Ezekiela

44 KUA akaoki maira aia iaku i reira ra na te ara i te ngutupa i te ngai-tapu ki vao ra, e akara tika atu ki te itinga o te rāra; e kua topiriia.

2 E kua tuatua mairā Iehova kiaku; Ka topiriia teianei pa, kare e eeuia, kare rava e tangata e tomo na reira; no te mea kua na reira te Atua o Iseraela ko Iehova i te tomo, no reira ka topiriiaʼi.

3 Ko te ariki uaorai ra, koia oki, ko te ariki te ka noo ki reira e kai i te manga ki mua i te aroaro o Iehova; na te tomoanga i te ngutupa aia i te tomo, e na reira oki aia ki oki ki vao.

4 E kua arataki maira aia iaku na te ara ki te ngutupa ki te pae ki apatokerau ki mua i te are ra: kua akara iora au, e i na, kua ki te are o Iehova i te kakā o Iehova: e kua tipapa iora au ki raro taku mata.

5 E kua tuatua mairā Iehova kiaku, E te tamaiti a te tangata na, ka akono meitaki ana, e akara to mata, e akarongo oki to taringa, i te au mea katoa taku e karanga atu kia koe, i te au akonoanga ravarai i te are o Iehova, e te au ture katoa no reira; ka akairo meitaki ana i te tomoanga ki roto i te are, e te au tomoanga ki vao katoa o te ngai-tapu ra.

6 E karanga atu koe ki te aronga meameaau, ki te ngutuare o Iseraela, Te na ko maira te Atu ra ko Iehova; E te ngutuare o Iseraela e, kua oti ana kotou i ta kotou au mea viivii katoa ra,

7 Ko kotou i arataki mai i te tangata ke ke peritome koreia te ngakau, e te peritome kore katoa i te kopapa, kia noo ki roto i toku ngai-tapu, e kia viivii atu te reira, koia toku are nei, ka apai ei kotou i taku kai ra, te tongaua e te toto, e kua akaatikau ratou i taku koreromotu ra i ta kotou au mea viivii katoa ra.

8 Kare oki kotou i akono i tei ikuikuia mai i taku au mea tapu ra: kua tuku ra kotou i tetai aronga tiaki i tei ikuikuia e au i taku ngai-tapu ra, no kotou uaorai.

9 Te na ko maira te Atu ra ko Iehova; Auraka ei tangata ke, kare i peritomeia te ngakau, kare oki i peritomeia te kopapa ra, e tomo ki roto i toku ngai-tapu ra, e te au tangata ke ke katoa i roto i te tamariki a Iseraela.

10 Ko te ngati Levi ra, ko tei akaatea ke rava iaku nei, ka tatipake ei Iseraela, tei tatipake iaku i te aru anga i to ratou au idolo; na ratou rai e apai i ta ratou uaorai ara.

11 Ei au tavini ra ratou ki roto i toku ngai-tapu nei, i te tiaki anga ki te au ngutupa o te are, e te raverave anga i to te are: na ratou e ko i te atinga karakaratio, e te atinga, na te tangata, e ei mua ratou i to ratou aroaro tu ei, ei raverave i ta ratou.

12 No te mea na ratou i raverave i ta ratou, ki mua i to ratou au idolo, e na ratou maira i rokoiaʼi te ngutuare o Iseraela e te ara; i taputou ei au ia ratou, te tuatua maira te Atu ra ko Iehova, e na ratou rai e apai i ta ratou ara.

13 Kare oki ratou e akavaitata mai kiaku, i te rave anga i te taoonga taunga iaku nei, kare rai e akavaitata ki tetai o taku au mea tapu katoa nei, ki roto i te ngai-tapu roa ra: ei runga ra ia ratou uaorai to ratou akama vai ei, e ta ratou au mea viivii i raveia e ratou ra.

14 E akariro ra au ia ratou ei aronga tiaki i tei iku naia i te are, i te au angaanga katoa i reira ra, e te au mea katoa e raveia i reira.

