Nehemia

13 KUA tatauia iora i roto i te buka a Mose i taua rā ra, ki te taringa o te au tangata ra; e kitea iora te tuatua i te tata angaia i roto e, auraka e ngati Amona e te ngati Moabi kia o i roto i te uipa anga a te Atua e tuatau ua atu;

2 No te mea kare ratou i aravei mai i te tamariki a Iseraela ma te kai e te vai, ou atura ra ia Balaama ei rave ia ratou, e kia taumaa aia ia ratou: riro atura taua taumaa ra ei meitaki i to tatou Atua.

3 E kite akera ratou i taua ture ra, kua akataka ke atura ratou i taua aronga maata iropu ua ra ia Iseraela.

4 Kare oki te reira i tupu ra, tei ia Eliasiba taunga te akamaroiroi i te pia no te are o to tatou Atua, te piri ra aia kia Tobia:

5 E kua akonokono oki aia i tetai pia maata nona, e i reira te vaoo angaia te atinga kai i muatangana, te atinga kakara, e te au āriki ra, e te ngauru o te sitona, te wina ou, e te inu, ko tei akaueia mai na te au ngati Levi, e na te aronga imene, e te aronga tiaki ngutupa; e te au mea i apaiia na te kau taunga:

6 Kare ra au i Ierusalema i raveiaʼi taua au mea katoa ra. Tae akera oki ki te mataiti e toru ngauru ma rua o te ariki o Babulonia ra o Aretekasaseta, aere atura au ki te ariki ra, e ope akera tetai au rā, tukuia iora au e te ariki:

7 Kua oki maira au ki Ierusalema, kite akera au i taua mea kino i raveia e Eliasiba ra ia Tobia, i te akonokono anga i tetai pia nona i roto i te paepae i te are o te Atua.

8 Ongoonga rava akera au: e kua akaruke atura au i te are apinga a Tobia ki vao mai i te pia.

9 Kua akaue atura au, e kua tamā maira ratou i te au pia ra; e kua akaoki maira au i te au āriki o te are o te Atua, te atinga kai, e te atinga kakara.

10 Kite atura oki au i ta te au ngati Levi au tuanga kare i orongaia atu kia ratou: kua oro anake oki te au ngati Levi, e te aronga imene, ko tei rave i te angaanga ra, ki tona kainga ki tona kainga.

11 Kua māro atura au i te aronga tutara, kua karanga atura, Eaa te are o te Atua i akarukeiaʼi? Kua akaputuputu iora au ia ratou, e kua tuku atura oki ki to ratou turanga.

12 Kua apai maira to Iuda katoa ra i te ngauru o te sitona, e te wina ou, e te inu, ki roto i te au are uipa anga ra.

13 Kua akono atura au i te aronga tiaki i taua uipa anga apinga ra, ko Selemia taunga ra, e ko Zadoka tata tuatua ra, e to te au ngati Levi ra, ko Pedaia: e ei vaitata ia ratou ra, ko Hanana te tamaiti a Zakura, te tamaiti a Matania: kua manakoia oki ratou e aronga pikikaa kore, e ta ratou taoonga ei tua apinga no to ratou au taeake.

14 E akamaara mai koe iaku, e taku Atua, i teia: auraka koe e taparapara ke atu i te au takinga-meitaki noku i raveia e au no te are o taku Atua, e te au angaanga no te reira ra.

15 Kite atura au i taua au rā ra i te aronga i takatakai i te au taomianga wina i te sabati, e te apai anga mai i te au ruru sitona, e te akauta anga i te apinga ki runga i te au asini; e te apai anga mai ratou i te rā sabati i te wina, te ua vine, e te suke, e te au apainga katoa, ki roto i Ierusalema; e kua akamura atura au ia ratou i te rā i oko ei i te kai ra.

16 E kua apai maira to Turia i noo i reira ra i te ika, e te au apinga ke katoa, e kua oko ki te au tamariki a Iuda i te sabati, i roto rai i Ierusalema.

17 Kua māro atura au i te aronga mamaata o Iuda ra, e kua karanga atura au kia ratou, Eaa teianei mea kino i raveia e kotou nei, i akanoaʼi kotou i te rā sabati nei?

18 Kare ainei to kotou ai metua i akapera, i apai mai ei to tatou Atua i teia katoa nei au kino ki runga ia tatou nei, e ki runga i teianei oire? E te akamaata ra kotou i te riri o te Atua ia Iseraela nei i akanoaʼi kotou i te sabati nei.

19 E marumaru akera i nga ngutupa i Ierusalema i mua ake i te sabati, kua akaue atura au e kia topiriia nga ngutupa, e iku atura e auraka e eeu akaouia e kia oti roa te sabati; e kua tuku atura au i tetai pae tavini oku ki nga ngutupa ra, e auraka ei apainga e apaiia mai ki roto i te rā sabati.

20 Moe iora te aronga oko, e tei ono i te au apinga ravarai ra, ki vao mai i Ierusalema, kua tu tai e kua tu rua i te pera anga.

21 Kua akamura atura au ia ratou, na ko atura, Eaa kotou i moe ei ki vao mai i te patu nei? I pera akaou kotou, ka opu toku rima ia kotou. Mei reira mairai kare atura ratou i oki mai i te sabati.

22 Kua akaue atura au i te au ngati Levi, e tamā ia ratou uaorai, e aere mai ratou e tiaki i nga ngutupa ra, e kia tapu oki te rā sabati. E akamaara mairai koe iaku, e taku Atua, i teia katoa, e akaperepere mai koe iaku i te maata oki o toou aroa.

23 Kite atura oki au i taua au rā ra i te au ngati Iuda, kua akaipoipo i te vaine Asedoda, e to Amona, e to Moabi.

24 E tuatua Asedoda oki tetai pae tuatua a ta ratou au tamariki ra, kare atura e tika kia tuatua mai i te tuatua a te ngati Iuda, ta tetai pae ra e ta tetai pae ra i te tuatua anga.

25 Kua māro atura au, e kua akakino atura au ia ratou, e kua pāpā au i to tetai pae, e kua utiuti i to tetai pae rauru, e kua akataputou atura ia ratou kia taputou i te Atua, na ko atura, Auraka kotou e oronga i ta kotou au tamaine na ta ratou au tamaroa, auraka oki e rave i ta ratou au tamaine na ta kotou au tamaroa, e na kotou uaorai oki.

26 Kare ainei te ariki o Iseraela ko Solomona i ara i taua au mea nei? kare ra ona e aite i te ariki i te pa enua katoa e manganui, e te akaperepereia oki e tona Atua, i akariro ei te Atua iaia ei ariki no Iseraela ravarai; kua ara katoaia ra aia i taua au vaine ke ra.

27 Ko kotou ainei ta matou e akarongo, i te rave anga i teianei kino maata, e ara atura i to tatou Atua i te akaipoipo anga i te vaine ke ke?

28 Ko tetai tamaiti ra a Ioiada, te tamaiti a Eliasiba taunga maata ra, e unonga aia no Sanabalata te Horoni; tuaru atura au iaia e riro atura.

29 E akamaara koe ia ratou, e taku Atua, no te mea kua viivii te taoonga taunga ia ratou, e te koreromotu oki a te kau taunga, e ta te au ngati Levi.

30 Tamā atura au ia ratou i te au tangata ke ra, e kua akono atura au i te taoonga a te kau taunga e te au ngati Levi, ko te tangata ko tana taoonga;

31 E no te apai anga rakau ra i te rā i akonoia ra, e no te popo ra. E manako mai koe iaku, e taku Atua e, kia meitaki oki au.