1 Petero

4 E TEIANEI i mate ana te Mesia i te mate kopapa nei no tatou, ka akatara ia kotou uaorai i taua manako ra: ko tei mate tika i te kopapa ra kua kore ïa e rave i te ara:

2 Kia kore aia e noo i te toenga o tona manga tuatau i te kopapa nei ma te akono i te anoano o te tangata, ma te akono ra i te inangaro o te Atua.

3 To tatou oki manga tuatau i topa ake i to tatou ora anga nei, oti ra ua ïa i te rave anga i to te etene inangaro, ka rave ei oki i te peu kanga ra, te inangaro tika kore, te inu nui i te wina ra, te kapiti anga kanga ra, te akakonā kava ra, e te au ravenga viivii a te idolo ra:

4 E te va ua ra ratou i te mea kare kotou i kapiti katoa ia ratou i taua peu kanga maata ra, ma te akakino oki ia kotou.

5 Ka aaki ratou i te tuatua kiaia, i tei teateamamao i te akava i tei ora e i tei mate.

6 I ako katoaia atu ei te evangelia i te aronga i mate ra, akaapa ua rai te tangata ia ratou i te kopapa nei, te ora ra ratou i te Atua i te Vaerua ra.

7 Kua vaitata ra te openga o te au mea ravarai nei: e teianei, e akono meitaki kotou, e e matakite, ma te pure.

8 Ko te aroa rai, kia maata tikaia ïa ia kotou uaorai: ka ngaro oki te apa e manganui i te aroa.

9 Ei oronga to kotou ia kotou rai ma te karapii kore.

10 Ka oronga te tangata katoa i te meitaki no tetai, mei tei rauka mai iaia ra, mei te tiaki meitaki i te aroa ua tumatatini a te Atua ra.

11 Kia tuatua tetai tangata ra, kia tau ïa i te tuatua a te Atua: kia rave tetai tangata i te taoonga diakono ra, kia tau i ta te Atua i oronga maira: kia akakakāia te Atua ia Iesu Mesia ra i te au mea katoa ra: ei iaia te akameitaki e te mana e tuatatau ua atu. Amene.

12 E aku au akaperepere e, auraka e poitirere i te takinga-kino maata i roto ia kotou ei timata anga ia kotou, mei te mea e kua rokoia kotou i tetai mea ke:

13 E rekareka ra, i te mea te rave katoa ra kotou i te au mate o te Mesia: e kia akakiteia mai tona kakā, kia rekareka katoa kotou i to perepere kavana maata.

14 Kia akakinoia kotou i te ingoa o te Mesia ra, e ao to kotou; no te mea te noo ra te Vaerua kakā, te Vaerua o te Atua, ki runga ia kotou: kua akakinoia aia e ratou, kua akameitakiia ra e kotou.

15 Auraka rava ra to kotou mate i te mate ta tangata, e te keia, e te rave tuatua kino, e te akamanamanata ia etai ke ra.

16 Ei mate Kerisitiano tona ra, auraka aia e akama: ka akameitaki ra aia i te Atua i te reira.

17 Kua tae oki ki te tuatau e tupu ei te mate i te ngutuare o te Atua nei: e na ko nei atu ia tatou nei te akavaanga i te tupu, eaa ra oki te openga o te aronga kare i akarongo i te evangelia o te Atua ra?

18 E “i akaora ngataia te aronga tuatua-tika ra, eiea te akono kore i te Atua, e te rave ara, e arōrō mai ei?”

19 E teianei, ko te aronga i mate i te inangaro o te Atua ra, ka tuku i to ratou au vaerua kiaia i te Atu mou, ma te rave i te tuatua mei taki.