Daniela

5 KUA akatupu iora te ariki ra ko Belesazara i tetai kaingakai maata, na te ui mataiapo ki ona ra okotai tausani, e kua inu iora i te wina ki mua i taua tausani ra.

2 I te inu manga i taua wina ra, kua akaue akerā Belesazara e apai mai i te au kapu auro e te ario, i raveia mai e tona metua e Nebukanesa, no roto i te iero i Ierusalema; ei inu manga na te ariki, e na te ui mataiapo katoa ki ona, e na te au vaine nana, ma tana au vaine tavini.

3 E kua apai maira ratou i reira te au kapu auro, i raveia mai no roto i te iero, no roto i te are o te Atua i Ierusalema; e kua inu iora te ariki, e te ui mataiapo ki ona ra, e te au vaine nana, ma tana au vaine tavini.

4 Kua inu ratou i te wina, e kua akapaapaa i te au atua auro, e te ario, te veo, te auri, te rakau, e te toka.

5 Tei taua ora ra te tae anga mai te maikao-rima tangata ra, i te tata anga ki mua mai i te lamepa ki runga i te ngaika i te patu i te are o te ariki ra: e kua kite oki te ariki i taua potonga rima i tata ra.

6 Tu ke atura te mata o te ariki i reira, e tumatetenga akera aia i tona manako, kua mataratara ua nga paupauanga taukupu nona ra, e kua pāpā iora ona turi tetai ki tetai

7 Kua kapiki nui atura te ariki e arataki mai i te au akara etu, te au Kaledea, e te au purepure. Kua karanga atura te ariki, na ko atura, ki te aronga pakari i Babulonia, Ko te tatau i teianei tuatua, e e akakite mai i te aiteanga kiaku nei, e akakakauia ïa ki te kakau muramura, e te pirianganaoa auro ki runga i tona kaki, e riro oki aia i te tokotoru i te mana anga i te basileia nei.

8 Kua aere maira i reira te aronga pakari katoa i o te ariki ra: e kare akera i tika ia ratou ki tatau i tei tataia ra, e te akakite i te aiteanga ki te ariki.

9 Taitaia maata roa atura taua ariki ra ko Belesazara i reira, e tu ke atura tona mata, e tumatetenga pu ua oki te ui mataiapo ki ona ra.

10 Ko te ariki vaine ra, no te tuatua a te ariki e ta te ui mataiapo ki ona ra, kua aere maira ki roto i te are kaingakai: kua tuatua maira taua ariki vaine ra, na ko maira, E te ariki, kia ora koe e tuatau ua atu: auraka koe e taitaia i toou manako auraka oki kia tu ke to mata na:

11 Tera ake tetai tangata tei toou nei basileia, tei roto iaia te vaerua o te au atua tapu ra; e kitea iora i roto iaia te mārama, e te kite, e te pakari, mei te pakari o te au atua ra, i te au rā o toou metua ra; ta te ariki ta Nebukanesa toou metua, ta te ariki oki ta toou metua, i akariro ei tutara no te aronga pakari, te au akara etu, te au Kaledea, e te au purepure;

12 No te mea te kitea ra te vaerua meitaki, e te kite, e te karape, i te akakite anga i te aiteanga moe, e te eeuanga i te tuatua ngaro e te tatara anga i te au tuatua ekoko, i roto i taua Daniela ra, ko tei tapaia e te ariki ra, ko Beletesazara: e teianei, ko Daniela te tiki atu, e nana e akakite mai i te aite anga.

13 I aratakiia mairā Daniela i reira ki mua i te ariki ra. Kua karanga atura te ariki, na ko atura, kia Daniela, Ko koe ainei taua Daniela no te au tamariki o Iuda i tuikaa ra, ko tei arataki naia mai e taku metua e te ariki mei Iuda mai?

14 Rongo akenei oki au ia koe e, tei roto ia koe te vaerua o te au atua, e te kitea ra te mārama e te kite, e te pakari meitaki, ki roto ia koe.

