Salamo

105 E AKAMEITAKI ia Iehova; e kapiki i tona ingoa; e akakite i tana i rave ki rotopu i te au tangata. 2 E imene iaia, e imene iaia i te salamo; e tuatua i te au angaanga taka ke ravarai nana ra. 3 E akapaapaa kotou i tona ra ingoa tapu: kia rekareka te ngakau o te aronga i kimi ia Iehova ra. 4 E kimi ia Iehova, e tona ra ririnui; e kimi tamou i tona mata. 5 E akamaaraara i tana au angaanga taka ke tana i rave ra; tana ra au ravenga taka ke, e te au tuatua-tau a tona vaa; 6 E te uanga o tona tavini o Aberahama e, e te au tamariki a Iakoba i ikiia e ia e! 7 Koia to tatou Atua ko Iehova; tei te pa enua katoa ïa tana ra au tuatua-tau. 8 E tamou aia i tona manako i tana ra koreromotu; te tuatua tana i akaue maira e tausani ua atu te uki; 9 Te koreromotu tana i papau ia Aberahama, e tana i taputou ia Isaaka; 10 Tana i akatinamou ia Iakoba ei akonoanga; ia Iseraela, ei koreromotu mutu kore, 11 Ka tuatuaʼi ra e, Ka oronga atu au i te enua ra ko Kanaana noou, ei tuanga na kotou; 12 I to ratou iti anga ra, kare i maata kia tatau ra, e te varavara ra e te tangata ke ke oki i reira. 13 To ratou aere anga ra, mei tetai vaka tangata e tae ua atura ki tetai vaka tangata, mei tetai basileia e tae atura ki tetai papaki tangata: 14 Kare ratou i tukua e ia kia takinga-kinoia e te tangata ra; e ui ariki oki tei akoia e ia ia ratou, ka na ko ei ra e, 15 Auraka e akatukia ua mai i tei akatainuia e au, e taku ra au peroveta, auraka e takinga-kinoia. 16 Iaia i apai mai i te onge ki runga i te enua ra; kua akakore atura i te au kai katoa ra: 17 Kua tonokia ana tetai tangata i reira i mua ia ratou, ko Iosepha, kua okoia ïa ei tavini: 18 I mamae tona vaevae i te tapeka, i roto oki aia i te auri; 19 E tae akera ki te tuatau i tupu ei tana tuatua; kua timataia aia e te tuatua a Iehova. 20 Kua tono akera te ariki i te karere e tatara iaia; te tutara o te au tangata ra, tei tuku iaia: 21 Kua akariro atura aia iaia ei rangatira i tona ra ngutuare, ei akaaere i tana katoa ra au apinga; 22 Kia tapeka aia i tona ra ui ariki kia anoano ra, e kia akakite ki tona aronga pakari i te tuatua pakari. 23 Riro atura oki a Iseraela ki Aiphiti, e kua noo a Iakoba i te enua o Hama ra. 24 I reira aia i te akamaata roa anga i tona tangata , e maroiroi atura ratou i to ratou au enemi. 25 Akaariu aturaia to ratou ngakau kia makitakita i tona ra au tangata, e kia pikikaa i tona au tavini. 26 Kua tono akera aia i tona tavini ia Mose, e ia Aarona i ikiia e ia. 27 Na raua i akakite i tana au akairo i rotopu ia ratou, e te au ravenga taka ke i te enua o Hama ra. 28 Kua tuku atura aia i te poiri, e kua poiri iora, e kare ratou i taitoito mai i tana tuatua. 29 Kua akariro aia i ta ratou au vai ei toto; pou iora to ratou au ika i te mate. 30 Ki rava akera to ratou enua i te rana: i roto roa i te au pia o te ui ariki ki o ratou ra. 31 Kua tuatua aia, e kua aere maira te au rango; e te kutu e pini akera to ratou enua. 32 Kua akariro akera aia i ta ratou ua ei ua toka, e te kanapanapa anga uira i to ratou enua. 33 Kua ta atura aia i ta ratou au vine e te au suke; e kua atiati akera i te au rakau o to ratou ra enua. 34 Kua tuatua aia, e kua aere maira te tāpaki; e te anue, kare e ope kia tatau, 35 Ko tei kai pou takiri i te au rakau rikiriki o to ratou ra enua, e pou rava akera te au ua katoa o to ratou au kainga ra. 36 Kua ta oki aia i te au tama mua ravarai o to ratou ra enua; te mua tikai o to ratou ririnui. 37 Kua arataki mai aia ia ratou ki vao ma te ario e te auro; e kare rava tetai i apikepike i to ratou katoa ra au kopu. 38 Kua rekareka Aiphiti i to ratou riro anga; kua rokoia oki ratou e te mataku ia ratou. 39 Kua oora aia i tetai tumurangi ei marumaru, e tetai ai ei mārama i te po. 40 Kua pati mai ratou, e kua apai mai aia i te manu, e kua merengo ratou iaia i te kai o te rangi. 41 Kua vaʼi aia i te mato, e kua maringi maira te vai; kua taʼe a vai aere ua atura na te au ngai marō ra! 42 I manako ra oki aia i tana tuatua tapu ki tona tavini kia Aberahama: 43 I arataki mai ei aia i tona au tangata ma te rekareka; tei ikiia e ia ma te imene ra. 44 Kua oronga maira aia i te pa enua o te au etene kia ratou, e kua riro maira kia ratou ta te au tangata ra angaanga: 45 Kia akono ratou i tana ra au akonoanga, e kia akarongo i tana ra au ture. Alelu Ia.