Exodo

5 E I MURI ake i te reira, aere aturā Mose raua ko Aarona, e kua karanga atura kia Pharao, Te na ko maira te Atua o Iseraela ra ko Iehova, E tuku i toku au tangata kia aere, e kia akono ratou i te oroa naku i te medebara ra.

2 Kua tuatua mairā Pharao, Koai a Iehova, ka akarongo atu ei au i tona reo, ka tuku atu ei ia Iseraela? Kare au i kite ia Iehova, kare oki au e tuku ia Iseraela.

3 Kua karanga atura raua, Kua mama mai te Atua o te ngati Ebera kia maua: teia ta matou tuatua kia koe, e tuku ake ana koe ia matou, e aere matou ki te medebara, e kia po toru ake i te aerenga, e apai i te atinga ki to matou Atua kia Iehova ra; ko te ta mai aea aia ia matou ki te makimate, e kare ra, ki te koke.

4 Kua tuatua maira te ariki o Aiphiti kia raua, Eaa korua, ko koe oki e Mose i ko Aarona, i tavarenga ke ei i te au tangata nei i ta ratou angaanga? E aere kotou ki ta kotou au apainga.

5 Kua tuatua akerā Pharao, I na, kua maata te au tangata o te enua nei i teianei, e te akapaki nei ratou i ta ratou apainga ia korua na.

6 Kua karanga aturā Pharao ki te aronga akaaiteite-angaanga na taua au tangata ra, e to ratou au tangata taoonga, i taua rā ra, na ko atura,

7 Auraka kotou e apai i te tumu sitona na te au tangata kia anga i te karakaraea, mei tei muatangana ra: e aere ra ratou e koi aere i te tumu sitona na ratou uaorai.

8 Ko te tatau tikai ra i te tatau i te karakaraea, ta ratou i anga i muatangana ra, ta kotou e tuku atu; auraka kotou e akaiti i te reira: no te mea kua akatau ratou; i kaku mai ei ratou, i na ko mai ei ra, E tuku ake ana ia matou, e aere matou e apai i te atinga na to matou Atua.

9 Ka akamaata atu rai kotou i te angaanga na taua aronga tangata ra, kia akono ratou i te reira; auraka e akono i te tuatua puapinga kore.

10 Aere atura te aronga akaiteite-angaanga na te au tangata ki vao, e ta ratou au tangata taoonga, e kua karanga atura ki te au tangata ra, na ko atura, Te na ko mairā Pharao, Otira ua au i te apai atu i te tumu sitona na kotou:

11 Ko kotou te aere, e kimi i te tumu sitona i te ngai e rauka atu ei; kare ra e akaitiia ta kotou angaanga, e okotai iti ake.

12 Peurikiriki ke atura te tangata, e pini ua ake te enua katoa ra ko Aiphiti, i te koi aere anga i te teita ei tumu sitona.

13 Kua akaapoapo maira te aronga akaaiteite-angaanga ra ia ratou, na ko maira, E rave akaoti roa ta kotou angaanga, i akonoia no te au rā katoa nei, mei tei te tumu sitona anga ra.

14 E te au tangata taoonga ngati Iseraela, ta te aronga akaaiteite-angaanga a Pharao i tuku i rungao i to ratou ra, i pāpāia ïa, e i uiia e, Eaa i kore ei tika ta kotou angaanga i te anga i te karakaraea i akonoia ra i nanai, e nakonei katoa oki, mei tei muatangana ra?

15 Kua aere atura taua aronga taoonga ngati Iseraela ra, kua kaku atura kia Pharao, na ko atura, Eaa koe i akapera mai ei i toou au tavini nei?

16 Kare oki e tumu sitona i o maiia mai ki toou au tavini nei, e te tuatua ua maira ratou kia matou nei, E anga i te karakaraea: e i na, kua pāpāia toou au tavini nei; tei toou uaorai ra au tangata te apa.

17 Kua tuatua maira ra aia, E akatau, kua akatau kotou; i tuatua mai ei kotou e, E tuku ake ana ia matou, kia aere e apai i te atinga na Iehova.

18 E tenana, ka aere, ka rave i te angaanga; kare e apaiia atu te tumu sitona kia kotou; ko te tatau rai te tatau o te karakaraea kia tuku mai kotou.

19 Kite akera tana aronga taoonga ngati Iseraela ra i te tu o to ratou tumatetenga, i tei tuatuaia maira e, Kare e akaitiia ta kotou karakaraea i akonoia no te au rā katoa ra.

20 Kua aravei akera ratou ia Mose raua ko Aarona, te tu ua ra raua i te arataa, ia ratou i oki mai mei mua mai ia Pharao ra:

21 E kua tuatua maira ratou kia raua, Kia akara mai a Iehova ia korua, ka akava mai ei; kua akariro io nei korua ia matou ei mea viivii i mua i te aroaro o Pharao, e i te aroaro katoa o tona au tavini, kua tuku korua i te koke ki to ratou rima ei ta mai ia matou.

22 Kua oki mairā Mose kia Iehova ra, e kua tuatua maira, E te Atu, eaa koe i takingakino ei i teianei aronga? eaa oki koe i tono ake ei iaku nei?

23 Mei iaku rai oki i aere atu kia Pharao ra e tuatua ma toou ra ingoa, kua takinga-kino maia aia i taua aronga nei; e kare oki toou iti-tangata e ora i taau akaora anga.