15 Kareka te kau taunga, te ngati Levi ra, te au tamariki a Zadoka, tei tiaki i tei iku naia i toku ngai-tapu ra, ka tatipake ei te au tamariki a Iseraela iaku ra, ko ratou te ka akavaitata mai ïa iaku, ei raverave iaku nei; e ei mua ratou iaku tu ei, ei apai mai i te tongaua e te toto iaku nei, te tuatua maira te Atu ra ko Iehova.

16 E tomo ratou ki roto i toku ngai-tapu, e akavaitata mai oki ratou ki taku kaingakai, ei raverave iaku nei, e tiaki oki ratou i taku ikuiku.

17 E riro ra, kia tomo ratou ki roto i te au ngutupa o te paepae ki roto ra, ei kakau orongā to ratou au kakau; auraka rava ei uru-mamoe e tae ki runga ia ratou, kia raverave ratou i roto i te au ngutupa i te paepae ki roto ra, e ko roto katoa ra.

18 Ei pare orongā tei runga i to ratou upoko, e ei piripou orongā ki to ratou taukupu; auraka ratou e tatua ua atu i te mea e pataʼi te ou ra.

19 E kia aere ratou ki te paepae ki vao, koia oki te paepae ki vao ki te au tangata ra, e kiriti ratou i te au kakau i raverave ei ratou ra, ka tuku ei ki roto i te au pia tapu ra, ka kakau ei ratou i tetai aronga kakau ke ra; auraka oki ratou e akatapu i te au tangata i taua kakau no ratou ra.

20 Auraka oki ratou e varu i to ratou au upoko, auraka oki e akaroroa i to ratou rauru; e pakoti ua ra ratou i to ratou au mimiti.

21 Auraka rava te kau taunga ravarai e inu i te wina, kia tomo ratou ki roto i te paepae ki roto ra.

22 Auraka oki ratou e rave i tetai vaine takaua, e tei kopaeia ra, ei vaine na ratou: ei paretenia ra ta ratou e rave no te uanga o te ngutuare o Iseraela, e te vaine takaua e taunga tana tane i muatangana.

23 E na ratou e apii i toku ra au tangata i te tu ke anga i tei tapu e tei noa ra, e akakite oki kia kite ratou i tei viivii e tei mā.

24 E i te tauetono anga, ko ratou te ka tu ki runga i te akava anga; e akava oki ratou kia tau ki taku ra au akavaanga: e akono oki ratou i taku au ture, e taku au akono anga i toku au uipa anga katoa ra, e akatapu oki ratou i toku au sabati.

25 E auraka ratou e akavaitata ua atu ki te tangata mate, ka viivii aea ratou: kareka i te metua tane, e te metua vaine, e te tamaroa, e te tamaine, te teina, e te tuaine kare i moe i te tane, e tika ïa kia akaviivii ia ratou uaorai.

26 E oti akera aia i te tamāia, e tatau atu rai ratou i nga rā e itu ra.

27 E i te rā e aere ei aia ki roto i te ngai-tapu ra, ki te paepae ki roto ra, ei raverave ki roto i te ngai-tapu ra, e apai aia i tana tarangaara, te tuatua maira te Atu ra ko Iehova.

28 E e riro ïa ei tuanga na ratou: ko au oki ta ratou tuanga: auraka kotou e oronga atu i tetai ipukarea na ratou i Iseraela nei: ko au ta ratou ipukarea.

29 E kai ratou i te atinga kai, e te tarangaara, e te tutakingaara; e te au mea katoa i akatapuia ra i Iseraela nei, na ratou ïa.

30 E ko mua o te au popo kai katoatoa ra, e te au atinga ravarai a te tangata katoa, na te kau taunga ïa: e na kotou e oronga atu i ta kotou faraoa muatangana i oiia ra na te taunga, kia akairi mai aia i te ora ki runga i toou ra are.

31 Auraka te kau taunga e kai i te mea mate ua, e tei aeaeia ra, i te moa e te puaka katoa oki.