Deuteronomi

12 TEIA te au akonoanga, e te au tuatua-tau, ta kotou e akono, e e rave, i te au rā katoa i to kotou ora anga, i runga i te enua ta te Atua o to kotou na ai metua ra, ta Iehova, e oronga mai no kotou ei nooanga.

2 E tairipoti takiri kotou i te au ngai ravarai ta te au etene te ka eke ia kotou nei i araara i to ratou au atua, tei runga i te maunga teitei ra, e tei runga i te au tuaivi ra, e tei raro ake i te au rakau marumaru katoa ra:

3 E uritumu kotou i ta ratou au atarau, e vavaʼi oki i to ratou au tiki, e tutungi oki i to ratou au Asetoreta ki te ai; e tipupu oki kotou i te au tiki akatikitikiia o to ratou au atua, e e akapou atu i to ratou ingoa i taua ngai ra.

4 Auraka ra kotou kia akapera ki to kotou Atua ra kia Iehova.

5 Ko te ngai ra ta to kotou Atua ta Iehova e akono i roto i to kotou au kopu katoa ra ei vairanga no tona ra ingoa, ko tona ngutuare ta kotou e kimi, e aere tika mai oki kotou ki reira:

6 E apai tikai oki i ta kotou au atinga karakaratio ki reira, e ta kotou au atinga ra, e te kotou ngauruanga, e te atinga apaiia ki runga o to kotou rima, e ta kotou au tia, e ta kotou au atinga apai ua ra, e te anaunga mua o ta kotou au puakatoro, e ta kotou au mamoe ra:

7 E kaikai oki kotou ki reira ki mua i te aroaro o to kotou Atua ra o Iehova, e ka rekareka kotou i te au mea katoa i raveia e te kotou rima, kotou e to kotou au ngutuare, i te mea kua akameitaki to Atua ra ko Iehova ia koe.

8 Kare kotou e rave, mei ta tatou e rave ua i ko nei ra i teianei rā, ko te tangata katoa i tei tau i tona uaorai mata.

9 Kare rai oki kotou i tae ki te ngai akaangaroi anga, e te tuanga ta to kotou Atua ta Iehova e oronga nei no kotou.

10 Kia tae ra kotou ki tera pae Ioridana, e kia noo ki te enua ta to kotou Atua ta Iehova e oronga mai no kotou na ei nooanga; e kia akaanga aia i to kotou roiroi i to kotou au enemi ravarai e pini ua ake, i te noo ua anga kotou ma te au;

11 Ko te ngai ra ta to kotou Atua ta Iehova e akono i reira, ei vairanga no tona ra ingoa; e apai tika kotou i te au mea katoa taku e akaue atu ia kotou nei ki reira; ta kotou au atinga karakaratio, e ta kotou au atinga ra; ta kotou ngauruanga, e te atinga apaiia ki runga o to kotou rima, e ta kotou au tia anoano katoa, ta kotou e tia ia Iehova ra:

12 E rekareka oki kotou ki mua i te aroaro o to kotou Atua ra ko Iehova; kotou, e ta kotou au tamaroa, e ta kotou au tamaine, e to kotou au tavini tane, e to kotou au tavini vaine; e te ngati Levi i o ou ra; no te mea kare ana tuanga e te kainga i rotopu ia kotou na.

13 Kia matakite ia koe uaorai, kia kore koe e apai ua i taau au atinga karakaratio, ki te au ngai katoa taua e akara ra:

14 Ei te ngai ra ta Iehova e akono i o tetai i toou au kopu na, e apai koe i taau au atinga karakaratio ki reira, e ei reira katoa e rave ei i te au mea katoa taku e karanga atu kia koe nei.

