Daniela

10 I TE toru o te mataiti o te ariki o Peresia ra o Kuro, i akakiteia mai ei tetai tuatua kia Daniela, ko tei tapaia ko Beletesazara; e tuatua-mou rai taua tuatua ra, ko te tuatau ra i akonoia ra, te roa ra ïa: kua kite oki aia i taua mea ra, e kua taka iaia taua orama ra.

2 I taua au rā ra i mii ua ana au nei ko Daniela e e ka toru atura ebedoma katoatoa ra.

3 Kare au i kai ana i te kai memeitaki, kare oki e puaka e te wina i o mai ki roto i taku vaa, kare oki au i akatainu iaku uaorai, e ope akera nga ebedoma e toru katoa ra.

4 E i te rā e rua ngauru ma a o te marama mua ra, iaku i noo ki te pae o te kauvai maata ra ko Tigerisi:

5 Kua nānā akera au i taku mata i reira, e kua akara atura au, e i na, e tangata, kua kakauia ki te orongā, e kua tatuaia tona taukupu ki te auro meitaki no Uphaza:

6 Kua aite tona kopapa ki te berulo, e mei te uira tona mata, e nga mata nona ra mei te mura ai ra, nga rima oki e nga vaevae nona ra, mei te veo akakakāia ra ïa, e te aruru o tana tuatua anga, mei te aruru ïa o tetai urupu maata ra.

7 Ko au anake nei ko Daniela tei kite i taua orama nei: Kare oki te au tangata i vaitatao iaku ra i kite i taua orama nei; rokoia iora ra ratou e te mataku maata, e kua oro atura e pipini.

8 Toe iora ko au anake ra, e kite atura au i taua orama maata nei, e kare atura e ririnui toe i roto iaku nei: riro atura oki toku meitaki ra mei te mea pe ra, e kare rava oku e ririnui i toe.

9 Kua akarongo ra au i te aruru o tana tuatua: e i toku akarongo anga i aruru o tana tuatua, inga tumatetenga iora au ki raro taku mata oki ki te one.

10 E i na, kua akatukia maira tetai rima iaku, tei akatu mai iaku ki runga i aku turi ma aku kapurima.

11 E kua tuatua maira aia kiaku, E Daniela, e te tangata akaperepere maataia ra, kia kite mai koe i te tuatua taku e karanga atu kia koe na, e ka tu tikai koe ki runga: i tonokia mai oki au ia koe nei i teianei. E oti akera tana tuatua anga i taua tuatua ra kiaku nei, tu ua iora au ma te ruketekete.

12 Kua tuatua maira aia kiaku i reira, Auraka e mataku, e Daniela: mei te rā muatangana mairai oki, ia koe i tuku ei i toou ngakau i te kimi anga i te kite ra, e te taakaaka anga ia koe uaorai ki mua i te aroaro o toou Atua, kua akarongoia taau au tuatua, e no taua tuatua naau ra i tae mai ei au nei.

13 Ko te ariki ra o te basileia o Peresia tei patoi mai iaku e ka rua akenei ngauru ma tai i te rā: e i na, ko Mikaela, tetai ariki maata, tei aere mai e tauturu iaku; i roaʼi oki au ki reira ki o te au ariki no Peresia ra.

14 I aere mai ei oki au i tenana e akakite kia koe i te ka tupu ki runga i to au tangata i te au rā openga ra: e manganui oki nga rā e tupu ei taua orama nei.

15 E oti akera tana tuatua anga mai kiaku i taua au tuatua nei, kua anga atura au i taku mata ki te one, e riro atura au ei murare.

16 E i na, kua akatukia mai tetai, mei te au tamariki a te tangata nei te tu, i taku ngutu: matara akera toku reo i reira, e kua tuatua iora au, na ko atura ki tei tu ua mai ki mua iaku ra, E taku Atu, kua oki mai te aue ki runga iaku i teianei orama, e kare atura e manga riri e vai nei.

17 Eaa oki e tikaʼi i te tavini o taku Atu nei, kia karangaranga atu ki taku Atu nei? kareka au nei, kare rava oku manga riri i toe i roto iaku nei, e kare rava e manga aʼo toe i roto iaku nei.

18 Kua akatukia akaou maira aia mei te tangata te tu ra iaku, e kua akamaroiroi maira iaku.

19 E kua tuatua maira aia, Auraka e mataku, e tera ra tangata akaperepere maataia ra: kia ora na koe, e akamaroiroi, koia ïa, e akamaroiroi. E oti akera tana tuatua anga mai kiaku ra, kua maroiroi iora au, e kua karanga atura, E tuatua ua mai koe, e taku Atu, kua akamaroiroi mai oki koe iaku.

20 Kua tuatua maira aia, Kua kite ainei koe i toku aerenga i aere mai ei au ia koe nei? e teianei, teia au ka oki e tamaki ei ki te ariki no Peresia: e kia riro au ra, i na, e riro i te aere mai te ariki no Eleni.

21 E akakite atura ra au kia koe i tei tataia i roto i te tuatua-mou i tataia ra: e kare rava e tauturu mai iaku i teianei au tuatua, mari ra ko to kotou ariki, ko Mikaela.