Amosa

2 TE na ko mairā Iehova; No nga ara e toru a Moabi, e e a oki, e kore ei au e taruri ke i tana ra utunga; no te mea, kua tau aia i te au ivi o te ariki o Edoma ei ngaika.

2 E akaunga atura au i te ai ki roto ia Moabi, e pou oki te au are ariki o Keriota i te reira; ka mate oki Moabi i te oripu ua, ma te maeva, e ma te tangi o te pu.

3 E e tipu ke atu au i te akava i rotopu iora, e ta rai oki au i tona ui ariki ravarai ma ia katoa ra, te tuatua mairā Iehova.

4 Te na ko mairā Iehova; No nga ara e toru a Iuda, e e a oki, e kore ei au e taruri ke i tana ra utunga; no te mea kua akaviivii ratou i te ture a Iehova, e kare oki i akono i tana ra au akonoanga; e na to ratou au atua pikikaa i akatatipake mai ia ratou, ko tei aru aereia e to ratou ai metua.

5 E e akaunga atura au i te ai ki roto ia Iuda, e pou oki te au are ariki o Ierusalema i te reira.

6 Te na ko mairā Iehova; No nga ara e toru a Iseraela, e e a oki, e kore ei au e taruri ke i tana ra utunga; no te mea, i oko ana ratou i te tangata tuatua-tika ki te ario, e te tangata rikiriki ki nga tamaka e rua ra.

7 Ko tei umuumu atu nei ki te manga one pueu o te enua nei i runga i te mimiti o te tangata rikiriki e te ruri ke nei te aerenga o te aronga paruparu: e te aere nei te tangata ma tona uaorai metua tane ki roto ki te vaine okotai, ei akaviivii anga i toku ingoa tapu.

8 Te akāvai ra ratou ki raro ki runga i te kakau tutaki ki vaitatao i te au atarau katoa; e te wina a tei akautungaia ra, te inu nei ratou ki roto i te are o to ratou au atua.

9 Kua akapou ra au i te ngati Amori ki mua ia ratou, ko tei aite tona teitei ki te teitei o te arezi, e tona pakari mei te au alona: kua pou ra tona ua i runga ra iaku, e tona au aka ki raro ra.

10 Ko au rai oki tei arataki ia kotou mei te enua ra i Aiphiti, e kua na te medebara au i te arataki ia kotou e a ngauru i te mataiti, kia rauka ia kotou te enua o te ngati Amori.

11 E kua akatupu oki au i ta kotou au tamaroa ei peroveta, e to kotou au tangata māpu ei Nazira. Kare ainei i pera, e kotou e te au tamariki a Iseraela? te tuatua mairā Iehova.

12 Kua akainu ra kotou i te au Nazira ki te wina, e kua karanga kotou ki te au peroveta, na ko atura, Auraka e totou.

13 I na, e taotaomi atu au ia kotou ki raro mei tei taomiia e te porotata i ki i te ruru sitona ra.

14 Ka ngere tei viviki i te akapuanga, e te tangata ririnui ra, kare aia e akamaroiroi i tona ririnui, kare oki tei mana e ora iaia uaorai:

15 E tei rave i te ana ra, kare īa e mou mai, kare oki te vaevae viviki e ora; kare katoa oki tei oro na runga i te oroenua ra e ora iaia uaorai.

16 E ko tei ririnui i roto i te au toa uritumu ra, e oro taaka ua aia i taua rā ra, te tuatua mairā Iehova.