Ezera

8 TEIA taua aronga mataiapo tutara ra, teia oki te tuatua anauanga i te aronga i aere ki runga ko au katoa ra, mei Babulonia mai, i te au o te ariki ra o Aretekasaseta.

2 To te au tamariki a Phinehaza ra, ko Geresoma ïa: to te au tamariki a Itamara, ko Daniela ïa; to te au tamariki a Davida ra, ko Hatusa ïa.

3 To te au tamariki a Sekania ra, to te au tamariki a Pharosa ra, ko Zekaria ïa: koia e te au tane, i te tatau katoa angaia te anauanga, okotai anere e rima ngauru.

4 To te au tamariki a Pahata-moabi ra, ko Elioenai te tamaiti a Zeraia ïa; koia e te au tane ra, e rua anere.

5 To te au tamariki a Sekania ra, te tamaiti a Iahaziela ïa, koia e te au tane ra, e toru anere.

6 To te au tamariki katoa a Adina ra, ko Ebeda te tamaiti a Ionatana ïa, koia e te au tane ra, e rima ngauru.

7 To te au tamariki a Elama ra, ko Iesaia te tamaiti a Atalia ïa, koia e te au tane ra, e itu ngauru.

8 To te au tamariki a Sephatia ra, ko Zebadaia te tamaiti a Mikaela ïa, koia e te au tane ra, e varu ngauru.

9 To te au tamariki a Ioaba ra, ko Obadia te tamaiti a Iehiela ïa, koia e te au tane ra, e rua anere okotai ngauru ma varu.

10 To te au tamariki a Selomita ra, te tamaiti a Iosiphia ïa, koia e te au tane ra, okotai anere e ono ngauru.

11 To te au tamariki a Behai ra, ko Zekaria te tamaiti a Bebai ïa, koia e te au tane ra, okotai takau ma varu.

12 To te au tamariki a Azagada ra, ko Iohana te tamaiti a Hakatana ïa, koia e te au tane ra, okotai anere okotai ngauru.

13 To te au tamariki openga a Adonikama, teia to ratou ingoa, ko Elipheleta ïa, ko Ieila, e ko Semaia, ko ratou e te au tane ra, e ono ngauru.

14 E to te au tamariki katoa a Bigavai, ko Utai, e ko Zabuda, ko ratou e te au tane ra, e itu ngauru.

15 Kua akaputuputu iora au ia ratou ki te pae vai e taʼe tika ki Ahava ra; po toru matou i te noo anga i reira i roto i te are piritanga: e kia akara aereia e au taua au tangata ra, e te kau taunga, kare atura e tamariki na Levi i te kitea angaia e au.

16 Kua tono atura au e tika ia Eliezera, e ia Ariela, e ia Semaia, e ia Elinatana, e ia Iariba, e ia Eli-natana, e ia Natana, e ia Zekaria, e ia Mesulama, ko nga tangata mamaata ïa; e ia Ioiariba, e ia Eli-natana, e puke tangata kite ïa.

17 Kua tono atura au ia ratou ma te tuatua kia Ido, te mataiapo no te ngai ra no Kasiphia, e kua akakite atura au i ta ratou kia karanga atu kia Ido, e tona ai taeake i te au Netini, i te ngai ra i Kasiphia, e kia arataki mai ratou i te aronga raverave no te are o to tatou Atua.

18 E no te takinga-meitaki o to matou Atua i runga ia matou, kua arataki mai ratou i tetai tangata kite, no te au tamariki a Mahali, te tamaiti a Levi, te tamaiti a Iseraela; e ko Serebia, e tana au tamariki, e tona au taeake, okotai ïa ngauru ma varu;

19 E ko Hasabia, koia e ko Iesaia no te au tamariki a Merari, tona ra au taeake, e ta ratou au tamariki, okotai takau;

20 E to te au Netini, e tei akonoia e Davida e te aronga mamaata katoa ra no te rave i te angaanga a te ngati Levi, e rua anere e rua ngauru i te Netini: e kua akakite katoaia to ratou au ingoa.