15 E teianei, kua aratakiia mai te aronga pakari, e te au akara etu, ki mua iaku nei, kia tatau ratou i tei tataia nei, e akakite mai oki kiaku i to reira aiteanga: kare akera i tika ia ratou kia akakite mai kiaku i te aiteanga i taua mea nei:

16 Rongo akenei ra au ia koe, e e tika ia koe kia akakite mai i te au aiteanga, e kia akataka i te au tuatua ekoko: e teianei, kia tika ia koe kia tatau i tei tataia nei, e kia akakite mai kiaku i to reira aiteanga, ka akakakauia koe ki te kakau muramura, e te pirianganaoa auro ki runga i to kaki, e ko te tokotoru koe i te mana i teianei basileia.

17 Kua tuatua mairā Daniela, na ko maira, ki mua i taua ariki ra, Ei ia koe uaorai taau apinga, e taau ra au tutaki e apai atu ïa na tetai ke, e tatau ra au i tei tataia nei ki te ariki, e e akakite atu kiaia i te aiteanga.

18 Ko koe na, e te ariki, kua oronga mai te Atua teitei i tetai basileia, e te tapunui, e te kakā, e te ngateitei, ki to te metua ra kia Nebukanesa:

19 E no te tapunui tana i oronga mai nona ra, kua ruketekete te au tangata katoa, te pa enua, e te au reo ke ke, e kua matakutaku, ki mua iaia ra; ko tana i inangaro ra kua ta; e ko tana i inangaro ra kua akaora; e ko tana i inangaro ra kua akateitei ki runga; e ko tana i inangaro ra kua tukuia ki raro.

20 Kia teitei ra tona ngakau, e kia mārokiakia tona ngakau i te nengonengo, kua tukuia aia ki raro i te terono ariki nona ra, e kua ravea keia iora e ratou tona kakā:

21 E i îîa keia atura aia i rotopu i te tamariki a te tangata nei; e kua akariroia tona ngakau mei to te puaka, e tei rotopu i te au asini momoavao tona noo anga: kua akaangai akera ratou iaia ki te ngangaere mei te puakatoro ra, e kua kū tona kopapa i te au o te rangi ra; e kite akera aia e tei te Atua teitei te au i te basileia o te tangata nei, e nana e tuku i tana tangata inangaro ra ki rungao.

22 E ko koe oki, e te tamaiti nana, e Belesazara, kare oki koe i taakaaka i toou ngakau, kite uaʼi koe i taua au mea katoa nei;

23 Kua akateitei ra koe ia koe uaorai i te Atu o te rangi ra; e kua apai mai ratou i te au kapu o tona are ki mua ia koe, e kua inu koe, e te ui mataiapo i oou nei, to au vaine e to au vaine tavini, i te wina i roto ra; e kua akameitaki koe i te au atua ario, e te auro, te veo, te auri, te rakau, e te toka, ko tei kore i akara, kare oki i akarongo, kare oki i kite: e te Atua tei roto i tona rima to aʼo, e tei iaia toou katoa ra au aerenga, kare koe i akakakā iaia:

24 I reira taua potonga rima i te apai ke angaia i mua iaia ra; e teia te tuatua i tataia maira.

25 E teia te tuatua i tataia ra, MENE, MENE, TEKELE, UPERESINE.

26 Teia te aiteanga i taua mea nei: MENE; Kua tatauia e te Atua to basileia, e kua akaoti.

27 TEKELE; Kua aiteia koe ki te aite, e kare i tika.

28 PERESI; Kua tuaia toou basileia, e kua orongaia ki to Madai, e ki to Peresia.

29 Kua akaue aturā Belesazara i reira, e kua akakakau atura ratou ia Daniela ki te kakau muramura, e tetai pirianganaoa auro ki runga i tona kaki, e kua tutu aere atura ratou iaia e ko te tokotoru aia i te mana anga i taua basileia ra.

30 I taua po rai, taia ïa iora taua ariki o te Kaledea ra ko Belesazara.

31 Riro atura taua basileia ra ia Dariu, te ngati Madai, kua tae ki te ono ngauru ma rua o tona ra mataiti.