e te aronga tatanu ra; ka aue kotou, e te aronga tope vine, i te sitona e te kerite; no te mea kua kore te mou o te kainga nei.

12 Kua marō te vine, e kua mae te suke; te remuna, te nu tamara katoa, e te kaʼeka, kua mae te au rakau ravarai o te kainga nei; kua riorio oki te rekareka i te tamariki a te au tangata nei.

13 Ka tatua ana ia kotou uaorai, e ka aue, e te kau taunga e: e kakaoa, e te aronga raverave i te atarau ra: ka aere mai, ka moe ki roto i te kakau akaevaeva e ao ua ake, e te au tavini o te Atua e: kua akakoreia oki te atinga kai e te atinga inu i te are o to kotou Atua.

14 E akatapu ana i te akakore anga, i te kai e akataka ana i tetai rā tapu, ka akaope mai i te aronga pakari ma te aronga ravarai e noo i te enua nei, ki te are o to kotou Atua, ko Iehova, ka kapiki atu ei kia Iehova.

15 Aue i taua rā ra e! te vaitata maira te rā o Iehova, ei mate ïa oki no ko mai i te Mana-katoatoa e tae mai ei.

16 Kare ainei te kai i kokoti keia i mua i to tatou mata, te rekareka e te pereperekavana i te are o to tatou Atua?

17 Kua pe te ua rakau i raro ake i to ratou vaavaanga one, kua tanea te au are vairanga apinga, kua vavaʼiia te au are kai; kua mae oki te sitona.

18 Ko te ngunguru o te au puaka e! te tumatetenga o te au anana puakatoro, no te mea kare a ratou kai; koia ïa, kua pou te au anana mamoe.

19 Ko koe taku e kapiki atu nei, e Iehova e: kua pou oki te au one kai o te medebara i te ai, e kua kā te au rakau katoa o te kainga nei i te mura ai.

20 Te aue aere katoa nei te au puaka o te enua nei ia koe; no te mea kua marō te au vai taʼe, e kua pou te au one kai o te medebara i te ai.