21 Kua akakite atura au i tetai akakoreanga kai i reira, i te vai ra ko Ahava, kia taakaaka matou ia matou uaorai ki mua i te aroaro o to matou Atua, kia kimi oki i tetai ara meitaki no matou, e no ta matou au tamariki, e ta matou au apinga katoa.

22 Akama akera oki au kia pati atu i te ariki i te takanava toa, e te au tangata akaoro oroenua, ei tauturu ia matou i te enemi i te arataa ra: no te mea i tuatua ana matou ki te ariki, i na ko ana e, Te rima o to matou Atua tei runga ïa i te aronga katoa i kimi iaia ei meitaki; te vai ra tona mana e tona riri i te aronga i akaruke iaia.

23 Kua akakore iora matou i te kai, e kua pati akatenga i to matou Atua i taua mea ra: e kua akarongoia mai matou e ia.

24 Kua akataka atura au i tei mamaata i te kau taunga okotai ngauru ma rua, ko Serebia, ko Hasabia, ko raua e nga taeake no raua tino ngauru;

25 E kua aite atura au kia ratou i te ario, e te auro, e te au āriki ra, ei atinga no te are o to matou Atua, ta te ariki, e ta ona tumu korero, e te aronga mamaata nona ra, e ko Iseraela katoa i reira, i oronga maira:

26 Aite atura oki au i roto i to ratou rima e ono anere e rima ngauru i te taleni ario, e te āriki ario ra okotai ïa anere taleni, e te auro okotai anere i te taleni;

27 Okotai takau oki kapu auro, okotai tausani i te dareki; e rua kapu veo kakā meitaki, mei te auro katoa ra te meitaki.

28 Kua karanga atura au kia ratou, Kua tapu kotou no Iehova; e te au kapu kua tapu katoa ïa; e te ario, e te auro, e apinga apai uaia ïa na te Atua o to kotou ai metua na Iehova.

29 E akamaroiroi, e tiaki i taua au apinga ra, e kia aite kotou ki mua i te aroaro o te aronga mamaata o te kau taunga e te ngati Levi, e te ui mataiapo tutara i Iseraela nei, i Ierusalema, i roto i te au pia o te are o Iehova.

30 Kua rave iora te kau taunga, e te au ngati Levi, i taua ario ra, e te auro, e te au āriki, kua oti i te aiteia ra, e apai ki Ierusalema ki te are o to tatou Atua ra.

31 Akaruke iora matou i taua vai ra ko Ahava, i te rā okotai ngauru ma rua i te marama mua ra, e aere ki Ierusalema: tei runga oki ia matou te rima o to matou Atua, e kua akaora aia ia matou i te rima o te enemi, e te aronga i moetapapa ia matou i te arataa ra.

32 Tae maira oki matou ki Ierusalema, e kua noo iora e po toru akera.

33 E tae akera ki te a o te rā, i aiteiaʼi te ario, e te auro, e te au āriki, i roto i te are o te Atua, i te rima o Meremota te tamaiti a Uria taunga; i reira katoā Eleazara te tamaiti a Phinehaza; ko ratou e ko Iozabada te tamaiti a Iesua, e ko Noadia te tamaiti a Binui, e ngati Levi anake;

34 Kua ope rava i te tatauia e i te aiteia; e kua tataia tana aiteanga katoa ra i taua rā tikai ra.

35 E te au tamariki a te aronga i apai keia ra, ko tei aere mai no te tuikaa anga ra, kua apai ïa i te atinga karakaratio na te Atua o Iseraela, okotai ngauru ma rua i te au puakatoro na Iseraela ravarai, e iva ngauru ma ono i te mamoe toa, e itu ngauru ma itu i te punua mamoe, okotai ngauru ma rua i te puaka-nio toa, ei tarangaara: ei atinga karakaratio anake te reira na Iehova.

36 Kua apai atura ratou i te tuatua a te ariki ra ki te au tutara tauturu a te ariki ra, e te aronga mana katoa i teianei pae vai: e kua tauturu mai ratou i te au tangata, e te are o te Atua ra.