15 E ko ua ra koe, e e kai ua i te puaka i toou au ngai ravarai, kia inangaro koe ra, i tei tau i te meitaki ta to Atua ta Iehova i oronga mai noou ra; e kai katoa te viivii i te viivii kore i te reira, kareka mei te zabi e te aili:

16 Auraka ra kotou e kai i te toto; e akataʼe kotou i te reira ki raro i te one mei te vai ra.

17 Auraka koe e kai i o ou ra i te ngauruanga o taau sitona, e taau wina, e taau inu, e te anaunga mua o taau au puakatoro, e taau ra au mamoe, e te au tia katoa taau i tia ra, e taau au atinga apai ua ra, e te au atinga apaiia ki runga o to rima ra:

18 E kai ra koe i te reira ki mua i te aroaro o to Atua ra o Iehova, i te ngai i akonoia e to Atua ra e Iehova; ko koe, e taau tamaiti, e taau tamaine, e to tavini tane, e to tavini vaine, e te ngati Levi i o ou ra; e rekareka oki koe ki mua i te aroaro o to Atua ra o Iehova, i te au mea katoa ta to rima e rave ra.

19 Kia matakite ia koe e, auraka koe e akaruke i te ngati Levi, i toou katoa ra au rā i runga i to enua na.

20 E kia akamaata to Atua ra ko Iehova i toou ra kotinga, i tana oki i tuatua mai kia koe ra, e kua tuatua akera koe e, Ka kai au i te puaka, no te mea te kaki ra koe i te puaka; e tika ia koe kia kai i te puaka, kia kaki ua atu koe ra.

21 I mamoe roa ia koe taua ngai i akonoia e to Atua ra e Iehova ei vairanga no tona ra ingoa, e tika ia koe kia ko ua e kia kai i taua ra au puakatoro, e taau ra au mamoe, ta Iehova i oronga mai naau ra, i o ou ra, kia anoano ua atu koe ra, i taku oki i akaue atu kia koe na.

22 Mei te zabi e te aili i keingaia ra, ka kai katoa koe i te reira; te viivii e te viivii kore ka kai katoa ïa i te reira.

23 Auraka takiri ra koe e kai i te toto: ko te ora oki te toto; kare oki e tika ia koe kia kai i te ora ma te kiko katoa ra.

24 Auraka rava koe e kai i te reira; ka akataʼe koe i te reira ki raro i te one mei te vai ra.

25 Auraka rava koe e kai i te reira; kia meitaki koe, e to tamariki i muri ake ia koe ra, kia rave koe i te mea tika ki mua i te aroaro o Iehova ra.

26 Ko te au mea ra i akatapuia e koe ra, e te au tia naau, e rave rai koe i te reira, e aere i taua ngai i akonoia e Iehova ra:

27 Ka apai oki koe i taau ra au atinga karakaratio, te kiko, e te toto katoa, ki runga i te atarau a to Atua ra a Iehova; e te toto o te au atinga aau ra, ka riringiia ïa ki rungao i te atarau a to Atua ra a Iehova; kareka te kiko no te reira ra e tika ia koe kia kai.

28 E akono meitaki ana e e akarongo mai i teianei au tuatua ravarai taku e akaue atu kia koe na, kia meitaki oki koe, e to tamariki i muri ake ia koe e tuatau ua atu, kia rave koe i te mea meitaki, e te mea tika, ki mua i te aroaro o to Atua ra o Iehova.

29 Kia pou te au iti-tangata ra ki mua ia koe i to Atua ra ia Iehova, i taau e aere nei e akangere, e kia tupauia ratou e koe ra, kia noo koe i to ratou enua ra;

30 E akono meitaki ia koe uaorai, kia pou ratou i mua i to aroaro ra, kia kore oki koe e ara it e atu anga atu ia ratou ra; auraka oki koe e ui ki to ratou au atua ra, i te tuatua anga e, I akapeea teianei au iti-tangata i te araara i to ratou au atua ra? e akapera katoa oki au nei.

31 Auraka oki koe e akapera i toou Atua ra ia Iehova: kua ope oki te au mea viivii katoa ta Iehova e makitakita ra i te raveia e ratou i to ratou au atua; e kua tae rava i te aʼu i ta ratou uaorai au tamaroa e te au tamaine ki te ai i to ratou au atua ra.

32 Taku e akaue atu kia kotou ra, e akono tikai i te reira, e rave ïa; auraka koe e topiri ua atu i tetai vaʼi, e auraka oki e akatopa i tetai vaʼi.