2 Paraleipomeno

35 KUA akono aturā Iosia i te pasa na Iehova i Ierusalema: e kua ko ratou i te pasa i te rā okotai ngauru ma a i te marama mua ra.

2 Kua tuku atura aia i te kau taunga ra i ta ratou au taoonga, e kua akamaroiroi ia ratou kia rave i te angaanga i te are o Iehova.

3 Kua karanga atura aia ki te ngati Levi, ko tei akatapuia no Iehova, tei apii ia Iseraela ravarai, E tuku ana i te aruna tapu ki roto i te are, i akatuia e Solomona, te tamaiti na Davida ariki no Iseraela ra: kare atura oki e apai aereia ki runga i to kotou pakuivi: e rave oki kotou i ta to kotou Atua i ta Iehova, e ta tona ra au tangata ta Iseraela.

4 Kia akateateamamao ia kotou i te ngutuare o to kotou ai metua, e to kotou au pupu, i tei tataia e te ariki o Iseraela e Davida, e tei tataia e tana tamaiti oki e Solomona.

5 E tu oki kotou i roto i te ngai-tapu ra, i te akono anga oki i te tuanga i te ngutuare o te ai metua i to kotou ai taeake, te tamariki a te au tangata ra, e i te tuanga i te au kopu-tangata ngati Levi ra.

6 E ko oki kotou i te pasa, e akatapu ia kotou uaorai, e akateateamamao i to kotou ai taeake, kia mako tikai ratou i te tuatua a Iehova ia Mose ra.

7 Kua oronga aturā Iosia no roto i te anana, i te au punua mamoe e te au punua puaka-nio, na te tangata, na te aronga katoa i tae maira, ei apai anga no taua pasa ra, ka toru ngauru i te tausani, e toru tausani oki i te puakatoro: no roto i ta te ariki uaorai te reira.

8 E te aronga mamaata ki ona ra, kua oronga ua katoa ratou ki te tangata, ki te kau taunga, e ki te au ngati Levi; ko Hilikia, e ko Zekaria, e ko Iehiela, nga tutara ïa i te are o te Atua ra, ko tei oronga na te kau taunga ra ei apai anga no taua pasa ra, e rua tausani e ono anere, e toru oki anere i te puakatoro.

9 Ko Konania katoa, e ko Semaia e ko Netaneela, nga taeake nona ra, e ko Hasabia, e ko Ieiela, e ko Iozabada, e rangatira no te ngati Levi, ko tei oronga na te ngati Levi ei apai anga no taua pasa ra, e rima tausani, e rima oki anere, i te puakatoro.

10 Vave akera taua ravenga ra, e te kau taunga i te tu ua anga i to ratou ngai, e te au ngati Levi i to ratou ra au pupu, i ta te ariki oki i akaue maira.

11 Kua ko iora ratou i te pasa ra, e na te kau taunga i pîpî i te toto i to ratou rima, e na te au ngati Levi i oore.

12 Kua akataka ke atura ratou i te au atinga karakaratio, kia tika kia oronga tu i ta te tuanga a te au kopu-tangata o te au tangata ra, kia apai atu na Iehova i tei tataia i roto i te buka a Mose: e kua pera oki ratou i te au puakatoro ra.

13 Kua tunu paka iora ratou i te pasa i te ai, i tei akonoia ra: kareka tetai pae i taua au atinga tapu ra, kua tunu vaiia ïa i roto i te pani, e te pani maata, e te pani rikiriki, e kua tua naunau iora ki te tangata ravarai.

14 E oti akera, kua akamaroiroi iora i ta ratou uaorai, e ta te kau taunga: no te mea e angaanga ta te kau taunga, te au tamariki a Aarona, te apai ra ïa i te au atinga karakaratio, e te tongaua, e po ua atura; akamaroiroi ei te ngati Levi i ta ratou uaorai, e ta te kau taunga ra te tamariki a Aarona.

15 E te aronga imene, te au tamariki a Asapha, tei to ratou ïa turanga, i tei akaueia mai e Davida, e ko Asapha, e ko Hemana, e ko Iedutuna te akara a te ariki ra: te tiaki ra oki te au tiaki ngutupa i te au ngutupa katoa; kare ratou e tika kia akaruke i ta ratou angaanga, na to ratou ai taeake, te au ngati Levi oki i akonokono i ta ratou.

16 Teateamamao rava akera taua angaanga a Iehova ra i te rā okotai, kia akono i te pasa, e kia apai i te au atinga karakaratio ki runga i te atarau a Iehova, i tei akaueia mai e te ariki ra e Iosia.

17 Akono atura te tamariki a Iseraela i tae maira i taua pasa ra, i te reira tuatau, e te oroa i te kai akaopue kore ra, e po itu akera.

18 Kare ïa e pasa i kitea i Iseraela, mei ia Samuela peroveta mairai: kare oki te au ariki katoa o Iseraela i akono i te pasa mei ta Iosia i akono, e te kau taunga, e te au ngati Levi, e ta Iuda katoa, e ko Iseraela i tae maira, e to Ierusalema katoa oki.

19 Tei te mataiti okotai ngauru ma varu i te au o Iosia ra i akonoiaʼi taua pasa nei.

20 I muri ake i te reira, e manea akera te are ia Iosia, kua aere maira te ariki o Aiphiti ko Neko ki runga e tamaki ia Karekemisa, i Eupharati, e kua aere aturā Iosia e tamaki iaia.

21 Kua tono maira aia i te au karere kiaia, na ko maira, Eaa taku ia koe, e tenana ariki no Iuda? kare tei ia koe taku e tamaki ra i teianei rā, tei tetai ngutuare ke ra: kua akaue mai oki te atua iaku e kia ngakoikoi i te rave: auraka koe e māro mai i te Atua, tei iaku nei oki iaia, kia kore koe e mate iaia.

22 Kare akerai a Iosia i anga ke i tona mata iaia, kua akatu ke iora ra i tona uaorai tu, kia tamaki atu aia iaia, kare akerai i akarongo i te au tuatua a Neko no ko i te vaa o te Atua ra, kua aere iora kua tamaki i te o ra i Megido.

23 Kua akainana maira te aronga ana i te ariki ra ia Iosia; kua karanga atura te ariki ki tona au tavini, E apai ke kotou iaku, kua puta roa au.

24 Kua rave maira tona au tavini iaia mei roto mai i taua kariota ra, e kua tuku iora iaia ki roto i te rua o te kariota nona; e kua akaoki maira ratou iaia ki Ierusalema, mate iora aia, e tanumia iora i roto i tetai menema no tona ra ai metua. Aue iora Iuda katoa e Ierusalema ia Iosia ra.

25 Aue iora oki a Ieremia ia Iosia: e akaiki rai te au imene tane katoa e te au imene vaine ia Iosia kia aue ratou, e tae rava akenei ki teianei rā, e akonoanga oki na Iseraela: i na, kua oti oki te tataia i roto i te tuatua aue ra.

26 E te toenga o te tuatua ia Iosia, e te meitaki nona, mei tei tataia i roto i te ture a Iehova,

27 E tana au angaanga, tei mua e tei muri, i na, kua tataia i roto i te buka a te au ariki o Iseraela e no Iuda.