Isaia

21 TE TUATUA no te medebara o te tai ra. Mei te puaioio i apatonga ra i te oro anga mai; te aere maira aia mei te medebara, mei te enua rikarika maira.

2 E orama rikarika tei akakiteia mai kiaku nei; te āru aere nei te āru, te ta aere nei oki te ta tangata ra. E aere ki runga, e Elama e; e akamou i te tamaki, e Madai e; kua akakere au i to aue anga katoa ra.

3 E teianei kua pini toku taukupu i te mamae: kua rokoia au e te mamae, mei te mamae akaanau tamariki ra: kua akaruketeketeia au, kare e tika kia akarongo: kua akapekapekaia mai au, kare e tika, kia akara.

4 Kua ruri keia toku ngakau, kua rokoia au e te rikarika: te aiai inangaroia e au ra, kua akariroia ei mea mataku naku.

5 Kua vave te kaingakai, kua akanooia te tiaki, kua kaikai, kua inu: ka tu, e te ui ariki e; e akamainu i te paruru tamaki.

6 Kua na ko maira oki te Atu kiaku, Ka aere, ka akanoo i te mata tamaki; ko tana i kite ra, e akakite mai aia.

7 Kite atura aia i te au takanava oroenua ra kua tataki rua, te au takanava asini, e te au takanava kamela; e kua akarongo marie ua atura aia.

8 Kua kapiki ua maira aia mei te liona ra, E taku atu e, te tapapa nei au e po ua atu te rā, e tu oki au i toku tiaki anga nei, e ao ua ake te au po katoa nei:

9 E i na, te aere anake maira teia: e aronga takanava tangata, te au oroenua ra, kua tataki rua ïa. E kua karanga maira aia, na ko maira, Kua pou, kua pou Babulonia! e, tona au atua idolo katoa, kua aka ungaungātiti roaia ki raro i te one.

10 Aue taku e pāpā nei e e te sitona i taku ngai pāpā sitona nei e! ko taku oki i kite ia Iehova Sabaota ra, te Atua o Iseraela ra, ko taku i akakite atu kia kotou na.

11 Te tuatua ia Duma ra. Te kapiki ua maira tetai kiaku no Seira mai, E te tiaki ra e, eaa to teianei po? e te tiaki ra e, eaa to teianei po?

12 Kua tuatua maira taua tiaki ra, Kua vaitata te ao, e te po katoa oki; kua inangaro kotou i te ui mai, ka ui mai kotou: e ariu, e oki mai.

13 Te tuatua ia Arabia ra. Ei roto i te rarorakau i Arabia kotou ka moe ei, e tera ra pouou tangata no Dedana ra e.

14 Ei vai te apai atu na tei kaki ra, e to te enua ra e to Tema e, ei kai te apai atu ki tei oro ra.

15 Kua ati oki ratou i te mata koke, i te mate o te koke i kiritiia ra; e ki mua i te ana i akamingiia ra, e ki mua oki i te aroaro o te tamaki rikarika ra.

16 Kua na ko maira oki te Atu kiaku, Kare e ope te mataiti, mei te mataiti o tei ouia ra, e kore ei te manea katoa o Kedara ra:

17 E te toenga o te au tangata ana ra, te au tangata maroiroi i Kedara ra, ka akaitiia ïa; ko Iehova oki, te Atua no Iseraela, tei tuatua mai.